Ja lekil yaljelik jakel bʼa Jyoba, «ja Dyos tolabida gustoʼayi», wa skʼana ja pamilyaʼiki aʼajyuke gusto (1 Timoteo 1:11, NM). Yeʼn ya kujlajuk ja nupaneli. Ja nupanel bʼa leyi jaʼ skujlayubʼil bʼa oj ajyuke gusto ja pamilya sok bʼa slekilal ja yuntikileʼi. Ja yaʼtijumik Dyosi tʼilan oj skʼuʼuke ja sleyik ja gobyerno bʼa oj yawe kʼeʼuk sjuʼunil ja snupaneleʼi. Kʼuman ja Lucas 2:1, 4, 5.

Ja Dyosi chaʼanyabʼalil lek xyila ja nupaneli, ja yuj ja yeʼn wa skʼana aʼajyuke lajan tolabida yajni jun winik sok jun ixuk wa xnupaniye. Jyoba wa skʼana ja tatamalik soka cheʼumalik mok yi spatik sbʼaje (Hebreos 13:4). Ja Yeʼn wa xyijnay ja skʼutsjel ja nupaneli (Malaquías 2:16). Pe ta bʼa yojol jun nupanel ja ixuki ma jaʼa winiki waysok pilan, ja Dyosi wa xyaʼakan ja maʼ mey smuli a-skʼuts ja snupaneli sok oj bʼobʼ nupanuk ta jachʼ wa skʼana. Kʼuman ja Mateo 19:3-6, 9.

Jyoba skʼulan ja winik soka ixuk bʼa jun modo oj skoltay sbʼaje ja bʼa snupaneleʼi (Génesis 2:18). Yuja tatamal yeʼn ja olomal ja bʼa pamilya, yeʼna ni xchol oj smakʼlay sok oj sjeʼ yi sbʼaja Dyos ja spamilya. Yuja wa skʼana ja xcheʼumi, jani wa xwaj skʼujol bʼajtan yuja yeʼn. Ja tatamal soka cheʼumal tʼilan a-skʼan sbʼaje sok a-skis sbʼaje. Pe yuja mulanumeʼi, tʼilani a-snebʼ-e yajel sbʼaje perdon bʼa oj ajyuke gusto ja bʼa snupaneleʼi. Kʼuman ja Efesios 4:31, 32; 5:22-25, 33 sok 1 Pedro 3:7.

Ta bʼa yojol ja wa nupanel wan ekʼel wokol, anto leʼawik modo bʼa laman sok lajan bʼa tsamalxta oj atojbʼesex (1 Corintios 13:4, 5). Ja Yabʼal ja Dyosi mi wa xyala a-spil sbʼaje jun nupanel kechanta yuj jun yal chʼin wokol. Kʼuman ja 1 Corintios 7:10-13.

Jyoba wa skʼana ja untiki aʼajyuke gusto, ja yuj wa xyaʼa lekil rasonik sbʼa jastal oj yabʼye stsamalil ja sakʼanileʼi. Yuja untiki mito jel snaʼawe ja bʼa sakʼanileʼi, tʼilani oj snebʼ-e sbʼaja snantateʼi (Colosenses 3:20). Chomajkil, ja Jyoba wa skʼana ayabʼye stsamalil yaʼteltajel sbʼa Yeʼna soka Yunini. Kʼuman ja Eclesiastés 11:9–12:1 sok Mateo 19:13-15; 21:15, 16.

Ja nantataliki tʼilani oj aʼtuke bʼa oj ya yi swaʼel, snaj sok skʼu ja yuntikileʼi (1 Timoteo 5:8). Pe chomajkil tʼilan a-sjeʼe yi syajtajel sok snochjel ja lekil smodo ja Dyosi (Efesios 6:4). Ja untikali ojni kʼot man skʼujole yajni wa xyilawe ja smodo ja snantati sbʼaja janekʼ wa syajtaye ja Dyosi. Yajni ja rasonik wa xyaʼawe ti elel bʼa Yabʼal Dyos, ojni koltajuk ja untiki bʼa oj tukbʼuk ja smodoʼe soka spensare. Kʼuman ja Deuteronomio 6:4-7 sok Proverbios 22:6.

Ja untiki wa skʼana stsatsankʼujolajel sok stoyjel yuja jastik lek wa skʼulaneʼi. Chomajkil, ayni ekʼele wa skʼanawe stojele bʼa jachuk mok skʼuluke jun jas junuk bʼa oj sjom ja sakʼanile sok bʼa mixa gusto oj ajyuke (Proverbios 22:15). Pe ja tojwanel jaw mini jelxeluka ma ixta ilwanel. Kʼuman ja Colosenses 3:21.

Ja taʼumantiʼ jumasaʼ bʼa Jyoba yaʼuneje el jitsan juʼunik sbʼaja nantatalik soka untiki bʼa oj koltajuke. Spetsanil ja juʼunik it ti nake elel bʼa Biblia. Kʼuman ja Salmo 19:7, 11.