Soka yintil ja awel Abrahán, ja Dyosi xchapa jun xchonabʼ sok ya yi mandarik bʼa oj skʼuʼuke. Ja chonabʼ it sbʼiʼilan «Israel» sok yeʼnle ni kʼot skʼel-e sbʼaja relijyon smeranili sok ja smandarik ja Dyosi (Salmo 147:19, 20). Yuja it, ja ixuk winik bʼa yibʼanal ja luʼumi wani xbʼobʼ staʼ slekilale. Kʼuman ja Hechos 3:25.

Ja Dyos stsaʼa ja israʼelenyo jastal staʼumantiʼ, matik xcholowe ja smeranil sbʼaja Yeʼn (Isaías 43:10). Ja jas ekʼ sok ja israʼelenyo wa sjeʼa skʼuʼajel ja smandarik ja Dyosi lekni wa xwajkujtika (Deuteronomio 4:6). Stsʼakatal yuja skʼuʼane ja israʼelenyo, jitsan wa xbʼobʼ kʼot snaʼe ja smeranil sbʼaja Dyosi. Kʼuman ja Isaías 43:12.

Soka tyempo, ja israʼelenyo xchʼayawe ja jastal wa xyila sbʼaje soka Jyoba, soka Yeʼn stsaʼa pilan xchonabʼ (Mateo 21:43; 23:37, 38). Ja bʼa jtyempotiki, ja maʼ meran wa xyaʼteltaye ja Jyoba jani ja matik wa xcholowe ja smeranil sbʼaja Yeʼn jastal staʼumantiʼ sok mixa jaʼuk ja israʼelenyo. Kʼuman ja Hechos 15:14, 17.

Ja Jesusi xchapakan ja snebʼumaniki bʼa oj xchol-e ja lekil rasoni sok yajel paxuke nebʼumanik ja ixuk winik bʼa spetsanil ja luʼumi (Mateo 10:7, 11; 24:14; 28:19, 20). Ja bʼa tsaʼanxta kʼakʼu ayotiki, ja aʼtel it wanxa stajel kʼot ja stikʼanili. Ja yujil, ja Jyoba wani stsomjeljan jitsan mil ixuk winik bʼa tuktukil chonabʼ bʼa oj ochuke ja bʼa relijyon smeranili (Apocalipsis 7:9, 10). Yuja tsoman sok chapan aye ja meran nebʼumaniki, wani xbʼobʼ stsatsankʼujoluke sok skoltajel ja tuki. Ja bʼa stsomjeleʼi junxta snebʼjel yiʼoje bʼa yibʼanal ja luʼumi. Kʼuman ja Hebreos 10:24, 25.

Bʼa jabʼil 1870, jun yal kʼole ixuk winik wa spaklaye ja Biblia kʼot yabʼye stojolil jastik bʼa Biblia bʼa jitsan xa tyempo nakʼan ay ajyi. Ja yeʼnle wani snaʼawe ja Jesús xchapa ja snebʼumaniki bʼa xcholjel ja lekil rasoni, ja yuj ja yeʼnle kʼeye soka aʼtel bʼa yibʼanal ja luʼumi xcholjel sbʼaja sGobyerno ja Dyosi. Bʼa jabʼil 1931 aji sbʼiʼiluke taʼumantiʼ jumasaʼ bʼa Jyoba. Kʼuman ja Hechos 1:8; 2:1, 4, 11; 5:42.

Ja bʼa bʼajtan siglo, ajyi jun tsome tojwanum bʼa chapane lek wa skʼelawe ja tuktukil kongregasyonik bʼa yibʼanal ja luʼumi. Ja yeʼnle wani skisawe ja Jesús jastal Olomal ja bʼa kongregasyoni (Hechos 16:4, 5). Junxta ni ja bʼa jkʼakʼujtiki, ay jun Tsome Tojwanum wa skʼelawe ja aʼtel wa skʼulane ja taʼumantiʼ jumasaʼ bʼa Jyoba bʼa tuktukil naʼits yiʼoje bʼa yibʼanal ja luʼumi. Ja bʼa naʼitsik it ti wa sutxi, wa x-eli sok wa sjekawe ja juʼunik jastal it bʼa mas ja 600 kʼumalik. Ja Tsome Tojwanumik it wa xyawe makunuk ja Biblia bʼa stsatsankʼujolajel sok stojel bʼa mas ja 100 mil kongregasyonik bʼa sutanal ja luʼumi. Bʼa jujune ja kongregasyonik it ay olomalik bʼa chapan aye. Ja winike it yajxta wa stalnaye ja xchejik ja Dyosi. Kʼuman ja 1 Pedro 5:2, 3.

Junxta jastal snebʼumanik ja Jesusi, ja taʼumantiʼ jumasaʼ bʼa Jyoba chapubʼale bʼa xcholjel ja lekil rasoni bʼa naʼits naʼits sok yajel och nebʼumanik (Hechos 20:20). Chomajkil wa xyaʼawe sjeʼjel bʼa Biblia sbʼaja spetsanil ja matik wa skʼanawe oj snebʼ-e ja smeranil sbʼaja Dyosi. Pe mi kechanta tsoman aye sok chapan aye, chomajkil jun pamilyaʼe sok yeʼnani ja Jyoba wa xtojwani, jastal jun tatal bʼa jel ja syajal skʼujoli. Spetsanil wa xyila sbʼaje jastal smoj-alijel sbʼaje sok wa syajtay sbʼaje (2 Tesalonicenses 1:3). Ja yuj, ja xchonabʼil ja Jyoba tsoman aye sok chapan aye bʼa skoltajel ja tuki, ja yeʼnle aye jastal jun pamilya bʼa jel gustoʼaye ja bʼa luʼumi. Kʼuman ja Salmo 33:12 sok Hechos 20:35.