Ja wokoliki sok ja jastik mi lekuki och ja bʼa Luʼumi yajni ja Satanás sleʼa ja bʼajtan abʼali. Ja bʼajtanto, juni lekil anjela, pe mini ajyi toj ja bʼa «smeranili» (Juan 8:44). Takal takal kʼe kʼankʼunuk skʼujol aʼajuk yi yeʼna ja toyjelal kechanta wa sbʼajin ja Dyosi. Ja Satanás tsamalxta sloʼlay ja Eva, ja bʼajtan ixuki, bʼa yeʼn akʼuʼajuk mi jaʼuk ja Dyosi. Cha junxta skʼulan ja Adani, sok xchawanile skʼokowe ja smandar ja Dyosi. Jachuk och ja wokoliki soka chamelchʼakeli. Kʼuman ja Génesis 3:1-6, 19.

Yajni ja Satanás ya kʼokxuk ja Eva a-skʼok ja smandar ja Dyosi, ti tiw kʼe sjeʼ sbʼaj jun kontraʼanum sbʼaja Dyos maʼ jel Niwan juntiro. Jitsan ixuk winik wa sjeʼawe jaʼ wa snochowe ja Satanás yuja mi skʼana akʼulajuke mandar yuja Jyoba, ja yuj ja Satanás yeʼna ni «ja yajwalil ja mundo iti». Kʼuman ja Juan 14:30 sok 1 Juan 5:19.

Spetsanil ja jastik skʼuluneji tojbʼel ni leka. Ja Dyosi skʼulan ja bʼajtan ixuk winiki soka anjeliki bʼa jun modo oj bʼobʼ skʼuʼuke yi toj lek (Deuteronomio 32:4, 5). Ja Yeʼn skʼulanotik bʼa jun modo oj jtsatik ta wa xkʼana jkʼuluktik ja bʼa leki maʼ ja bʼa mi lekuki. Soka bʼa stsajel oj jkʼuluktiki ti wa x-ilxi ta wa xyajtaytik ja Dyosi ma miyuk. Kʼuman ja Santiago 1:13-15 sok 1 Juan 5:3.

Kechan xta tʼun tyempo yaʼunejkan ja Jyoba aʼiljuk kontra ja sderecho bʼa kechanta yeʼn oj ya mandari. ¿Jas maʼ yuj? Bʼa oj ya chiknajuk mini jun gobyerno oj yaʼ yi slekil ja ixuk winiki ta mi teyuk ja skoltanel ja Yeʼn (Eclesiastés 7:29; 8:9). Ja wake mil jabʼil ekʼelxaʼi wa sjeʼa jaman lek ja ixuk winiki mini lekuk ja smandareʼi yujni mi xbʼobʼ xchʼaye snajel ja kʼakʼaneli, ja milwaneli,  ja chameliki soka bʼa mi tojuki. Kʼuman ja Jeremías 10:23 sok Romanos 9:17.

Pe ta kaʼatikan ja Dyos ayaʼotik mandar, ojni ya jlekilaltik (Isaías 48:17, 18). Xmojojixtajan ja Jyoba oj xchʼaysnajel spetsanil ja gobyernoʼik bʼa Luʼumi, sok kechanta oj kanuke sakʼan ja ixuk winik matik kʼuʼabʼal aye soka sGobyerno ja Dyosi (Isaías 11:9). Kʼuman ja Daniel 2:44.

Kʼela ja bideo ¿Jas yuj ja Dyos wanto yajelkan aʼekʼuk wokolik?

Ja Satanás wa xyala kechanta wa xkaʼteltaytik ja Jyoba yajni lek wa xwajkujtiki. Pe, ¿oj maʼ bʼobʼ jeʼtik mi meranuk ja jas wa xyala? Ojo. Ja spasensya yiʼoj jmoktik ja Dyosi wa xbʼobʼ jeʼtik ta wa xkʼanatik Yeʼn ayaʼotik mandar ma jaʼa gobyernoʼik bʼa Luʼumi. Ja it wa xjeʼatik soka jmodotiki. Kʼuman ja Job 1:8-12 sok Proverbios 27:11.

Wa xjeʼatik jaʼ wa xkʼana ayaʼotik mandar ja Dyosi yajni wa xleʼatik, wa xkʼulantik ja jas wa xnebʼatik ja bʼa relijyon smeranili, ja smeranil it ti wa xtaʼatik bʼa Yabʼal ja Dyosi, ja Biblia (Juan 4:23). Jastal ni skʼulan ja Jesusi, wa xcha jeʼatik mi xkʼanatik ayaʼotik mandar ja Satanasi yajni mi xchʼika jbʼajtik ja bʼa politika soka bʼa kʼakʼaneli. Kʼuman ja Juan 17:14.

Satanás wa xya makunuk jitsan jastik junuk bʼa oj skʼuluke ja ixuk winik jastik junuk bʼa mi lekuk sok wa x-ixtalaji ja sakʼanileʼi. Bʼobʼta jujuntik kamigotik ma jpamilyatik ojni stseʼlayotik ma oj ya wokolanukotik yuja mi xkʼulantik ja jastik junuk it (1 Pedro 4:3, 4). ¿Jas maʼ oj jkʼuluktik ta ekʼ jbʼajtik ja it? ¿Oj maʼ och jmojtaytik ja matik wa syajtaye ja Dyosi? ¿Sok oj maʼ jkʼuʼuktik ja lekil smandariki? Ta jachʼ jkʼulantik, ojni jeʼtik mi meranuk ja jas yala ja Satanás jaʼita wa xkaʼteltaytik ja Dyos yajni lek wan wajel kujtiki. Kʼuman ja 1 Corintios 6:9, 10; 15:33.

Ja syajal skʼujol jmoktik ja Dyosi skʼapunej oj xchʼaysnajel ja wokoliki soka jastik mi lekuki. Spetsanil ja matik wa skʼuʼane sok wa skʼana aʼajuke mandar yuja Dyosi ojni yabʼye stsamalil ajyel sakʼan bʼa tolabida ja bʼa Luʼumi. Kʼuman ja Juan 3:16.