XETʼAN 6
¿Ayto maʼ jas wa smajlaye ja matik chamele xa?
1. ¿Jas maʼ wa smajlaye ja matik chamele xa?
Ayxa chane kʼakʼu chamel ja yamigo ja Jesús, ja Lázaro, yajni kʼot ja bʼa Betania, jun yal chʼin chonabʼ mojan yiʼoj ja Jerusalén. Ja yeʼn waj ja bʼa kʼeʼeni soka smoj-alijel ja chamwiniki, ja Marta soka María. Mi albʼi, jitsan kʼe stsom sbʼaje. ¿Pensaraʼan janekʼto maʼ gustoʼaxi ja Marta soka María yajni Jesús ya sakʼwuk ja Lázaro? Kʼuman ja Juan 11:21-24, 38-44.
Ja Marta wanxa ni snaʼa ja jasa skʼapunej ja Jyoba bʼa oj sakʼwukejan ja matik chamele xa bʼa oj ajyuke sakʼan bʼa Luʼum. Kʼuman ja Job 14:14, 15.
2. ¿Jastal maʼ wa xtaxye ja matik chameleʼi?
Ja Dyosi yala yabʼ ja Adani: «Bʼobʼela sok tsʼubʼil luʼum sok cha tsʼubʼil luʼum oj paxan» (GÉNESIS 3:19)
Ja ixuk winiki bʼobʼele sok tsʼubʼil luʼum (Génesis 2:7; 3:19). Ja yuj, mini ay jas wa x-eli ma wa xkan sakʼan ja yajni ay maʼ wa xchami. Yajni wala chamtiki, mixa jas xnaʼatik. Yajni sakʼwi ja Lázaro, mi xcholo sbʼaja jastal wajyuj ja yajni chamel ayi, yujni mixa to jas snaʼa. Kʼuman ja Salmo 146:4 sok Eclesiastés 9:5, 6, 10.
¿Wan maʼ xya yiʼ wokol ja Dyos bʼa yoj kʼakʼ ja ixuk winik matik chamele xa? Ja Biblia wa xyala ja matik chameleʼi mixa to jas wa snaʼawe. Ja yuj, mini tʼun meranuk ja skʼuʼajel sbʼaja yijel wokol bʼa yoj kʼakʼi. Ja skʼuʼajel iti wani x-abʼaltaji ja Dyosi. Jaʼita soka spensarajel ay maʼ wan yijel wokol ja bʼa yoj kʼakʼi, wa xyijnay ja Dyosi. Kʼuman ja Jeremías 7:31.
Kʼela ja bideo ¿Jastal maʼ wa xtaxye ja matik chameleʼi?
3. ¿Wan maʼ xbʼobʼ skʼumukotik ja chamwiniki?
Ja chamwiniki mixa xyabʼye kʼinal sok mi xbʼobʼ kʼumanuke (Salmo 115:17). Jujuntik anjelik skʼokowe ja smandar ja Dyosi, sok yeʼnle wa skʼulan sbʼaje ja chamwiniki bʼa oj skʼumuke ja ixuk winiki sok bʼa oj yawe skʼuʼuk mi meran wala chamtik (Judas 6). Ja Jyoba mini tʼun skʼana sjobʼjel yi ja chamwiniki. Kʼuman ja Deuteronomio 18:10, 11.
4. ¿Machʼtik oj sakʼwukejan?
Oj sakʼwukejan jitsan mil chamwinik bʼa oj ajyuke sakʼan bʼa Luʼum. Soka matik skʼulane ja bʼa mi lekuki yuja mi snaʼawe sbʼaja Dyosi, ojni cha sakʼwukejana. Kʼuman ja Lucas 23:43 sok Hechos 24:15.
Ja matik oj sakʼwukejani oj bʼobʼ snebʼ-e ja smeranil sbʼaja Dyosi sok oj bʼobʼ sjeʼe wa skʼuʼane bʼa Jesús ta kʼuʼabʼal ajyiyeʼi (Apocalipsis 20:11-13). Ta skʼulaneʼi, oj bʼobʼ ajyuke sakʼan bʼa tolabida ja bʼa Luʼumi. Kʼuman ja Juan 5:28, 29.
5. ¿Jasa wa sjeʼakitik ja Jyoba yuja oj ajyuk jun sakʼwelali?
Wa sjeʼakitik ja syajalskʼujoli soka janekʼ wa skʼanawotiki. Stsʼakatal yuja sjekakon ja Yunin bʼa jak cham yuja jmultiki, jachuk wa xbʼobʼ jipjkʼujoltik ojni sakʼwukejan ja matik chameleʼi. Yajni xkʼot smeranil ja it, ¿machʼa waxa kʼana oj awile? Kʼuman ja Juan 3:16 sok Romanos 6:23.
