XETʼAN 2
¿Machunkiluk ja Dyosi?
1. ¿Jas yuj kechanta oj jtoytik ja Dyosi?
Ja Dyosi kechanta yeʼn ja Kʼuluman bʼa spetsanil ja jastik junuki. Ja yeʼn tolanibida ajyel sakʼana sok tolanibida oj ajyuka (Salmo 90:2). Ja lekil yaljelik wa xtaʼatik bʼa Biblia tini naka jakel bʼa Dyos (1 Timoteo 1:11). Yuja yeʼnani ja Dyos yaʼunej ja jsakʼaniltiki, kechantani yeʼn oj kaʼteltaytik sok oj katik yi stoyjel. Kʼuman ja Apocalipsis 4:11.
2. ¿Jastal maʼ ja Dyosi?
Mini jun maʼ yilunej ja Dyosi yujni ja yeʼn jachʼ jastal jun ikʼ ason, ja it jun tikʼe sakʼanil mas chaʼanyabʼalil yuja keʼntiki (Juan 1:18; 4:24). Pe wa xbʼobʼ jnatik jastal ja smodo ta och jpensaraʼuktik sbʼaja jastik naka skʼuluneji, ja tuktukil tekʼul soka nichimik skʼuluneji wa sjeʼa ja syajal skʼujoli soka sbiboʼili. Chomajkil, ja sniwanil ja sutsatkʼinali wa sjeʼa jel juntiro ja yipi. Kʼuman ja Romanos 1:20.
Pe masni wa xbʼobʼ jnebʼtik sbʼaja Dyosi ta wa xkʼumantik ja Biblia. Ja juʼun it wa xyalakabʼtik ja jastik lek wa xyila soka bʼa mi lek xyila, soka smodo wa sjeʼa sbʼaja tuktukil jastik wa x-ekʼ ma wa xkʼulaxi ja bʼa luʼumi. Kʼuman ja Salmo 103:7-10.
3. ¿Ay maʼ sbʼiʼil?
Ja Jesús yala: «Jtatatikon ti aya bʼa satkʼinali. Aʼaxa najuk sbʼaj jawa bʼiʼili» (Mateo 6:9, YD). Anima jitsan ixuk winik tuktukil ja sbʼiʼil wa xyawe yi ja Dyosi, ay jun mero sbʼiʼil. Bʼa tuktukil kʼumal wa xtukbʼi ja stsʼijbʼajeli, pe junxta ni bʼiʼilala. Jun sjeʼjel, ja bʼa tojol-abʼali wa x-alxi «Jyoba», pe tuk wa xcha yalawe ja bʼiʼilal it «Yavé». Kʼuman ja Salmo 83:18 (bʼa tuk Biblia Salmo 82:19).
Bʼa jitsan Biblia kusubʼal ele ja mero sbʼiʼil ja Dyosi sok xchʼikuneje «Ajwalal» ma «Dyos». Pe yajni tsʼijbʼaxi ja Biblia, ja sbʼiʼil ja Dyosi wa xtax jun juke mil ekʼele. Jesús ya makunuk ja mero sbʼiʼil ja Dyosi yajni xcholo yabʼ ja ixuk winiki. Kʼuman ja Juan 17:26.
Kʼela ja bideo ¿Ay maʼ jun sbʼiʼil ja Dyosi?
4. ¿Wan maʼ xchamskʼujol jmoktik?
Jastal ja tatal it jel xyajtani, ja Dyosi wani xchamskʼujol ja yajni wa x-ekʼ jbʼajtik wokoli
Ta meran wa syajtayotik ja Dyosi, ¿anto jas yuj mi jas skʼulan soka wokolik wa x-ekʼ jbʼajtiki? Jujuntik wa xyalawe ja Dyosi wa xya kiʼtik wokol bʼa oj ya ochkotik probar, pe ja jaw mi meranuk. Kʼuman ja Santiago 1:13.
Jyoba yaʼunejkan bʼa oj jtsatik ta wa xkʼana oj kaʼteltaytik ma miyuk, sok jani mas lek ta jtsaʼatik yaʼteltajeli (Josué 24:15). Pe jitsan wa xyawe makunuk ja it bʼa skʼulajel jastik junuk bʼa mi lekuk, ja yuj jel ja wokoliki. Ja Jyoba jelni x-och stristeʼil yuja jastik mi lek wan ekʼeli. Kʼuman ja Génesis 6:5, 6.
Ja yeʼn jun Dyos jel wa xchamskʼujol jmoktik, sok wa skʼana oj kabʼtik stsamalil ja bʼa jsakʼaniltiki. Xmojojixtajan oj xchʼaysnajel ja wokoliki soka matik wa skʼulani. Pe ja Jyoba ayiʼoj rasonik yuja wanto xyaʼakan aʼekʼuk ja wokoliki. Bʼa xetʼan 8 ti oj xcholkabʼtik jas yujil. Kʼuman ja 2 Pedro 2:9; 3:7, 13.
5. ¿Jastal maʼ oj bʼobʼ mojxukotiksok?
Ja Jyoba wa slokowotik bʼa oj mojxukotiksok bʼa orasyon, pes wani xchamskʼujol bʼa jujuneʼotik (1 Juan 5:14). Ja yeʼn wani xyila ja janekʼ wa xkipantay jbʼajtik bʼa oj kaʼteltaytiki, sok wa skʼana oj ya ekʼuk ja jmultiki, anima ay ekʼele wa xkʼojchin koktik. Sok ama mulanumotik, ojni bʼobʼ mojxukotik soka Dyosi. Kʼuman ja Salmo 103:12-14 sok Santiago 4:8.
Yuja Jyoba yaʼa ja jsakʼaniltiki, tʼilani oj jyajtaytik mas ja yeʼn yuja tuk ixuk winiki (Marcos 12:30). Wa xjeʼatik wa xyajtaytik yajni wa xnebʼatik sbʼaja yeʼn sok wa xkʼuʼantik ja smandari. Skʼulajel ja it, wa skoltayotik bʼa oj mojxukotik mas soka Dyosi. Kʼuman ja 1 Timoteo 2:4 sok 1 Juan 5:3.
