Ja Dyosi wa sloko spetsanil ja ixuk winik bʼa amojxuke soka yeʼn bʼa orasyon (Salmo 65:2). Pe ja it mi wa stojolan spetsanil orasyon wa smaklay. Jun sjeʼjel sbʼaja iti jaʼa yajni jun winik ixta wa xyila ja xcheʼumi, yuj ja jachʼ wa skʼulani ja yorasyoni mini xbʼobʼ kʼotuk ja bʼay ja Dyosi (1 Pedro 3:7). Ja bʼa tyempo najate, ja Dyosi mini smaklay ja yorasyone ja israʼelenyo yajni ja yeʼnle mi xyaʼawekan skʼulajel ja bʼa mi lekuki. Ja yuj, jaman lek wa xkilatik ja orasyoni jelni chaʼanyabʼalila. Ja Dyosi wani smaklay ja yorasyon ja mulanumi, pe jaʼ ta snaʼa malaya sok mixa skʼulani. Kʼuman ja Isaías 1:15; 55:7.

Ja yajel orasyoni ti chʼikan ja bʼa stoyjelal wa xkatik yi ja Jyoba, ja yuj kechantani yeʼn oj katik yi orasyon (Mateo 4:10; 6:9). Yuja mulanumotiki, tʼilan oj katik yi orasyon bʼa sbʼiʼil ja Jesús yujni cham yuj jmul keʼntik (Juan 14:6). Ja Jyoba mi skʼana oj jkʼuluktik ja korasyontik jachʼ tsʼijbʼunubʼal bʼa jun juʼun ma junxta ja jas oj kaltiki. Ja Yeʼn wa skʼana ja orasyon oj jkʼuluktiki aʼeluk masan bʼa jkʼujoltik. Kʼuman ja Mateo 6:7 sok Filipenses 4:6, 7.

Ja Jyoba wani smaklay ja orasyon wa xkʼulantiki ama kechan wan kʼumal ja jkʼujoltiki (1 Samuel 1:12, 13). Ja Yeʼn wa slokowotik bʼa oj katik yi orasyon chikan jas ora, yajni wala kʼetik ja bʼa saʼan sakbʼeli soka yajni wa xwaj waykotiki, yajni ojxa och waʼkotiki soka yajni wan ekʼel jbʼajtik wokol. Kʼuman ja 1 Pedro 5:7 sok Mateo 15:36.

Mojxel soka Dyosi wokolniʼa, pes ayotik bʼa jun tyempo sbʼaja ixuk winik mi skʼuʼane bʼa Dyos sok wa stseʼlaye sbʼaja jas  skʼapunej oj ajyuk slamanil ja bʼa Luʼumi (2 Timoteo 3:1, 4; 2 Pedro 3:3, 13). Ja yuj stʼilanil ni oj jtsom jbʼajtik soka tuki bʼa oj tsatsankʼujolan jbʼajtik. Kʼuman ja Hebreos 10:24, 25.

Smojtajel ixuk winik matik wa syajtaye ja Jyoba ojni skoltayotik bʼa oj jmoxukotik soka yeʼn. Ja tsomjelalik wa skʼulane ja taʼumantiʼ jumasaʼ bʼa Jyoba wa skoltayotik bʼa oj jtsatsankʼujolan jbʼajtik soka tuki. Kʼuman ja Romanos 1:11, 12.

Oj bʼobʼ mojxukotik soka Jyoba spensarajel ja bʼa jasa jnebʼunejtik ja bʼa Yabʼali, ja bʼa jastik skʼuluneji, ja bʼa srasoniki soka jas skʼapunejkitik oj skʼuluki. Yajni wa xpensaraʼantik ja it sok wa xtaʼatik tiʼal ja bʼa korasyontiki, oj skoltayotik bʼa oj kabʼtik stojolil ja niwan syajal skʼujol ja Jyoba soka sbiboʼili. Kʼuman ja Josué 1:8 sok Salmo 1:1-3.

Wa xbʼobʼ mojxukotik soka Dyosi ta wa xjipa jkʼujoltik sok ta wa xkʼuʼantik bʼa yeʼna. Skʼuʼajel jachʼ jastal jun yal nichim bʼa tikʼanxta wa skʼana yaʼalel bʼa oj ajyuk sakʼan. Junxta soka skʼuʼajeli, jelni tʼilan oj katik tsatsbʼuk masa, ¿pe jastal maʼ? Jani yajni wa xpaklaytik sbʼaja skʼuʼajel kiʼojtiki bʼa yabʼjel stojolil. Kʼuman ja Mateo 4:4 sok Hebreos 11:1, 6.

Jyoba wa stalnay ja matik wa xyajtajiyuji. Ja Dyosi wa skoltayotik soka jastik wa xbʼobʼ yixtalaʼuk ja jastal wa xkila jbʼajtik soka yeʼn soka stajel ja jsakʼaniltik bʼa tolabida (Salmo 91:1, 2, 7-10). Ja Jyoba wa xyala kabʼtik sbʼaja modoʼalik bʼa wa yixtalaʼan ja jsakʼaniltiki sok bʼa mi xya ajyukotik gusto. Chomajkil, ja Yeʼn wa sjeʼakitik jastal oj kitik jun lekil jsakʼaniltik. Kʼuman ja Josué 1:8 sok Santiago 4:4, 8.