Ja Dyos maʼ skʼulan yibʼanal ja jastik junuki, masni jel bibo yuja keʼntiki. Jastal jun tatal bʼa jel ja syajal skʼujoli wa xchamskʼujol jmoktik. Mi skʼulanotik bʼa keʼnta oj kil jas oj jkʼultik, skʼulanotik bʼa yeʼn a-stoj ja jsakʼaniltiki (Jeremías 10:23). Jastal jun yal untik wa skʼana a-tojuk yuja snantati, chomajkil ja keʼntiki wa xkʼanatik a-stojotik ja Dyosi. Ja rasonik bʼa Biblia bʼa wa stojo ja jsakʼaniltiki juni majtanal jakel bʼa Dyos. Kʼuman ja Isaías 48:17, 18 sok 2 Timoteo 3:16.

Ja leyik, mandarik ma rasonik bʼa Jyoba wa sjeʼakitik jastal oj kitik jun lekil jsakʼaniltik ja bʼa jtyempotiki soka jastik lekilal oj koʼ jbʼajtik ja bʼa tyempo jakumto. Yuja yeʼnani skʼulanotik, kechantani yeʼn yiʼoj ja derecho bʼa oj jkʼuʼuktik yi gusto lek. Kʼuman ja Salmo 19:7, 11 sok Apocalipsis 4:11.

Naka sjeʼjelik jel tʼilan bʼa oj jnatik jas oj jkʼuluktik bʼa tuktukil ekʼele. Jaxa leyiki mas bʼa jun ita jasunuk sok jaman lek ja jas wa xyala (Deuteronomio 22:8). Yajni ay jas wan ekʼel jbʼajtiki, jel tʼilan oj jpensaraʼuktik ja rason bʼa Biblia bʼa oj jnatik jas oj jkʼuluktik (Proverbios 2:10-12). Ja Biblia wa sjeʼa ja jsakʼaniltiki jun majtanal ti jakel bʼa Dyos. Soka rason it wa skoltayotik bʼa oj jtalnay jbʼajtik ja bʼa kaʼteltiki, ja bʼa jnajtiki soka yajni wajumotik bʼa bʼeji. Kʼuman ja Hechos 17:28.

Ja Jesús staʼa tiʼal chabʼ mandar jel tʼilan. Ja bʼajtani wa sjeʼa jas sbʼej ja kʼulajitiki: jaʼ bʼa oj jnatik sbʼaj ja Dyosi, bʼa oj jyajtaytik sok bʼa oj kaʼteltaytik toj lek. Tʼilani oj kaʼ tʼabʼan jkʼujoltik ja mandar it bʼa spetsanil ja jastik wa xkʼulantiki (Proverbios 3:6). Soka matik wa snochowe ja mandar it bʼa  Biblia ojni yamigoʼuke ja Dyosi, oj ajyuke gusto sok jun sakʼanile bʼa tolabida. Kʼuman ja Mateo 22:36-38.

Ja xchabʼil mandari wa skoltayotik bʼa oj ki jbʼajtik lek soka tuki (1 Corintios 13:4-7). Yajel makunuk ja mandar it jani wantik snochjel ja smodo ja Dyosi sbʼaja jastal wa xyila ja ixuk winiki. Kʼuman ja Mateo 7:12; 22:39, 40.

Ja rasonik bʼa Biblia wa sjeʼa jastal oj syajtay sbʼaje sok aʼajyuke tsoman gusto ja pamilya (Colosenses 3:12-14). June ja bʼa rasonik it wa skoltay ja pamilya, pes wa sjeʼa sbʼaja nupaneli sbʼajni tolabidaʼa. Kʼuman ja Génesis 2:24.

Snochjel ja rasonik bʼa Biblia wa skoltayotik ja bʼa aʼteli sok kulan kʼujol wa xya ajyukotik. Jun sjeʼjel, yajni ay maʼ wa sleʼa yaʼtum, jani wa skʼana ja matik wa skʼuʼane ja rasonik bʼa Biblia, pes mini x-och skʼabʼe sok wa skʼujolane ja yaʼteleʼi (Proverbios 10:4, 26; Hebreos 13:18). Ja Yabʼal ja Dyosi wa sjeʼakitik aʼajyukotik gusto soka janekʼ kiʼojtiki sok jani yajel bʼajtan bʼej ja jastal wa xkila jbʼajtik soka Dyosi. Kʼuman ja Mateo 6:24, 25, 33 sok 1 Timoteo 6:8-10.

Snochjel ja rasonik bʼa Biblia wani stalnayotik ja bʼa jsakʼaniltiki (Proverbios 14:30; 22:24, 25). Pensaraʼan ja it, yajni wa xkʼuʼantik ja smandar ja Dyos sbʼaja yujel tragoʼi; mi jel la kotik chamel, mi x-ekʼ jbʼajtik jastik junuk bʼa oj syajbʼesotik ma oj smil-otik (Proverbios 23:20). Lekni yujel tʼusana, pe ja Jyoba mini lek xyila ta jelxikujtiki ma ta yakbʼitiki (Salmo 104:15; 1 Corintios 6:10). Ja mandarik bʼa Dyosi wa skoltayotik ja bʼa jmodotiki soka jastik wa xpensaraʼantiki (Salmo 119:97-100). Ja meran snochumane Kristo mi kechan wa skisawe ja rasonik bʼa Biblia bʼa slekilal yeʼnle, wa skʼulane ja it bʼa stoyjel ja Jyoba. Kʼuman ja Mateo 5:14-16.