LEK jun winik wa xkʼot bʼa wa naj, pe ja s-olomi wa xkʼot man yolom naʼits, ¿jas oja wal? ¡Ja yeʼn juni chaʼanil winika! Ajyini jun tyempo ja bʼa Luʼumi ajyi winike jastal jaw. Ja Biblia wa xyala ja stat ja winike jaw anjel jumasaʼ koʼele kon bʼa satkʼinal. Pe ¿jastal modo ekʼ ja jaw?

Ajuluk akʼujol, ja Satanasi, ja anjel mixa lekuk ja skʼujoli, wan snikjel ja ixuk winikeʼi bʼa oj skʼuluke ja bʼa mi lekuki. Ja yeʼn wani sleʼjel modo bʼa oj cha ya skʼul jastik junuk bʼa mi lekuk ja tuk anjel jumasaʼ bʼa Dyosi. Soka tyempo, jujuntik anjel kʼe smaklaye ja jas wa xyala ja Satanasi. Ja yeʼnleʼi sjipawe kan ja aʼtel akʼubʼalyile yuj ja Dyosi ja bʼa satkʼinali. Jakye bʼa Luʼum sok skʼulane skwerpoʼe jastal bʼa winik. ¿Wan maʼ xa naʼa jas xchol yujile?

Ja Biblia wa xyala yujbʼi ja anjel jumasaʼ it yilawe ja tsamal ixuke ay bʼa Luʼumi sok wanbʼi xkʼan ajyuke sok sakʼan smoke il bʼa luʼum. Ja yuj ja yeʼnleʼi koye koni sok nupaniye sok ja ixuke jaw. Ja Biblia wa xyala ja jas skʼulaneʼi mini tʼun lekuka, ja Dyosi skʼulan ja anjel jumasaʼ bʼa ti oj ajyuke sakʼan bʼa satkʼinal.

Ja anjel jumasaʼ it yila yuntikile soka xcheʼumeʼi. Pe ja splanta ja yuntikileʼi mini oj slaj ja bʼa tuk yal alatsika. Yajni pojkiyetʼani bʼobʼta mi jel chikanuk ta jel tuke. Pe kʼiye kʼiye sok kʼe ajyuk lek jitsan yipe, man chaʼanik lek sok niwakik winik wajye.

Ja chaʼanil winike jaw mini tʼun lekuk ja smodoʼeʼa. Yuja jel niwaneʼi sok jel ja yipeʼi, ixta wa xyilawe ja tuki. Tarega wa stʼenawe ja tuki bʼa oj snoch-e ja kistal smodoʼeʼi.

Ja bʼa tyempo jaw mixani sakʼanuk ja Enoki, pe ajyi jun winik ja bʼa Luʼumi wa skʼulan ja bʼa leki. Ja winik jaw sbʼiʼilan Noé. Ja yeʼn skʼulan ja jas wa skʼana ja Dyosi.

Jun kʼakʼu, ja Dyosi yala yabʼ ja Noeji kʼotabʼi ja skʼakʼujil bʼa oj xchʼayel snajel ja ixuk winike wa skʼulane bʼa mi lekuki. Pe ja Dyosi yala ojbʼi yakan sakʼan ja Noeji soka spamilya sok jitsan chanteʼik. La kiltik jastal skʼulan ja Dyosi.