KʼELAWIL jas wan ekʼel. Ja Adán soka Eva wane ajel eluk ja bʼa tsamal kʼachinubʼ bʼa Edeni. ¿Jas yuj wane ajel eluki?

Yujni skʼulane jun jas junuk bʼa mini tʼun lekuk. Ja yuj ja Jyobaji wan yajel eluke ja bʼa lugar it. ¿Wan maʼ xa naʼa ja jas skʼulaneʼi?

Skʼulane jun jas junuk yalunej ja Dyosi mok skʼuluke. Ja Dyosi yala yabʼye oj bʼobʼ sloʼe spetsanil ja sat teʼ jumasaʼ bʼa tsamal kʼachinubʼi. Pe ja sat jun teʼ, ja Dyosi, yala mok sloʼe, ta sloʼowe kʼa ojni chamukeʼa. Ja teʼ it kechantani yeʼn sbʼaj ja Dyosi. Ja keʼntiki wani xnaʼatik mi lekuk syamjel jun jas junuk bʼa mi jbʼajuktik. Anto, ¿jasa ekʼi?

Jun kʼakʼu ja Eva stuchʼil ay ekʼ bʼa yojol ja tsamal kʼachinubʼi yajni kʼumaji yuj jun bʼitsʼbʼichan. ¡Atwil jas yala! Ja bʼitsʼbʼichani yala yabʼ ja Eva ojbʼi bʼobʼ sloʼ ja sat teʼ yalunej ja Dyosi mi xbʼobʼ sloʼe. Pe ja Jyobaji mi skʼulan ja bʼitsʼbʼichan jumasaʼ bʼa oj kʼumanuke. Anto ajyi ni june maʼ wan yajel kʼumanuk ja bʼitsʼbʼichan jaw. ¿Machʼa maʼ?

Mi yeʼn waj ja Adani. Anto yeʼn waj june ja matik skʼulan bʼajtan lek yuj oj skʼuluk ja Luʼum ja Dyosi. Ja yeʼnleʼi anjele jumasaʼ sok mi xbʼobʼ kiltike. Ja anjel it jel chaʼan juntiro skʼulan sbʼaj. Ja yeʼn kʼe spensaraʼuk oj cha och mandaranum jastal Dyos sok skʼana yeʼn oj kʼuʼaxuk yi mi jaʼuk ja Jyobaji. Yeʼn ya kʼumanuk ja bʼitsʼbʼichan jaw.

Ja anjel it bʼobʼ sloʼlay ja Eva yajni yala yabʼ oj pax jastal Dyos ja ta sloʼo ja tekʼul jaw, ja ixuki skʼuʼan yiʼ. Ja yuj ja yeʼn sloʼo, cha jachuk ja Adani sloʼo. Ja Adán soka Eva skʼokowe ja smandar ja Dyosi. Jachuk ja Adán soka Eva xchʼayawe ja tsamal snajeʼi, ja kʼachinubʼi.

Pe oj kʼotuk ja skʼakʼujil ja Dyosi oj ya paxuk ja Luʼumi jastal ja stsamalil ja kʼachinubʼ bʼa Edeni. Tsaʼan oj kiltik jastal oj bʼobʼ koltanan ja bʼa it. Pe ja weʼgo la kiltik jas ekʼ sbʼaje ja Adán soka Evaʼi.