NOÉ ajyi jun xcheʼum sok oxe yuntikil. Ja yuntikili sbʼiʼile Sem, Cam sok Jafet. Jaxa skeremtiki naka ayiʼoje jujune xcheʼume. Anto bʼa yojol ja spamilya ja Noeji aye waxake, chane winik sok chane ixuk.

Ja Dyosi yala yabʼ ja Noeji a-skʼul jun jas junuk mi bʼa ilubʼala. Alji yabʼ a-skʼul jun niwan arka. Ja arka jachʼ sniwanil jastal jun niwan barko, pe ja splanta oj slajtik jastal jun najtil kaja. «Kʼulan bʼa oxe piso sok kʼulan jitsan kwarto bʼa yojoli», xchi ja Dyosi. Ja kwarto jumasaʼ jaʼ bʼa oj ajyuk ja Noé soka spamilya, ja chanteʼiki sok bʼa oj snol-e spetsanil ja swaʼeleʼi.

Ja Dyosi yala yabʼ ja Noé a-skʼuluk ja arka bʼa jun modo mi oj och sbʼaj jaʼ, ti yala ja Dyosi: «Ja keʼn oj jekon jun niwan bʼutʼ jaʼ bʼa oj xchʼaysnajel spetsanil ja matik mi lekuk ja jastik wa skʼulaneʼi. Spetsanil ja matik mi teyuk bʼa yojol ja arka oj chamuk».

Ja Noé soka skeremtiki skʼuʼane ja jas yala ja Dyosi sok kʼe skʼuluke ja arka. Pe ja tuki kechanta wa stseniye, ja yeʼnleʼi mini yawe kan ja smodoʼe mi lekuki. Mini maʼ skʼuʼan yi ja Noeji ja yajni yala ja jas oj skʼuluk ja Dyosi.

Jitsan lek tyempo yiʼaj skʼulajel ja arka yuja jel niwani. Ekʼ ja jabʼiliki man chʼak kʼulaxuk. Anto ja Dyosi tixa yala yabʼ ja Noeji a-xchʼik bʼa arka ja chante jumasaʼ. Ja Dyosi yala aya ochuk jun swaw sok jun snan bʼa jujuntik chante. Pe cha yala bʼa jujuntik chante aya ochuk juke. Ja Dyosi cha yala aya ochuk tuktukil tikʼe yal chan bʼa yojol ja arka. Jastal yala ja Dyosi jachʼni mero skʼulan ja Noeja.

Tsaʼan, ja Noé soka spamilya tixa ochye bʼa arka. Yajni ochyeʼi, ja Dyosi tixa slutu ja spwertaʼil ja arka. Bʼa yojol ja arka tini wane smajlajel ja Noé soka spamilya. Pensaran ti wana smajlajel ja niwan Bʼutʼ Jaʼ bʼa yojol ja arka sok ja Noé soka spamilya. ¿Oj maʼ jak meran ja jas yalunej ja Dyosi?