YAJNI mixa teyuke bʼa tsamal kʼachinubʼ bʼa Edeni, ja Adán soka Eva jel kʼe ajyuk swokole. Ja yeʼnleʼi tʼilani oj aʼtuke tsats bʼa oj staʼ ja swaʼeleʼi. Ja weʼgo ja bʼa luʼumi kʼiʼix xa wa xkʼiʼi mixa teʼuk bʼa tsamalikxta ja sati. Jaʼa it ja jas ekʼi yajni ja Adán soka Eva mi kʼuʼabʼal ajyiye soka Dyosi sok yawekan yamigoʼajel ja yeʼn.

Pe ja mas jel tuki, ja Adán soka Eva mixani oj bʼobʼ ajyuke sakʼan tolabidaʼa. Ajuluk akʼujol, ja Dyosi yala yabʼye ojni chamuke ja ta sloʼowe kʼa ja sat jun teʼ yalunej ja yeʼn mok sloʼe. Pes ja kʼakʼu sloʼowe ja sat teʼi, ja yeʼnleʼi takal takal kʼe awelaxuke sok man chamye. ¡Jelni sonso wajye ja mi kʼuʼabʼal ajyiye soka Dyosi!

Ja yuntikil ja Adán soka Eva kʼe ajyuk ja yajni ja yeʼnleʼi ajiyeta eluk yuj ja Dyosi ja bʼa tsamal kʼachinubʼ bʼa Edeni. Ja jawi wa stojolan ja yuntikileʼi ojni awelaxuke sok oj chamuke.

Lek ja Adán soka Eva skʼuʼane ja jas yala ja Jyobaji, ja sakʼanileʼi soka bʼa yuntikileʼi jelni gusto oj ajyuka. Ojni bʼobʼ ajyuke sakʼan gusto lek tolabida ja bʼa Luʼumi. Mini maʼ oj awelaxuk, maʼ oj koʼ chamel sok mini maʼ oj chamuk.

Ja Dyosi wa skʼana ja ixuk winikeʼi aʼajyuke sakʼan gusto lek tolabida. Ja yeʼn wa skʼapa oj kʼotuk ja skʼakʼujil jachʼ oj ekʼuki. Mi kechanuk ja Luʼumi jel tsamal oj ajyuk, chomajkil ja matik oj ajyuk sakʼani mixa oj koʼuke chamel. Spetsanile lek oj yil sbʼaje sok oj yamigoʼuke ja Dyosi.

Pe ja Eva mixani yamigoʼuk ja Dyosi. Ja yuj ja yajni kʼe yil yuntikili, ja yeʼn jel yiʼaj juntiro. Yuj ja mi ajyi kʼuʼabʼal soka Jyobaji jel jak sbʼaj juntiro wokol, ¿maʼ miyuk?

Ja Adán soka Eva yilawe jitsan skeremtike sok yakʼixuke. Ja bʼajtan yuntikil yilaweʼi yawe sbʼiʼiluk Caín, jaxa xchabʼili yawe sbʼiʼiluk Abel. ¿Wan maʼ xa naʼa ja jasa ekʼ sbʼaj ja yeʼnleʼi?