JUNE ja bʼa lugarik bʼa wajye kulan ja ixuk winik tsaʼan yajni ekʼ ja niwan Bʼutʼ Jaʼi, sbʼiʼil Ur. Ja Ur jun chonabʼ jel chapan sok naʼitsaltik bʼa jel tsamal bʼobʼelik. Pe ja ixuk winike bʼa tiw wa xyaʼteltaye kʼulubʼal dyos. Junxta sok ja jastal wa skʼulane bʼa Babeli. Ja swinkil ja chonabʼ Ur sok ja Babel mini oj slaje ja Noé soka skerem Sem, ja yeʼnleʼi jani wa xyaʼteltaye ja Jyobaji.

Yajni ekʼ ja niwan Bʼutʼ Jaʼ, 350 jabʼil tsaʼan Noé ja maʼ tojxta ay sok ja Dyosi, chami. Chabʼ jabʼil tsaʼan pojki ja winik it waxa wila bʼa dibujo. Ja yeʼn jun winik jel chaʼanyabʼalil x-iljiyuj ja Dyosi. Ja winik it sbʼiʼil Abrahán. Ja yeʼn tini ajyi kulan sok ja spamilya bʼa chonabʼ Ur.

Jun kʼakʼu ja Jyoba yala yabʼ ja Abrahani: «Aʼakan ja wa chonabʼ Ur sok ja wa pamilya jumasaʼ sok kaʼax ja bʼa chonabʼ oj kalawabʼi». ¿Skʼuʼan maʼ yi ja Dyos ja Abrahán sok yaʼama kan ja lekil sakʼanil yiʼoj ajyi bʼa Ur? Skʼuʼan, sok yujil ja Abrahani tolabida wa skʼuʼan ja Dyosi, kʼot najuk sbʼaj yamigo bʼa Dyos.

Jujuntik ja bʼa spamilya ja Abrahán wajyesok ja yajni ja yeʼn el ja bʼa Ur. Ja stat sbʼiʼil Taré. Ja sobrino Lot, sok chomajkil ja xcheʼumi, Sara. Soka tyempo ti kʼotye bʼa jun lugar sbʼiʼil Harán, sok ti cham tiw ja Taré. Najatxa lek yaweta kan ja chonabʼ Ur.

Tsaʼan ekʼ ja tyempo, ja Abrahán sok ja spamilya jumasaʼ elye ja bʼa Harani sok ti kʼotye bʼa slujmal Canaán. Ja tiw ti yala ja Jyobaji: «Jaʼ it ja luʼum oj kaʼ yi ja wa wuntikil jumasaʼ». Ja Abrahán tixa ni kan tiw bʼa Canaán sok ti skʼulane naʼitsaltik kʼulubʼal sok lona bʼa ti oj ajyukeʼa.

Ja Dyosi ti kʼe skoltay ja Abrahani, sok jachuk ajyiyuj jitsan xchej sok tuk xchanteʼik sok jitsan yaʼtijum. Pe ja yeʼn soka Sara mini x-ajyi yuntikile.

Yajni ja Abrahán ayiʼoj 99 jabʼil, ja Jyobaji yala yabʼ: «Wa xkalawabʼ oj ajyuk jitsan awintil sok oj paxan tatal bʼa jitsan chonabʼ». Pe ¿jastal modo oj bʼobʼuk ja jaw yajni ja yeʼn sok ja xcheʼumi jelxa awele bʼa oj ajyuk yuntikile?