EKʼ JITSAN jabʼil, ja Noé ajyi jitsan yij, sok ja yajni kʼiye ja yeʼnleʼi ajyi mas yuntikile. Jachuk ja Luʼumi bʼutʼ-el ixuk winik.

June bʼa yeʼnleʼi jaʼa yunin ja yij ja Noeji, sbʼiʼil Nemrod. Ja winik it mini tʼun lekuk ja smodo, wa smila lom ja chanteʼiki sok ja ixuk winiki. Chomajkil skʼulan sbʼaj mandaranum bʼa oj ya ajyuk bʼa yibʼ skʼabʼ ja ixuk winiki. Ja Dyosi mini tʼun lek xyila ja Nemrodi.

Spetsanil ja ixuk winike bʼa tyempo jaw jun ita ja skʼumaleʼi. Ja jasa wa skʼana ja Nemrodi ja oj ajyuke tsoman bʼa jachuk oj bʼobʼ skʼul mandar yeʼna. Ja yuj, ¿wan maʼ xa naʼa ja jasa skʼulani? Yala yabʼ ja ixuk winiki a-skʼuluke jun niwan chonabʼ sok ja bʼa yojoli jun chaʼanil naʼits. Wa xbʼobʼ awil ja bʼa dibujoʼi wane skʼulajel ladriyoʼik.

Ja Jyobaji mini tʼun lek yila ja wane skʼulajel ja niwan chonabʼ jaw, pes ja Yeʼn wa skʼana ja ixuk winiki aʼeluke ja bʼa tiw sok a-stik sbʼaje bʼa yibʼanal ja Luʼumi. Pe ja yeʼnleʼi yalawe: «¡Wajtikik! La jkʼuluktikik jun niwan chonabʼ sok ja bʼa yojoli jun chaʼanil naʼits man oj kʼot staʼ ja satkʼinali. ¡Anto jel oj najuk jbʼajtik!». Ja jasa wa skʼanawe ja yeʼnleʼi stoyjele, mi jaʼuk stoyjel ja Dyosi.

Ja yujil ja Dyosi skʼulan ja ixuk winiki ayaʼe kan skʼulajel ja niwan chaʼanil naʼits jaw. ¿Wan maʼ xa naʼa jastal skʼulan? Junta chʼaykʼujol ja Dyosi ya kʼumanuke tuktukil kʼumal, mixa junukta. Mixa xyabʼ stojolil sbʼaje. Ja yujil ja xchonabʼeʼi sbʼiʼilan Babel, ma Babilonia, wa stojolan «mi xyabʼtalan stojolil sbʼaje».

Ja ixuk winike tixa chʼak eluke ja bʼa chonabʼ Babel. Ja kʼole matik wa xkʼumaniye junxta kʼumali wajye kulan lajan bʼa pilan lugarik ja bʼa Luʼumi.