KʼELA ja Moisés; wan spakjel ajnel ja bʼa Egipto. ¿Wan maʼ xa wila ja matik wan ijel yi yuj spatiki? ¿Wan maʼ xa naʼa jas yuj wa xkʼana miljuki? La kiltik ta oj bʼobʼ jnatik.

Ja Moisés tini kʼi bʼa snaj ja faraón, ja mandaranum bʼa Egipto. Ja Moisés jelni bibo sok jelni tʼilana. Pe ja yeʼn wani snaʼa mini ti sbʼajuk bʼa Egiptoʼa, ja mero snan stati nake moso israʼelenyoʼik.

Jun kʼakʼu, yajni ja Moisés ayxa yiʼoj 40 jabʼil, waj yil jastal wan ekʼel yujile ja smoj israʼelenyoʼiki. Ixta lek wa x-iljiye. Yila june bʼa swinkil Egipto wan smakʼjel jun aʼtum israʼelenyo. Ja Moisés skʼeltalan bʼa sjoyanal, yajni yila mini june maʼ wan iljel yuj, syajbʼes ja winik bʼa Egipto, ja winiki chami. Ja Moisés snakʼa ja chamwinik bʼa jijkabʼ, ma arena.

El ja kʼakʼu, ja Moisés waj yil pilan ekʼele ja smoj israʼelenyoʼiki. Wa xyala yeʼn oj bʼobʼ skoltay bʼa mixa oj ajyuke mosoʼil. Pe yila chabʼ israʼelenyo wane smakʼjel sbʼaje, ja Moisés ti yala yabʼ ja maʼ wan skʼulajel ja bʼa mi lekuki: «¿Jas yuj wana smakʼjel jawa moj-aljeli?».

Ja winiki ti yalaʼa: «¿Maʼ ya ochan bʼa oj ajyan mandaranum sok jwesil bʼa keʼntikon? ¿Yuj maʼ oja mil-on ja jastal amila ja winik bʼa Egipto?».

Ja Moisés xiwi, pes snaʼa kʼinal ja ixuk winiki snaʼaweta ja jasa skʼulan yi ja winik bʼa Egipto. Chomajkil ja faraón yabʼi sok sjeka ja swiniki bʼa oj smil-e ja Moisesi. Ja yuj ja yeʼn tʼilani spaka ajnel ja bʼa Egipto.

Yajni ja Moisés el ja bʼa Egipto, jelni najat waja, ti waj man bʼa slujmal Madián. Ja tiw ti snaʼa sbʼaj ja spamilya ja Jetró sok nupanisok june ja bʼa yunin akʼixuki, Ziporá. Moisés waj jun talna chej sok jani yaʼtel skʼeljel ja xchejik ja sniʼali. 40 jabʼil ti ajyi kulan bʼa Madián. Jun kʼakʼu, ja ayxa yiʼoj 80 jabʼili, yajni wan stalnajel ja xchej ja Jetró, ekʼ jun jasunuk jel chamyabʼjel bʼa tukbʼesji yi ja sakʼanil ja Moisés. Aʼekʼuk ja slam ja juʼuni sok la kiltik jasa ekʼi.