KʼELA ja niwan pamilya it. Ja yeʼnleʼi jaʼa 12 yuntikil ja Jacobi. Chomajkil ajyi yuntikil akʼixuk. ¿Wan maʼ xa naʼa jas sbʼiʼile jujuntik bʼa yeʼnle? La kiltik jujuntik.

Ja Lea yalin ja Rubén, Simeón, Leví sok ja Judá. Yajni ja Raquel yila ja yeʼn mi x-ajyi yuntikil, jel tristeʼaxi. Ja yujil ja Raqueli yaʼ yi ja statami, ja Bilhá, ja maʼ wa xkoltaji yuj aʼteli. Bilhá ajyi yuj chabʼ skeremtik sbʼiʼil Dan sok Neftalí. Anto ja Lea chomajkil yaʼ yi ja Jacob, ja Zilpá. Zilpá yalin ja Gad sok ja Aser. Anto ja Lea ajyito chabʼ skerem, ja Isacar, ja Zabulón sok tixa kʼot tekʼan untikanela.

Tixa ajyi jun yal skerem ja Raqueli, yaʼ sbʼiʼiluk José. Tsaʼan oj jnebʼtik mas sbʼaja yeʼn, pes waj jun winik jel tʼilan. Ja it ja 11 yuntikil ja Jacobi ja yajni ti ajyi sok ja stat ja Raqueli, ja Labán.

Chomajkil ja Jacobi ajyi jujuntik yakʼixuk. Pe ja Biblia kechanta wa xyaʼa ja sbʼiʼil june ja bʼa yeʼnleʼi, Dina.

Kʼota tyempo ja Jacob bʼa ojxa yakan ja Labán sok bʼa oj kumxuk bʼa Canaán. Ja yujil stsomo ja niwan spamilya, ja nole xcheji, ja jitsan tuk xchanteʼi sok kʼe stul-e yi ja najat bʼejyeli.

Yajni ayxa jun tyempo ja Jacob sok ja spamilya teyexa ja bʼa slujmal Canaán, ja Raqueli ajyi pilan yal. Ja it ekʼi yajni wajume ja bʼa lugar Efrat. Mini lek ekʼ yuj ja Raquela, pes ja yajni pojki ja yal alatsi ja yeʼn chami. Pe ja yal alatsi kan sakʼan. Ja Jacob ya sbʼiʼiluk Benjamín.

Jelni tʼilan ja oj jnatik sbʼaj ja sbʼiʼile ja 12 yuntikil ja Jacob, pes spetsanil ja yuntikili ti el ja niwan chonabʼ Israel. Jaʼi, ja 12 kʼole bʼa Israeli ja yiʼoj ja sbʼiʼil ja lajune yuntikil ja Jacobi sok ja chabʼ skerem ja José. Ja Isaaki ajyito sakʼan jitsan jabʼil sok yilatoni chʼak ajyuk spetsanil ja keremtik jumasaʼ it. ¡Sok jel maʼ gustoʼaxi ja chʼakto yil ja jitsan yiji! Ja weʼgo la kiltik ja jasa ekʼ sbʼaj ja yij sbʼiʼil Dina.