¿AY MAʼ bʼa awabʼunej jun bʼuruj wa xkʼumani? Miyuk, oj chiʼan. Ja chante jumasaʼ mi xkʼumaniye. Pe ja Biblia wa staʼa tiʼal jun snan bʼuruj kʼumani. La kiltik jastal ekʼ ja it.

Ja israʼelenyo chapanxa ni aye bʼa oj ochuke ja bʼa slujmalil Canaán. Balac, ja mandaranum bʼa chonabʼ Moab, wa xiwyuj ja israʼelenyo. Ja yuj sjeka slejel jun winik bʼa jel snaʼa, ja winik it sbʼiʼil Balaam, bʼa oj waj kʼumanuk sbʼaj kistal ja israʼelenyo. Skʼapa yi jitsan takʼin, jachuk ja Balaam kʼe ja bʼa snan bʼuruji sok waj ja man bʼay ja Balac.

Jyoba mi skʼana ja Balaam oj waj kʼumanuk sbʼaj kistal ja xchonabʼi. Ja yuj sjeka jun anjel sok jun najat yespada bʼa oj waj tekʼanuk ja bʼa bʼeji sok bʼa oj ya kʼot tekʼan ja Balaam. Ja Balaam mi xbʼobʼ yil ja anjeli, pe ja snan bʼuruji wa xyila. Ja snan bʼuruji wa sleʼa modo bʼa oj eluk ja bʼay ja anjeli, masan koʼ wukʼan. Ja Balaam jel tajki, anto och smakʼ sok jun teʼ.

Jyoba yakan ja Balaam ayabʼ akʼumajuk yuj ja nan bʼuruji. Ti sjobʼo ja nan bʼuruji: «¿Jas jkʼulunejawi yuja waxa makʼawoni?».

Ja Balaam yala: «¿Yuj maʼ waxa wila mi xnaʼa kʼinal? ¡Lek kiʼojuk jun kespada, jmilawataʼele!».

Ti sjobʼo ja nan bʼuruji: «¿Ayxa maʼ bʼa jkʼulunejawi jachuka?».

«Miyuk», xchi ja Balaam.

Anto Jyoba skʼulan ja Balaam ayil ja anjel tekʼan ekʼ bʼa bʼej soka yespada. Ja anjeli yala: «¿Jas yuj waxa makʼa ja snan bʼuruji? Jakelon bʼa oj makawi ja bʼeji, bʼa mi oj bʼobʼ waj kʼumanan sbʼaj kistal ja israʼelenyo. Lek mokukxta kʼot tekʼan ja snan bʼuruji, ja keʼn jmilawataniʼa, pe mini jas oj ka ekʼ sbʼa ja snan bʼuruji».

Balaam ti yalaʼa: «Jleʼata jmul. Mini xnaʼa ta tiʼ aya bʼa bʼej». Ja anjeli yakan awajuk ja Balaam, soka yeʼn yiʼaj ja sbʼej man bʼay ja Balac. Wanto ni sleʼa modo bʼa oj kʼumanuk sbʼaj kistal ja israʼelenyo, pe ja Jyoba skʼulan akʼumanuk sbʼaj lek ja israʼelenyo oxe ekʼele.