¡KʼELA jas wane skʼulajel ja ixuk winiki! ¡Wane spatjel yi skʼujol jun tan yal beserro! ¿Jas yuj wane skʼulajel ja it?

Yajni ja israʼelenyo yilawe ja Moisés jelxa albʼita sok mini xkoʼkon ja bʼa witsi, yalawe: «Mi xnaʼatik jasa ekʼel sbʼaj ja Moisés. La jkʼuluktikik jun yajkʼachil dyos bʼa oj ya elkotik ja bʼa luʼum it».

«Lekniʼa», xchi ja Aarón. «Sopowik jani ja jastik alapunejex bʼa oro.» Yajni ja chonabʼi skʼulan ja it, ja Aarón ya ulbʼuk ja oro sok ti spekʼayi ja yal beserro kʼulubʼal sok teʼ. Ja israʼelenyo yalawe: «¡Ja yal wakax it jani ja jdyostiki ja maʼ ya elkotik ja bʼa Egipto!». Anto skʼulane jun niwan kʼin sok kʼe yawe yi stoyjel ja tan yal beserroʼi.

Yajni Jyoba yila ja it, jel tajki sok yala yabʼ ja Moisés: «Nutsuʼabʼaj sok koʼan xa koʼe. Ja chonabʼi wane skʼulajel jastik bʼa mi lekuk. Chʼayta skʼujole ja jmandariki sok wane skʼintajel jun beserro kʼulubʼal sok oro».

Anto ja Moisés weʼgo koʼkon ja bʼa witsi, sok ja yajni wanxa mojxeli, jaʼa it ja jas yila. ¡Ja ixuk winiki wane chanel sok wane stsʼebʼantajel bʼa sjoyanal ja yal beserro bʼa oro! Ja Moisés jelni tajki sok yuja stajkelali sjipa bʼa luʼum ja chabʼ lechan ton bʼa ayiʼoj ja smandar ja Dyosi, sok ja it chʼak pojuk. Anto ja Moisés syama ja tan yal beserro bʼa oro, sbʼuyuʼele sok stsika bʼa kʼakʼ, anto kan jastal tsʼubʼil luʼum.

Ja jasa skʼulaneʼi mini tʼun lekuka. Ja yuj ja Moisés yala yabʼ jujuntik winik a-smutsʼ-e ja yespadaʼe sok yala: «Ja matik yawe yi stoyjel ja tan yal beserro bʼa oro ojni chamukeʼa». ¡Ja yuj ja winik jumasaʼ smilawe jun oxe mil ixuk winik! ¿Mi maʼ wa sjeʼa kitik ja it oj talnay jbʼajtik bʼa kechanta ja oj jtoytik ja Jyoba sok miyuk ja kʼulubʼal dyosiki?