¡LAJANSOK sakʼan ay ja bʼitsʼbʼichan jaw bʼechʼan ekʼ ja bʼa teʼi! Pe mini sakʼanuka, kʼulubʼal sok kobre. Jyoba yala yabʼ ja Moisés aya kʼeʼuk ja bʼa teʼ bʼa jachuk ja ixuk winiki a-skʼele sok bʼa mi oj chamuke. Pe ja tuk bʼitsʼbʼichani tey bʼa luʼumi sakʼanikni ayeʼa. Ja ixuk winiki kʼuxjiye sok aji koʼuke chamel. ¿Wan maʼ xa naʼa jas yuj?

Yujni ja israʼelenyo kʼe kʼumanuke sbʼaj ja Dyosi soka Moisesi. Yalawe: «¿Jas yuj wa elkotikon ja bʼa Egipto bʼa oj chamkotikon ja bʼa takin luʼum it? Mey waʼelal, mey jaʼ ja il sok axwitikonta yabʼjel ja tan maná it».

Ja maná juni lekil waʼelala. Yuj ja yip ja Jyoba skʼulunej aʼajyuk, sok chomajkil ja jaʼi. Pe ja israʼelenyo mini chaʼanyabʼalil xyilawe jastal wa xtalnajiye yuja Jyoba. Ja yuj Jyoba sjeka ja bʼitsʼbʼichanik it bʼa oj kʼuxjuke. Jitsan ja bʼa ixuk winik kʼuxjiyeʼi chamye.

Masan wajyesok ja Moisés sok yalawe yabʼ: «Jleʼata jmultikon, yujni kʼumanitikonta sbʼaj ja Jyoba soka weʼn. Ayi orasyon weʼna ja Jyoba bʼa oj chʼak ya wajuk ja bʼitsʼbʼichanik it».

Ja yuj ja Moisés spata yi skʼujol ja Dyosi, soka yeʼn yala yabʼ ja Moisés a-skʼuluk jun bʼitsʼbʼichan bʼa kobre sok aya bʼechʼan bʼa jun teʼ. Spetsanil ja matik wa xkʼuxjiye ojni skʼel-e ja bʼitsʼbʼichani. Moisés jachʼni skʼulan ja jastal yala ja Dyosi, sok ja matik kʼuxjiyeta wa skʼelawe ja bʼitsʼbʼichan bʼa kobre wa xtojbʼiye sok mi xchamye.

Soka it wa xbʼobʼ jnebʼtik jun jasunuk jel tʼilan. Jpetsaniltik jachukotik jastal ja israʼelenyo kʼuxubʼale yuja bʼitsʼbʼichaniki. Ta waxa wila, jpetsaniltik wala kotik chamel, wala awelaxitik sok wala chamtik. Ja it ja smul ja bʼajtan winik soka bʼajtan ixuk, ja Adán soka Eva. Ja yeʼnle yaʼawekan ja Jyoba, sok jpetsanil ja keʼntiki ti jakelotik bʼa yintil yeʼnle. Pe Jyoba wa sjama jun bʼej bʼa oj yiʼotik och ja bʼa sakʼanil bʼa juntiro.

Jyoba sjekakon bʼa Luʼum ja yunin, Jesukristo. Ti aji kʼe lokan bʼa jun teʼ yujni jitsan wa spensarane ja yeʼn wa skʼulan ja bʼa mi lekuki. Pe Jyoba yaʼa ja Yunin bʼa jkoltajeltik. Ta wa stsajlatik bʼa yeʼna, oj bʼobʼ jtaʼtik ja jsakʼaniltik bʼa juntiro. Tsaʼan oj jnebʼtik mas sbʼaja it.