JA BʼA Biblia wa xtax jun juʼun wa sbʼiʼilan Rut. Ja bʼa juʼun it wa xcholo jun loʼil bʼa jun pamilya ja bʼa styempoʼil ja jwes jumasaʼ bʼa Israel. Rut ti ajyi kulan bʼa xchonabʼil Moab; mi tiʼuk sbʼaj bʼa Israel, ja xchonabʼil ja Dyosi. Pe yajni Rut snebʼa sbʼaja Dyos smeranil, Jyoba, jel syajtay. Jaxa Noemí, jun ixuk ayxa skʼujol, yeʼn ja maʼ skoltay ja Rut snajel sbʼaja Jyoba.

Noemí jun ixuk israʼelenya. Ja yeʼn soka statami sok ja chabʼ skeremi wajye kulan bʼa slujmalil Moab yajni bʼa Israel mixa ay lek waʼelal. Jun kʼakʼu, ja statam ja Noemí chami. Tsaʼan, ja yuntikil ja Noemí nupaniye sok chabʼ ixuk bʼa xchonabʼil Moab sbʼiʼil Rut sok Orpá. Jun lajune jabʼil tsaʼan, ja chabʼ yuntikil ja Noemí chamye. ¡Jelni aʼula sbʼaja! ¿Jas maʼ oj skʼuluk ja yan ja Noemí?

Jun kʼakʼu, ja Noemí yala oj kumxuk sok ja swinkil ja slugari, jun najat bʼejyel. Ja Rut soka Orpá wa skʼana oj ajyuke sok ja Noemí, ja yuj smojtaye. Pe yajni ayexa bʼeji, ja Noemí yala yabʼ ja akʼixuki: «Kumxanik ja bʼa wa lujmal jakelexi sok kananik soka wa nanexi».

Ja Noemí skʼuman kan sok yujtsʼan ja Rut soka Orpá. Ja yeʼnleʼi och okʼuke yujni jel skʼanawe ja Noemí. Yalawe: «¡Miyuk! Ja keʼntikoni oj wajkotikon amok ja bʼa wa chonabʼi». Pe ja Noemí yala yabʼye: «Kala akʼixuk, ja weʼnlexi ojni kumxanik. Mas lek oj wajuka wujilex ja bʼa wa chonabʼexi». Anto ja Orpá kumxi ja bʼa sbʼejyeleʼi sok waj ja bʼa xchonabʼi. Pe ja Rut mini kumxiʼa.

Noemí cha yala yabʼ ja Rut: «Ja Orpá kumxitaniʼa. Chomajkil ja weʼn kumxansok». Pe ja Rut sjakʼa: «¡Mokniʼa le modo bʼa oj kaʼakani! Aʼakan awajkon amok. Bʼa oj wajan ja weʼn tini oj wajkon ja keʼn, bʼa oj ajyan kulan ja weʼn tini oj cha ajyukon kulan ja keʼn. Ja wa chonabʼi jani oj jchonabʼuka sok jawa Dyosi ja oj jDyosuk. Bʼa oj chaman ja weʼn ti oj chamkon ja keʼn, sok tini oj mukjukona». Yajni ja Rut yala jachuk, ja Noemí mixa sleʼa modo bʼa oj ya kumxuk.

Ja yeʼnle tixa ni kʼotye ja bʼa Israel sok tini ajyiye tiw. Ja Rut weʼgo kʼe aʼtijuk bʼa alajaltik yujni styempoʼil stuljel ja sat inat sbʼiʼil cebada. Jun winik sbʼiʼil Boaz yaʼakan a-stul inat ja bʼa yalaji. ¿Wan maʼ xa naʼa machunkiluk ja snan ja Boaz? Jaʼa Rahab, ja ixuk bʼa xchonabʼil Jericó.

Jun kʼakʼu, ja Boaz yala yabʼ ja Rut: «Jel jas kabʼunej bʼa weʼna, soka slekil akʼujol ja jeʼunej yi ja Noemí. Wa xnaʼa awaʼunej kana tat, ja nan sok ja wa chonabʼi bʼa oj jakan bʼa jun chonabʼ bʼa mini tʼun anaʼonej sbʼaj. ¡Ja Jyoba a-sjeʼawi slekil skʼujol amok!».

Rut sjakʼa: «Jel lek ajeʼunej ja wa modo jmok, kajwal. Jel lek xkabʼ ayon soka jastik jun lek awalunejkabʼi». Ja Boaz jel lek yila ja Rut, sok tʼusan tyempo tsaʼan nupaniye. ¡Jelni aji gustoʼaxuk yuja it ja Noemí! Pe masni aji gustoʼaxuk yajni ja Rut soka Boaz ajyi ja bʼajtan yalatse, sbʼiʼil Obed. Tsaʼan ja Obed kʼot stataweloʼuk ja David. Tsaʼan oj jnebʼtik sbʼaja David.