¿WAN maʼ xa naʼa sbʼaj ja tsamal ixuk jakum staʼ ja David? Sbʼiʼil Abigail. Ja yeʼn jel snaʼa pensar sok ay jas skʼulan bʼa jachuk ja David mi oj skʼuluk jun jasunuk bʼa mi lekuk. Pe bʼajtanto oj kiltik jasunkiluk waj ja jaw, la kiltik ja jasa wan ekʼel sbʼaj ja David.

Tsaʼan yajni ja David spaka ajnel yuja Saúl, ja yeʼn ti waj snakʼ sbʼaj bʼa jun kʼeʼen. Ja smoj-alijel jumasaʼ, ja tuk spamilya sok tuk winike jakye ja man bʼay ja David. Stsomoni sbʼaje jun 400, sok ja David yeʼnani kʼot ajyuk olomal bʼa yeʼnle. Anto ja David ti waj skʼumuk ja mandaranum bʼa Moab sok yala yabʼ: «Aʼawa pabor, akanuk amok il ja jnan jtati malan xkila jastal oj wajku». Tsaʼan, ja David soka swinik jumasaʼ tixa kʼe snakʼ ekʼ sbʼaje bʼa yoj kʼulaltik.

Ekʼ ja tyempo, David snaʼa sbʼaj ja Abigail. Ja statam ja yeʼn, ja Nabal, juni winik jel ja jastik sbʼaji sok ayiʼoj niwakik sluʼum. Ayiʼoj 3,000 chejik sok 1,000 chiboʼik. Nabal mini lekuk ja smodo. Pe ja xcheʼumi, ja Abigail, jelni tsamala sok ja yeʼn jelni snaʼa skʼulajel ja bʼa toji. Bʼa jun ekʼele skoltay ja spamilya bʼa mi oj chamuke. La kiltik jastal ekʼi.

David soka swiniki jelni lek sjeʼuneje ja smodo soka Nabal. Ja yeʼnle wani skoltaye stalnajel ja xchejiki. Jun kʼakʼu, ja David sjeka jujuntik swinik bʼa oj skʼan-e yi jun pabor ja Nabal. Ja yeʼnle kʼotye yajni Nabal soka yaʼtijumi wane sjoxjel stsoʼtsil ja xchejiki. Ja kʼakʼu jaw ayiʼoje kʼin, sok ja Nabal jelni yiʼoj jastik lek bʼa yabʼjel. Ja yuj ja swinik ja David yalawe: «Jelni lek jeʼunej jmodotikon amok. Koltunejatikon stalnajel ja wa chejiki, mini bʼa wa xkelkʼantikonawiʼa. Aʼawa pabor, ja weʼgo akitikon tʼun jwaʼeltikon».

«Mini jasa oj kayile winik jastal weʼnlex», xchi ja Nabal. Tajkelxta yala sok kʼumani sbʼaj mi lekuk ja David. Yajni ja winike kumxiye sok kʼot yal-e yabʼ ja David, ja yeʼn jel tajki sok yala yabʼye: «¡Iʼajik ja wa espadaʼexi!». Anto wajye bʼa oj waj smil-e ja Nabal soka yaʼtijum jumasaʼ.

June ja bʼa swinik ja Nabal, yajni yabʼ ja jel kistal kʼumani ja Nabal, weʼgo waj yal yabʼ ja Abigail ja jasa ekʼeli. Anto ja Abigail weʼgoxta xchapa waʼelal, ya kʼeʼuk ja bʼa bʼurujiki sok waji. Yajni staʼa sbʼaj sok ja David, koʼ ja bʼa sbʼuruji, koʼ tinan sok yala: «Kajwal, aʼawa pabor, moka kis ja jas yala wabʼ ja Nabal, ja jtatami. Ja yeʼn jel ala sonso, mi snaʼa ja jas wa skʼulani. It bʼa kiʼonejanawi juna majtan. Aʼawa pabor, iʼaj sok aʼekʼuk ja jas skʼulani».

David sjakʼa: «Jelni lek ja jasa kʼulani. Yuja jachʼ akʼulani, mixa ni jas oj jkʼul yi ja Nabal yuja mini tʼun lek sjeʼa ja skʼujol jmoktikon. Kumxan bʼa wa naj sok iʼaj och alamanil». Tsaʼan yajni cham ja Nabal, ja Abigail ja kʼot june ja bʼa xcheʼum ja David.