KʼELA ja winik tey bʼa yojol ja mari. Jelni tuk wan ekʼel yuj, ¿anke meran? ¡Ojxta bʼukʼjuk koʼ yuja niwan chayi! ¿Wan maʼ xa naʼa machunkiluk? Sbʼiʼil Jonás. La kiltik jastal xchʼika sbʼaj ja bʼa wokolik it.

Jonás jun yaluman ja Jyoba. Tʼusan tsaʼan yajni cham ja aluman Eliseo, Jyoba yala yabʼ ja Jonás: «Kaʼax ja bʼa niwan chonabʼ Nínive. Ja jastik wa skʼulane ja ixuk winik bʼa tiw jelxel xa skistalil, sok wa xkʼana oj awalyabʼ sbʼaja jaw».

Pe ja Jonás mi skʼana oj wajuk. Ja yuj ti kʼe bʼa jun barko mi ti wa xwaj bʼa Nínive. Jyoba mini lek yila ja wan spakjel ajnel ja Jonás. Skʼulan ajak jun niwan tsatsal chawuk jaʼ ja bʼa mari. Jelni tsatsa ja yuj ja barko ojni mukxuk koʼa. Ja matik wa x-aʼtiye ja tiw jelni xiwyeʼa sok awaniye spatjel skʼujol ja sdyoseʼi bʼa akoltajuke.

Tixa yala ja Jonás: «Ja keʼn wa xkaʼteltay ja Jyoba, ja Dyos maʼ skʼulan ja satkʼinali soka Luʼumi. Wanon spakjel ajnel bʼa mi oj jkʼuʼuk ja jas yalunejkabʼ oj jkʼuluki». Anto ja matik wa x-aʼtiye bʼa barko ti sjobʼowe yi ja Jonás: «¿Jas oj jkʼuluktikonawi bʼa oj lamxuk ja chawuk jaʼi?».

Ti sjakʼa Jonás: «Jipawoni koʼ bʼa mar, soka jaʼi oj lamxuk». Ja matik wa x-aʼtiye bʼa barko mi skʼana oj skʼuluke, pe yajni yilawe wanxta ipaxel ja chawuk jaʼi, sjipawe koʼ ja Jonás. Tixta kʼe lamxuk ja jaʼi sok xlamamixta waj jastal ni ay ajyi.

Yajni Jonás mukxikoʼ ja bʼa yojol ja mari, jun niwan chay bʼukjikoyuj. Pe ja yeʼn mi chami. Oxe kʼakʼu sok oxe akʼwal ajyi ja bʼa yoj slukum ja chayi. Jonás jelni tuk ay xyabʼ yuja mi skʼuʼan yi ja Jyoba bʼa oj wajuk ja bʼa Nínive. Ja yuj, ¿wan maʼ xa naʼa jas skʼulan?

Yaʼ yi orasyon ja Jyoba sok skʼana yi skoltajel. Anto ja Jyoba skʼulan ja chayi awaj xejtay kan ja Jonás bʼa takin luʼum. Tsaʼan, ja Jonás tixa waj ja bʼa Nínive. ¿Mi maʼ sjeʼa ja it tʼilani oj kʼuʼuktik spetsanil ja jas wa xyala kabʼtik ja Jyoba?