¿WAN maʼ xa naʼa jas yuj ja winik it wan yajel yi orasyon ja Jyoba? ¿Jas yuj yaʼunej ja juʼunik it bʼa lugar wa xkʼapxi yi majtanal ja Dyosi? Ja winik it jaʼa Ezequías. Yeʼn ja mandaranum ja bʼa chabʼ kʼole israʼelenyo bʼa suri sok wa xtax bʼa niwakik wokol. ¿Jas maʼ yuj?

Yujni ja kʼakʼanumik bʼa Asiria xchʼayawetaʼel snajel ja lajune kʼole israʼelenyo bʼa norte. Jyoba yeʼnani yaʼakan aʼekʼ jachuk yujni ja ixuk winik bʼa tiw mini lekuk ja jas wa skʼulane. Jaxa weʼgo jakume sbʼaj sok ja mandaranum bʼa chabʼ kʼoleʼi.

Ja mandaranum bʼa Asiria stsʼijbʼunej yi kartaʼik ja mandaranum Ezequías, sok jani juʼunik it yaʼunej ja Ezequías bʼa stiʼ sat ja Jyoba. Ja jas tsʼijbʼunubʼal bʼa juʼuni wa skʼenay ja Dyosi, sok wa x-alji yabʼ ja Ezequías mokxa skoltay sbʼaj. Ja yuj Ezequías yaʼ yi orasyon ja Jyoba: «Ah Jyoba, koltayotikon ja bʼa skʼabʼ ja mandaranum bʼa Asiria. Anto spetsanil ja chonabʼiki oj snaʼe kechani weʼn Dyosa». ¿Smaklay maʼ ja Jyoba?

Ja Ezequías jun lekil mandaranum. Mi jachukuk jastal ja tuk mandaranumik ja bʼa lajune kʼole israʼelenyo, cha mi jachukuk jastal ja stati, ja mandaranum Acaz. Ja Ezequías wani stalnay bʼa oj skʼuʼuk spetsanil ja smandar ja Jyoba. Ja yuj yajni chʼak yaʼ yi orasyon ja Jyoba, ja aluman Isaías sjeka yi ja rason it bʼa Jyoba: «Ja mandaranum bʼa Asiria mini oj ochuk ja bʼa Jerusalén. Mini june ja bʼa skʼakʼanum oj mojxukejan. Sok mini jun plecha oj sjip-ejan ja bʼa chonabʼi».

Kʼela ja dibujo. ¿Wan maʼ xa naʼa machunkiluk ja kʼakʼanum jumasaʼ chamele xa? Jaʼa kʼakʼanumik bʼa Asiria. Jyoba sjeka ja yanjeli, sok kechanta bʼa jun akʼwal ja anjeli smila 185,000 kʼakʼanum. Ja yuj ja mandaranum bʼa Asiria kumxi bʼa snaj.

Ja yuj ja chabʼ kʼole bʼa Israel mini jas ekʼ sbʼajeʼa, sok bʼa jun tyempo ja ixuk winiki ajyi gusto ja sakʼanile. Pe tsaʼan yajni cham ja mandaranum Ezequías, ja yunin Manasés yeʼn ochkan mandaranum. Ja Manasés soka yunin Amón mi lekik mandaranume. Ja yuj ja chonabʼi bʼutʼ-el spekʼjel chikʼ. Yajni ja yaʼtum jumasaʼ smilawe ja mandaranum Amón, ja yunin Josías yeʼnxa ochkan mandaranum ja bʼa chabʼ kʼole bʼa Israel.