KECHANTO waxake jabʼil yiʼoj ja Josías yajni och mandaranum ja bʼa chabʼ kʼole israʼelenyo bʼa suri. Jeltoni tʼusan jabʼil bʼa jun mandaranum. Ja yuj yajni kʼe yatʼan jan mandar ja chonabʼi koltajiyuj winike bʼa ayxa sjabʼile.

Yajni ayxa juke jabʼil wan yajel mandar ja Josiasi, kʼe sleʼ yaʼteltajel ja Jyoba. Snocho ja lekil sjeʼjel ja mandaranumik jastal David, Jehosafat soka Ezequías. Anima yal keremto, skʼulan jun jasunuk bʼa mi xiwi.

Bʼa jitsan tyempo, tʼusan mi spetsaniluk ja israʼelenyo jelxel xa wa skʼulane ja bʼa mi lekuki. Wa xyaʼteltaye dyos mi meranuk sok wa xkoye sbʼaj mekʼan. Ja yuj Josías soka swiniki kʼe yawe eluk ja bʼa chonabʼi ja skʼuʼajel mi meranuki. Ja it juni niwan aʼtel yujni jitsan ixuk winik wa xyaʼteltaye dyosik bʼa mi meranuk. Ja bʼa dibujo wa xbʼobʼ awil ja Josías soka swiniki nake wane spojel ja kʼulubʼal dyosiki.

Tsaʼan, Josías yaʼa bʼa skʼabʼ oxwane winik bʼa oj stojbʼese ja stemplo ja Jyoba. Ja ixuk winiki yaʼawe takʼin sok stsomowe bʼa oj stup-e ja matik wane aʼteli. Malan wane aʼtel ja bʼa templo, ja Hilquías, ja mero olomal maʼ wa xyila ja skʼapjel majtanali, staʼa ja bʼa wane aʼtel jun jasunuk bʼa jel tʼilan: jani ja juʼun yiʼoj ja smandar ja Jyoba stsʼijbʼunej ja Moisés jitsan xa tyempo sok chʼayelni ajyi.

Yajni iji ochyi ja juʼun ja Josías, skʼana akʼumajuk yi. Yajni chʼak yabʼ ja jasa wa xyala ja juʼuni jelni och stristeʼila pes snaʼa ja chonabʼi mini wan skʼulajel ja jasa wa xyala ja smandar ja Jyoba. Ja yuj kʼe xchʼi ja skʼuʼi, jastal ni waxa wila bʼa dibujo, sok yala: «Ja Jyoba tajkel ni ay jmoktika yujni ja jnantatiki mi snolowe ja smandar tsʼijbʼunubʼal bʼa juʼun iti».

Josías sjeka ja mero olomal, Hilquías, awaj sjobʼ jas oj skʼuluk ja Jyoba sbʼaja chonabʼi. Anto Hilquías waj yil ja aluman Huldá sok sjobʼoni yiʼa. Ja Huldá ti sjeka yi ja Josías ja rason it jakel bʼa Jyoba: «Ja Jerusalén sok spetsanil ja swinkili ojni ajuk chʼayuk snajel yujni wa xyaʼteltaye dyosik bʼa mi meranuk sok yuja luʼumi bʼutaʼel jastik junuk bʼa mi lekuk. Pe yuja weʼn, Josías, akʼulunej ja bʼa leki, mitoni oj skʼuluk bʼa wa sakʼanil oj skʼuluk tsaʼan yajni la chami».