KʼELA jastal ja Samuel wan stʼoljel yi aseyte ja bʼa s-olom ja winik it. Ja it ja jas wa xkʼulajiyi yajni ay maʼ wa stsaji bʼa oj och mandaranum. Jyoba yala yabʼ ja Samuel a-stʼol yi aseyte ja bʼa s-olom ja Sauli. Ja it juni aseyte jel tsaʼubʼal sok jel x-ajbʼani yikʼil.

Saúl wani spensaraʼan mini chapanuk bʼa oj och jastal mandaranum. Ja yeʼn yala yabʼ ja Samuel: «Ja keʼn tini jbʼaj bʼa kʼole Benjamín, ja mas ala nux ja bʼa Israel. ¿Jas yuj waxa wala oj ochkon mandaranum?». Jyoba lekni xyila ja Saúl yujni mi sleʼa modo bʼa jel niwan oj yaʼa sbʼaj. Ja yujil ja Jyoba stsaʼa bʼa oj och mandaranum.

Saúl mini jun chʼin winikuka sok mini ajulaʼuk sbʼaja. Ja yeʼn jakel bʼa jun pamilya bʼa jel ja sjastik sbʼajeʼi, jelni tsamal sok jel chaʼan. Tini wa xkanye tikʼan bʼa stejlubʼ ja tuk israʼelenyoʼiki. Chomajkil ja Saúl jelni lek x-ajni sok jel ja yipi. Ja ixuk winik jelni gustoʼaxiye yuja Jyoba stsaʼa jun winik jastal Saúl bʼa oj och mandaranum. Yuja sgustoʼileʼi kʼe awanuke yaljel: «¡Jaʼni it ja mandaranumi!».

Ja skontra ja israʼelenyoʼiki jelto ni chapaneʼa sok ixtani wa x-iljiye. Tʼusan tsaʼan ja aji och mandaranum ja Saúl, ja swinkil bʼa Amorrea kʼeye bʼa oj tiroʼanukesok. Pe ja Saúl stsomo jitsan lek skʼakʼanum sok yeʼnani skʼulan ganara. Ja israʼelenyo jelni gustoʼaxiye yuja yiʼoje jun mandaranum jastal Saúl.

Ekʼ ja jabʼiliki, sok ja Saúl yeʼnani stojo ja israʼelenyo bʼa skʼulajel ganar jitsan kʼakʼanel. Ja yeʼn chomajkil ayiʼoj jun skerem mini xiwa, Jonatán. Ja Jonatán skoltay ja israʼelenyo bʼa skʼulajel ganar jitsan kʼakʼanel. Ja filisteoʼiki jato ni mero skontra ja israʼelenyo. Jun kʼakʼu jakye sbʼaja israʼelenyo jitsan mil kʼakʼanum filisteoʼik.

Samuel yala yabʼ ja Saúl a-smajlay manto ja yeʼn xkumxi bʼa oj skʼapyi jun majtanal ja Jyoba. Pe ja yeʼn jelni x-albʼiʼa. Saúl wax xiw ja filisteoʼiki ojxa kʼe tiroʼanuke smok ja yuj ja yeʼn kʼexa skʼap ja majtanali. Yajni ja Samuel kumxi, yala yabʼ ja Saúl skʼokotani ja smandar ja Dyosi, ja yuj yala: «Jyoba oj stsaʼ pilan winik bʼa yeʼn oj och mandaranum bʼa Israel».

Tsaʼan ja Saúl cha skʼokoni yajkʼachil ekʼele ja smandar ja Dyosi. Samuel yala yabʼ: «Mas lek ja skʼuʼajel ja Jyoba yuj ja skʼapjel jun tsamal kojlel chej. Yuja mi kʼuʼabʼal ajyiya soka Jyoba, ja yeʼn mixa ni oj ya ajyan mandaranum bʼa Israel».

Soka it wa xbʼobʼ jnebʼtik jelni tʼilan tolabida kʼuʼabʼal oj ajyukotik soka Jyoba. Chomajkil, ja it wa sjeʼa kitik yajni jun maʼ toj ay sok ja Dyosi, jastal ajyi ja Saúl, ojni cha sutxuk bʼa skʼulajel ja bʼa mi lekuki. ¡Mok jkʼuluktik junxta jastal skʼulan ja Saúl!