YAJNI ja David kʼe ya mandar ja bʼa Jerusalén, Jyoba ya skʼuluk ganar jitsan kʼakʼanel ja skʼakʼanumik ja David. Jyoba skʼapunejni yi oj yaʼ yi ja israʼelenyo ja slujmal Canaán. Ja yuj soka skoltajel ja Jyoba, kʼotni sbʼajuke spetsanil ja luʼum kʼapubʼal yileʼi.

David juni lekil mandaranum. Ja yeʼn wani syajtay ja Jyoba. Ja yuj, ja jas bʼajtan skʼulan yajni sbʼajinkan ja Jerusalén jaʼ yiʼaj och tiw ja kopre bʼa trato bʼa Jyoba. Wani skʼana oj skʼuluk jun templo bʼa ti oj yaʼa.

Jabʼilik tsaʼan, David skʼulan jun chaʼan mulal. Ja yeʼn wani snaʼa mini lekuk syamjel jun jas junuk bʼa pilan maʼ sbʼaj. Pe jun och akʼwal, yajni tey bʼa yolom snaj, kʼelwani koʼe sok yila jun tsamal ixuk, Bat-seba, ja xcheʼum ja Urías, skʼakʼanum ja David.

David jelni okʼ skʼujol ja Bat-seba, ja yuj skʼana aʼijukjan yi bʼa snaj. Ja statami wajelni bʼa kʼakʼanel. Anto ja David waysok ja Bat-seba; tsaʼan ja David kʼot snaʼ ja Bat-seba oj ajyuk jun yal. David jelni chamskʼujol sok yala yabʼ ja Joab, ja olomal bʼa skʼakʼanumi, aya ekʼ bʼajtan ja Urías ja bʼa kʼakʼaneli bʼa amiljuk. Yajni ja Urías chami, David nupanisok ja Bat-seba.

Jyoba jelni tajki soka David. Sjeka ja yaʼtum Natán bʼa waj yalyabʼ sbʼaja smuliki. Ja bʼa dibujo wa xbʼobʼ awil ja Natán soka Davidi. David jelni tristeʼay yuja jas skʼuluneji, soka Jyoba mini smilaʼa. Pe yala: «Yuja wa kʼulunej ja jastik junuk it bʼa mi lekuki, ojni ajyukawuj jitsan wokol ja bʼa wa naji». ¡Soka David jelni ajyiyuj jitsan wokola!

Bʼajtan, ja yal ja Bat-seba chami. Anto ja bʼajtan yunin ja David, ja Amnón, tarega stʼena ja yijtsʼin Tamar bʼa oj waysok. Absalón, ja pilan yunin ja David, jelni tajki yuja it sok smila ja Amnón. Tsaʼan, ja Absalón skʼulan bʼa jachuk ja ixuk winiki aʼiljuk lek sok skʼulan sbʼaj aʼoch mandaranum. Ja David tixa skʼulan ganar ja tiroʼanel soka Absalón, soka Absalón chami. ¡Jaʼi, ja David jelni ajyiyuj jitsan wokola!

Bʼa yojol ja wokolik it, Bat-seba ajyiyuj jun yal skerem sbʼiʼil Salomón. Yajni ja David awelxa sok jelxa maloʼay, ja skerem Adonías sleʼa modo bʼa oj och mandaranum. Anto ja David yaʼakan jun olomal bʼa tabernáculo sbʼiʼil Sadoc a-stʼol yi aseyte ja bʼa s-olom ja Salomón bʼa oj sjeʼ yeʼnxa ni oj och mandaranum. Tʼusan mas tsaʼan, yajni ja David ayxa yiʼoj 70 jabʼil, chami. Skʼulani mandar 40 jabʼil, soka Salomón yeʼnxa ni ochkan mandaranum.