¡KʼELA! Ja Daniel joyubʼal yuja chojiki. ¡Pe mi jas wa xkʼulajiyi! ¿Wan maʼ xa naʼa jas yuj? ¿Maʼ xchʼika ja Daniel ja bʼa chojik it? La kiltik.

Jun winik sbʼiʼil Darío yeʼnxa mandaranum ja bʼa Babilonia. Ja yeʼn lek wa xyila ja Daniel yuja leka smodo sok yuja sbiboʼil yiʼoji. Darío yaʼ yi jun chaʼan xchol ja Daniel ja bʼa smandaraneli. Yuja it, ja tuk winike yilkʼujolane ja Daniel sok jaʼ it ja jas skʼulaneʼi.

Ja winike wajye ja bʼay ja Darío sok yalawe: «Ah mandaranum, ochelotikon bʼa jun akwerdo sok wa xkʼanatikon oja kʼul juna mandar bʼa ayal 30 kʼakʼu mini june maʼ oj yaʼyi orasyon pilan dyos ma winik, kechantani weʼna, ah mandaranum. Maʼ mi skʼuʼan ojni jipxuk bʼa skʼejnal choj». Darío mi snaʼa jas yuj ja winike skʼanawe oj kʼulaxuk ja mandar it. Ja yeʼn lekni yilaʼa sok stsʼijbʼan ja mandari. Jaxa weʼgo ja mandari mini oj tukbʼuka.

Yajni Daniel yabʼ ja it, waj bʼa snaj sok yaʼ yi orasyon jastal ni kʼajyel wa skʼulan. Ja tantik winik wa xyilkʼujolane wani snaʼawe ja Daniel mini oj yakan yajelyi orasyon ja Jyoba. Jel gustoʼaxiye yujni oj bʼobʼ yujile ja jasa wa skʼanawe bʼa oj skolta sbʼaje yuja Daniel.

Yajni ja mandaranum Darío snaʼa ja jasa wan ekʼeli, jel och stristeʼil. Pe mixa ni oj bʼobʼ stukbʼesa sok tʼilani oj yaʼ mandar ajipjuk ja Daniel bʼa skʼejnal ja choji. Pe ja Darío yala yabʼ ja Daniel: «Wa xmajlay jawa Dyos maʼ waxa waʼteltayi a-skoltaya».

Darío jelni tuk ay xyabʼi ja yuj mi xbʼobʼ och swayel ja akʼwal jaw. Yajni kʼe chiknajuk tʼunuk ja yijlabʼ ja Kʼaʼuji, stulu sbʼaj sok ajnel jomol waj ja bʼa skʼejnal ja choji. Jastal ni waxa wila bʼa dibujo, ja yeʼn yawan ja Daniel: «¡Daniel, yaʼtum ja Dyos sakʼani! ¿Bʼobʼ maʼ skoltaya ja Dyos mixa waʼakan yaʼteltajeli?».

Daniel sjakʼa: «Ja Dyosi sjeka ja yanjeli sok smaka ja stiʼ ja chojiki bʼa mi jas oj skʼulukeki».

Ja mandaranumi jel gustoʼaxi sok sjeka ayawe eluk ja Daniel ja bʼa kʼeʼeni. Anto yala ajipjukekoʼ ja winike matik sleʼawe modo bʼa oj smil-e ja Daniel. Bʼajtanto yuj oj staʼe kʼot ja luʼumi, ja tan chojiki kʼe sbʼaje lokan sok skʼoktalan ja sbʼakileʼi.

Anto ja mandaranum Darío stsʼijbʼanyi yibʼanal ja chonabʼ tey bʼa yoj skʼabʼi: «Ojni xiwanik yuj ja sDyos ja Daniel. Ja Yeʼn wa skʼulan niwak senya. Yeʼnani skoltay ja Daniel bʼa mi jas kʼulajiyi yuja chojiki».