¿WAN maʼ xjulakʼujol sbʼaja oxwane keremtik it? Jaʼi, jaʼa oxe yamigo ja Daniel ja it mi skʼana oj yabʼye waʼelal mi lekuk sbʼaja yeʼnle. Ja swinkil bʼa Babilonia wa xya sbʼiʼiluke Sadrac, Mesac sok Abednego. Pe ¿jas yuj mi wa xkoye sbʼaj mekʼan ja niwan splanta kʼulubʼal dyos jastal wane skʼulajel ja tuki? La kiltik jas yuj.

¿Wan maʼ xjulakʼujol ja mandar jumasaʼ stsʼijbʼunej ja Jyoba, wa sbʼiʼilan ja Lajune Mandari? Ja bʼajtani wa xyala: «Mokni koʼan sbʼaj mekʼan tuk dyosik yuja keʼn». Ja oxwane keremtiki waneni skʼuʼajel ja mandar it, anima skʼulajel ja it wokolniʼa.

Ja mandaranum bʼa Babilonia, ja Nabucodonosor, sjekunej spayjel jitsan ixuk winik matik niwak xchole bʼa oj stoy-e ja niwan splanta dyos sjekunej yajel kʼeʼuki. Wanto chʼak yalyabʼ spetsanil ja ixuk winiki: «Yajni xa wabʼyex ja yokʼelal ja kachoʼiki, ja arpaʼiki soka tuk yamkʼabʼal bʼa kʼinaneli, koʼanik mekʼan sok toyowik ja niwan splanta dyos bʼa oro. Ja maʼ mi xkoʼ mekʼan bʼa oj yaʼ yi stoyjeli ojni jipxuk koʼ bʼa orno wan lek ajleli».

Yajni Nabucodonosor yabʼ ja Sadrac, Mesac soka Abednego mi koʼye sbʼaj mekʼan ja splanta dyosi, jel tajki sok sjeka spayjele sok yaʼato kan pilan ekʼele akoʼuke sbʼaj mekʼan ja splanta kʼulubʼal dyosi. Pe ja yeʼnle wani sjipawe skʼujol bʼa Jyoba sok yalawe yabʼ: «Ja Dyos maʼ wa xkaʼteltaytikoni yeʼnani oj skoltayotikona. Pe anima ja yeʼn mi skoltayotikon, mini oj kokotikon sbʼaj mekʼan ja wa splanta dyos bʼa oro».

Yajni chʼak yabʼ ja it ja Nabucodonosor, ipaxiʼel ja stajkelali. Mojanxta ja bʼa bʼayeʼi ay jun orno, sok sjeka skʼulajel ja it: «Kʼixnayik juke ekʼele mas ja orno». Anto yala yabʼ jujuntik skʼakʼanum bʼa ay lek yipe a-smoch-e ja oxwane keremi sok a-sjip-e koʼ bʼa yojol ja orno. Yuja orno jelxel xa skʼajkʼalili, ja winike matik smochowe ja keremtiki chamye yuja yajlelal ja kʼakʼi. ¿Pe jasa ekʼ sbʼaje ja oxwane keremtiki?

Yajni ja mandaranum yila bʼa yojol ja orno, ja yeʼn jel kʼe xiwuk sok sjobʼo: «¿Mi maʼ oxwane ja maʼ jmochotik sok jipxiye koʼ ja bʼa yojol ja orno?».

«Jaʼi, jachʼni kʼulaxiʼa», xchiye ja yaʼtum jumasaʼ ja mandaranumi.

«Ja keʼn wa xkila chanwane winik wane bʼejyel ekʼ ja bʼa kʼakʼi», xchi ja mandaranumi. «Mi mochubʼaluke sok mi jas wan ekʼel sbʼaje. Sok ja xchanil winiki lajan sok jun anjel.» Ja mandaranumi mojxi och ja bʼa spwertaʼil ja orno sok yawan: «¡Sadrac! ¡Mesac! ¡Abednego! ¡Elanik jan, yaʼtijumik ja Dyos jel niwani!».

Yajni ja keremtik elyejan, spetsanil ja matik teye yilawe mini jas ekʼel sbʼajeʼa. Anto ja mandaranumi yala: «¡Ani yiʼ stoyjel ja sDyos ja Sadrac, Mesac soka Abednego! Yujni sjekakon ja yanjeli bʼa oj skoltay bʼa mi jas oj ekʼ sbʼaje yujni mi koʼye sbʼaj mekʼan pilan dyos bʼa yajelyi stoyjel, kechanta ja sDyoseʼi».

¿Mi maʼ meranuk ja it jun lekil sjeʼjel bʼa toj oj ajyukotik soka Jyobaji?