KʼELA ja pichon wan koʼelkon bʼa s-olom ja winik it. Yeʼn ja Jesús. Ja weʼgo ayxa yiʼoj jun 30 jabʼil, sok ja maʼ tey soki jaʼa Juan. Jnebʼatikta tʼusan sbʼaja Juani. ¿Wan maʼ xjulakʼujol yajni ja María waj yulatay ja sprima Elisabeti? ¡Ja yal alats tey bʼa slukum ja Elisabet kʼe snik sbʼaj yuja sgustoʼili! Ja yal alats jaw yeʼna ja Juani. Pe ¿jasa wane skʼulajel ja Juan soka Jesús ja bʼa dibujo?

Ja Juani wanto xa tʼan ya yiʼ jaʼ ja Jesús bʼa yok jaʼ Jordán. Jachʼ wa xkʼulaji yi jun ixuk winik: wa xmukjikoʼ bʼa yojol jaʼ sok wa x-aji elkʼeni. Jachʼ wa skʼulan ja Juan, ja yuj wa sbʼiʼilan ja maʼ wa xyaʼa yijel jaʼ. Pe ¿jas yuj ya yiʼ jaʼ ja Jesús?

Yujni ja Jesús skʼana yi ja Juan aʼajuk yiʼ jaʼ. Juan wa xya yiʼ jaʼ ja matik wa snaʼawe malaya soka jastik mi lek skʼulunejeʼi. Pe ¿ay maʼ bʼa jas mi lek skʼulunej ja Jesús bʼa oj snaʼ malaya? Miyuk, mini jas skʼuluneja, ja yeʼn jaʼ Yunin ja Dyos koʼelkon bʼa satkʼinal. Ayiʼoj pilan rason yuja skʼana yi ja Juan aʼajuk yiʼ jaʼ. La kiltik jasunkiluka.

Bʼajtanto yuja Jesús oj jakuk ja bʼay ja Juan, ja yeʼn kalpinteroniʼa. Jun kalpintero wa skʼulan jastik junuk sok teʼ, jastal mesa sok yal bankoʼik. Ja statam ja María, José, kalpintero sok yeʼnani sjeʼa yi ja Jesús ja aʼtel jaw. Pe ja Dyos mi sjekakon ja Yunin bʼa oj aʼtuk jastal kalpintero. Ayiʼoj jun xchol jel tʼilan sbʼaja yeʼn, sok kʼotani ja tyempo bʼa oj skʼuluk. Ja yuj bʼa oj sjeʼ ja Jesús koʼelkon bʼa oj skʼuluk ja jas wa skʼana ja sTati, skʼana yi ja Juan aʼajuk yiʼ jaʼ. ¿Lek maʼ yila ja Dyos ja jas skʼulan ja Jesús?

Lek yila, ja yuj, tsaʼan yajni elkʼen ja bʼa jaʼi, jun kʼumal bʼa satkʼinal yala: «Ja it jani ja mero Kunini, jel yaj wa xkabʼi». Chomajkil lajansok ja satkʼinali sjama sbʼaj, sok ja pichon it koʼkon sbʼaja Jesús. Pe mi meran yal chanuk kechanta jun senya, jaʼa yip ja Dyosi.

Ja weʼgo Jesús jelni ja jastik junuk oj spensaraʼuki, ja yuj 40 kʼakʼu ti waj bʼa jun chʼayan lugar. Anto ti waj kʼumajuk yuj ja Satanás. Oxe ekʼele ja Satanás sleʼa modo bʼa oj ya skʼok ja Jesús ja smandar ja Dyosi. Pe ja yeʼn mini skʼulana.

Tsaʼan yuja it, tixa kumxi sok snaʼa sbʼaj jujuntik winik, sok ja yeʼnle ja wajye ja bʼajtan snebʼumane. Jujuntik bʼa yeʼnle sbʼiʼil Andrés, Pedro (chomajkil sbʼiʼil Simón), Felipe sok Natanael (chomajkil sbʼiʼil Bartolomeo). Ja Jesús soka yeʼnle tixa wajye bʼa niwan xchonabʼil Galilea. Ti kʼotye bʼa xchonabʼ ja Natanael, bʼa Caná, bʼa ay jun nupanel, soka Jesús ti skʼulan tiw ja sbʼajtan senya. ¿Wan maʼ xa naʼa jasunkiluka? Ya pax yaʼal tsʼusubʼ ja jaʼi.