KʼELA ja yal kerem wan loʼil soka winike ayxa skʼujoleʼi. Ja yeʼnle jeʼumane bʼa stemplo ja Dyos bʼa Jerusalén, soka yal keremi jaʼa Jesús. Jelxa niwan, ayxa yiʼoj 12 jabʼil.

Ja winike matik wa sjeʼawe bʼa templo jel chamxyabʼye yuja Jesús jel snaʼa sbʼaja Dyosi soka jastik tsʼijbʼunubʼal bʼa Biblia. Pe ¿bʼaxa ay ja José soka María?

Jabʼil jabʼil, José wa xyiʼaj ja spamilya man Jerusalén bʼa oj skʼintaye ja kʼin sbʼiʼil Pascua. Jelni najat ja bʼejyel ja bʼa Nazaret man Jerusalén. Mini maʼ ayiʼoj skarro sok cha mini ay abyon. Ja bʼa tyempo jaw mitoni ayuka. Tʼusan mi spetsaniluk ja ixuk winiki sok ni yok wa xwajye, sok ja yeʼnle wa xyiʼaj yujile oxe kʼakʼu ja bʼejyel man Jerusalén.

José pojxita ja spamilya, ja yuj ja yeʼn tʼilani oj stalnay ja yijtsʼin ixuk soka yijtsʼin winike ja Jesús. Ja jabʼil it, ja José soka María cha wanexa kumxel soka yuntikil ja bʼa Nazaret. Ja yeʼnle wa spensaraʼane ja Jesús tey sok ja tuk ixuk winik wane yajel yi ja bʼejyeli. Pe yajni wanxa ochel akʼwal, ja yeʼnle kʼotye tekʼan, sok mi teyuk ja Jesús. Kʼe sleʼe bʼa yojol ja spamilya jumasaʼ soka tuk yamigoʼiki, ¡pe mi staʼawe! Ja yuj kumxiye bʼa Jerusalén bʼa oj waj sleʼe.

Man staʼawe kʼot, wan smaklajel sok wan yajel yi sjobʼjel ja matik wa sjeʼawe bʼa templo. Spetsanil ja ixuk winiki wa xchamyabʼye yuja jel snaʼa. Pe ja María yala yabʼ: «Kala kerem, ¿jas yuj jachʼ akʼulankitikoni? Jawa tat soka keʼn jel chamkʼujol aytikon wantikon ekʼ lewanel».

Jesús sjakʼa: «¿Jas yuj lom waxa leʼawonexi? ¿Mi maʼ xa naʼawex tini oj ajyukon bʼa snaj ja jTati?».

Jaʼi, Jesús tini wa skʼana oj ajyuk bʼa templo bʼa oj snebʼ sbʼaja Dyosi. Ja keʼntiki tʼilani oj jeʼtik junxta jastal yeʼna, ¿anke meran? Semana sok semana, ja Jesús wani xwaj ja tsomjel bʼa Nazaret. Yuja tolabida wa smaklay ja tsomjeliki jel jitsan ja jastik snebʼa bʼa Biblia. La jnochtik ja lekil sjeʼjeli.