KʼELA ja anjel maʼ jaman yuj ja spwertaʼil ja preso. Wan yajel eluk ja sjekabʼanumik ja Jesús. La kiltik jas yuj lutjiyeʼi.

Tʼusan tyempo ekʼel man ja yip ja Dyosi koʼ sbʼaje ja nebʼumaniki sok jaʼ it ja jas ekʼi. Jun ochkʼaʼuj, ja Pedro soka Juani wajye ja bʼa templo bʼa Jerusalén. Ja tiw, bʼa stsʼeʼel ja bʼa pwerta, tey jun winik mi xbʼobʼ bʼejyuk man pojki. Ja ixuk winiki wa xyiʼaje och ja winik it kʼakʼu kʼakʼu bʼa oj skʼanyi takʼin ja matik wa x-ochye bʼa templo. Yajni ja winik it yila ja Pedro soka Juani, ti ay jas skʼanaʼa. ¿Jasa oj skʼuluke ja yeʼnleʼi?

Kʼotye tekʼan sok kan skʼel-e, ti yala ja Pedro: «Mini ay kiʼoj takʼin, pe oj kawi ja jas kiʼoji. ¡Bʼa sbʼiʼil ja Jesús, kʼeʼan sok bʼejyan!». Anto ja Pedro syama yi ja stojol skʼabʼ ja winiki, sjachakʼeni sok junta brinko kʼe tekʼan sok och bʼejyuk. Ja tsamal senya it jel chamyilawe sok jel gustoʼaxiye ja ixuk winikeʼi.

Ti yala ja Pedro: «Ja senyaʼal it jkʼulantikoni jaʼ yuj ja yip ja Dyosi, ja maʼ ya sakʼwuk ja Jesusi». Malan ja yeʼn soka Juan wane kʼumal, jujuntik ja bʼa olomalik skontraʼe ja Jesús jakye. Jel tajkel aye yujni ja Pedro soka Juani wane xcholjel yabʼ ja ixuk winiki sbʼaja sakʼwelal ja Jesusi. Ja yuj, ja olomaliki syamawe sok xchʼikawe preso ja jekabʼanumiki.

El ja kʼaʼuji, ja tantik olomaliki ajyiyujile jun niwan stsomjele sok skʼulane aʼijukejan ja Pedro, ja Juan soka winik maʼ tojbʼiʼi. Ja olomaliki sjobʼowe: «¿Machunkʼa yaʼa awipex bʼa skʼulajel ja it?».

Ja Pedro yala jaʼ yuj ja yip ja Dyos, ja maʼ ya sakʼwuk ja Jesusi. Ja tantik olomaliki mi snaʼawe jas oj skʼuluke yujni ja niwan senya it mini xbʼobʼ yal-e mi ekʼa, ja yuj yaʼawe yi orden ja jekabʼanumiki mokxa ni xchol-e mas sbʼaja Jesusi, sok ti yaʼawekan awajukeʼa.

Ekʼ ja kʼakʼujiki, sok ja jekabʼanumiki waneni xcholjel sbʼaja Jesusi sok yajel tojbʼuk ja matik koʼele chameli. Ja senyaʼik it kʼe pukxuk ekʼe. Ja yuj jitsan ixuk winik bʼa sutanal ja Jerusalén yiʼajejan ja xchamumeʼi bʼa oj ya tojbʼuke ja jekabʼanumiki. Yuja it, soka ilkʼujol yiʼojeʼi, ja tantik olomaliki syamawe ja nebʼumaniki sok slutuwe preso. ¡Anto ay jas ekʼi!

Jastal ni waxa wila bʼa dibujo, ja bʼa akʼwali, ja yanjel ja Dyosi sjama ja pwerta bʼa preso sok yala: «Kaʼaxik, ochanik ja bʼa templo sok nochowik xcholjel yi ja ixuk winiki». Ja bʼa pilan kʼakʼu jaw, yajni ja tantik olomaliki sjekawe aʼijukejan ja jekabʼanumiki, mixa ni ti ayukeʼa. Tixa staʼawe ja nebʼumaniki bʼa templo sok tixa yiʼawe och bʼa lugar wa stsomo sbʼajeʼi, ja bʼa Sanedrín.

Ja tantik olomaliki yalawe: «Kalatikon ta awabʼyex mokxa ajeʼex mas sbʼaja Jesusi, pe ja weʼnlexi ja bʼutʼuwexta el ja Jerusalén soka sjeʼjel it». Ja jekabʼanumiki yalawe: «Tʼilan oj jkʼuʼuktikon mas ja Dyos jastal jmandaranumtikon yuj ja ixuk winiki». Mini yaʼawekan xcholjela. ¿Mi maʼ jun lekil sjeʼjel bʼa spetsanil ja keʼntiki?