EKʼ JA kʼakʼujiki, ja Jesús sjeʼa sbʼaj jitsan ekʼele soka snebʼumaniki. Bʼa jun ekʼele, sjeʼa sbʼaj sok junuk 500 nebʼumanik. ¿Wan maʼ xa naʼa jasa kʼe sjeʼ yajni sjeʼa sbʼaj soka snebʼumaniki? Jaʼ sbʼaja sGobyerno ja Dyosi. Jyoba sjekakon bʼa Luʼum ja Jesús bʼa oj sjeʼ sbʼaja Gobyerno it. Yajni Jesús sakʼwijani, jastal ni wan sjeʼjel ajyi sbʼaja sGobyerno ja Dyosi, jachʼni cha kʼe skʼuluka.

¿Wan maʼ xjulakʼujol jasunkiluk ja Gobyerno it? Jaʼi, juni meran Gobyerno bʼa Dyos tey bʼa satkʼinal, soka Dyosi yeʼnani sTsaʼunej ja Jesús bʼa oj och Mandaranum ja bʼa sGobyerno. Jastal ni jnebʼatikta, yajni Jesús ya waʼuk jitsan ixuk winik, ya tojbʼuk ja matik maloʼayeʼi sok ya sakʼwuk ja matik chameleʼi. Ja it wa sjeʼa ja jastik jel lek oj skʼuluk yajni xyaʼa smandar bʼa Luʼumi.

¿Jas maʼ oj ekʼuk ja bʼa Luʼumi yajni Jesús xyaʼa smandar mil jabʼil ja bʼa satkʼinali? Spetsanil ja Luʼumi oj pax jun tsamal kʼachinubʼ, mixa oj ajyuk kʼakʼanel, milwanel, koʼel chamel sok mini chamelchʼakel. Jachʼni oj kʼotuka yujni ja Dyosi skʼulan ja Luʼumi bʼa oj pax jun kʼachinubʼ sbʼaja ixuk winiki. Ja yuj ja sbʼej ja kʼachinubʼ skʼulan bʼa Edeni ja bʼa tyempo najate. Yeʼnani ja Jesús oj skʼuluk bʼa oj ya kʼotuk jastal ni wa skʼana ja Dyosi.

Kʼot ja styempoʼil ja Jesús oj kumxuk bʼa satkʼinal. 40 kʼakʼu sjeʼa sbʼaj soka snebʼumaniki, soka yeʼnleʼi wa snaʼawe ja Jesús sakʼwitaniʼa. Bʼajtanto oj yakan ja snebʼumaniki, Jesús yala yabʼye: «Mok elanik ja bʼa Jerusaleni manto xkoʼ abʼajex ja yip ja Dyosi». Ja ipal it jachʼ jastal ikʼ wa xjuwani, ja it jaʼ bʼa oj koltajuke ja nebʼumaniki bʼa yaʼteltajel ja Dyosi. Tixa yalakan ja Jesús: «Ja weʼnlexi oj achol-ex ekʼ bʼa keʼna man bʼa najtik lugarik ja bʼa Luʼumi».

Yajni yala ja it, ay jas ekʼ bʼa jel chamyiljel. Jastal ni waxa wila bʼa dibujo, ja Jesús takal takal och kʼeʼuk bʼa satkʼinal. Tsaʼan jun tsome ason smusuʼele, soka snebʼumaniki mixa xbʼobʼ yil-e. Jesús waj bʼa satkʼinal sok och ya mandar masan bʼa satkʼinal sbʼaja snebʼumanik bʼa Luʼumi.