TSAʼAN yajni ja Pedro soka Juan elye ja bʼa mukubʼal ajyi ja skwerpo ja Jesús, ja María ti kan stuchʼil ja bʼa stiʼ ja kʼeʼeni sok kʼe okʼuk. Anto skʼela och ja bʼa yojol ja kʼeʼeni sok yila chabʼ anjelik, jastal ni sjeʼa ja dibujo ekʼta. Ja anjeliki sjobʼowe yi ja María: «¿Jas yuj wana okʼeli?».

Ti yala ja María: «Ay maʼ yiʼaj ta ja skwerpo ja Kajwali, sok mi xnaʼa bʼa wajta yaʼekana». Ti sutusbʼaja sok yila jun winik. Ja winiki sjobʼo: «¿Machʼa waxa leʼa?».

Ja María ekʼ skʼujol ja winiki yeʼn ja maʼ wa stalnay ja lugar tiw, sok bʼobʼta yeʼnani ja maʼ yiʼaj ja skwerpo ja Jesusi. Ja yuj yala: «Ta weʼna wiʼaj ja skwerpo ja Kajwali, alakabʼ bʼa awaʼuneja». ¡Pe ja winiki jaʼa Jesusi! Ja María mi snaʼa sbʼaj yujni ja yeʼn ay sok pilan skwerpo. Pe yajni kʼumaji bʼa sbʼiʼili, ja María snaʼa yeʼnani ja Jesusi. Ti weʼgo waj bʼa oj waj yal yabʼ ja nebʼumaniki sok yala: «¡Kilata ja Kajwaltiki!».

Tsaʼan ja bʼa kʼakʼu jaw, chawane ja nebʼumaniki wajume bʼa lugar sbʼiʼil Emaús, sok jun winik och tajuke. Ja nebʼumaniki jel tristeʼaye yuja xchamelal ja Jesusi. Pe yajni wajume bʼejyeli, ja winik jaw kʼe xchol jitsan jastik junuk bʼa Biblia. Sok jachuk ja yeʼnleʼi kujlaji skʼujole. Yajni jijliye bʼa oj waʼuke soka yajni ja winiki ya yi jun orasyon sbʼaja jas oj yabʼyeʼi, ti snaʼawe sbʼaj ja winik jaw jaʼa Jesús. Soka yeʼn tixta xchʼaya sbʼaja. Ja nebʼumaniki ti kumxiye bʼa Jerusalén bʼa waj yal-e yabʼ ja jekabʼanum jumasaʼ ja jasa ekʼi.

Yajni wan ekʼel ja it, ja Jesús cha sjeʼa sbʼaj soka Pedro, soka tuki jel gustoʼaxiye yajni yabʼye ja it. Anto ja chabʼ nebʼumaniki wajye bʼa Jerusalén sok ti staʼawe tiw ja tuk jekabʼanumiki. Yalawe ja Jesús sjeʼa sbʼaj ja wajume bʼejyeli. Yajni wane xcholjeli, ¿wan maʼ xa naʼa ja jas jel chamyabʼalil ekʼi?

Kʼela ja dibujo. Ama lutan ay lek ja pwerta, ja Jesusi sjeʼa sbʼaj ja bʼa yojol ja kwarto. ¡Janekʼto gustoʼil sbʼaja nebʼumaniki! Jun kʼakʼu jel chaʼanyabʼalil. ¿Oj maʼ bʼobʼ awal jaye xa ekʼele sjeʼa ta sbʼaj ja Jesusi? ¿Joʼe xa maʼ ekʼele?

Ja jekabʼanum Tomasi mini ti ajyi yajni ja Jesús sjeʼa sbʼaj ja bʼa yojol ja kwarto lutan leki. Ja yuj ja nebʼumaniki yalawe yabʼ: «¡Kilatikonta ja Kajwaltiki!». Pe ja Tomás yala bʼa oj skʼuʼuk tʼilan yeʼn oj yile. Ekʼel xa waxake kʼakʼu soka nebʼumaniki ti aye tsoman bʼa jun kwarto lutan lek, ja ekʼele it tixa ay smoke ja Tomasi. Junta chʼaykʼujol, ja Jesús sjeʼa sbʼaj ja tiw, soka Tomasi tixa skʼuʼana.