JA KEREM waxa wila soka jekabʼanum Pablo jaʼa Timoteo. Ja yeʼn tey ja snaj soka spamilya bʼa chonabʼ Listra. Ja snani sbʼiʼil Eunice, jaxa smexepi Loida.

Ayxa jun jabʼil ja ti ajyiye sbʼajtanil ekʼele xcholjel ja il ja Pablo soka Bernabé. Jaxa weʼgo ja kumxel soka yamigo Silasi, sok jaxa yoxil ekʼele ja Pablo wan yulatajel ja Listra.

¿Wan maʼ xa naʼa jas wan jobʼjel yi ja Timoteo yuja Pablo? Wan jobʼjel yi ta wa skʼana oj wajsok ja Pablo soka Silasi bʼa oj koltanuk xcholjel yabʼ ja ixuk winik bʼa najtik lugarik.

Ja Timoteo lekni xyabʼa ja oj smojtay ja Pablo soka Silasi, ja yuj, tʼusan tsaʼan, ja Timoteo yaʼanikan ja spamilya. Pe bʼajtanto yuj oj jnebʼtik sbʼaja snajtilik sbʼejyel ja Pablo, la kiltik jasa wan ekʼeljan sbʼaj. Ekʼta 17 jabʼil man ja Jesús sjeʼa sbʼaj soka Pablo ja bʼa bʼej Damasco.

Ajuluk akʼujol, ja Pablo waj bʼa Damasco bʼa oj yixtalaʼuk ja snebʼumanik ja Jesús, pe ja weʼgo jun xa nebʼuman. Tsaʼan, jujuntik kontraʼanum sleʼawe modo bʼa oj smil-e ja Pablo, pe ja tuk nebʼumaniki skoltaye bʼa mi oj miljuk. Ja yeʼnle xchʼikawe bʼa jun moʼoch sok yawe koʼuke koʼ bʼa spatik ja sbardaʼil ja chonabʼi.

Tsaʼan, ja Pablo ekʼ xcholjel bʼa Antioquía. Tini bʼa chonabʼ it aji sbʼiʼiluke sbʼajtanil ekʼele ja ixuk winik wa stsomo sbʼajeʼi nebʼumanik bʼa Kristo. Tʼusan tsaʼan tixa jekji ja Pablo soka Bernabé bʼa jun najat bʼejyel bʼa xcholjel man najtik lugarik. June ja bʼa chonabʼik yulatayeʼi jaʼa Listra, bʼa kulan ja Timoteo.

Jun xa jabʼil tsaʼan, ja Pablo kumxel xa yajkʼachil ekʼele bʼa jun xchabʼil snajat sbʼejyel ja bʼa Listra. Yajni ja Timoteo wajsok ja Pablo soka Silasi, ¿wan maʼ xa naʼa bʼa wajyeʼa? Kʼela ja mapa, sok la jnebʼtik.

Bʼajtan, wajye bʼa chonabʼ mojan yiʼoj ja Listra, ja Iconio. Tixa stojowe bʼa jun chonabʼ sbʼiʼil Antioquía. Tsaʼan wajye bʼa Troas, tixa cha ekʼye bʼa Filipos, Tesalónica sok Berea. ¿Wan maʼ xa wila ja bʼa mapa ja chonabʼ Atenasi? Ti och xchol tiw ja Pablo. Tsaʼan, ti ajyiye bʼa Corinto xcholjel jun jabʼil sok snalan. Tixa cha ekʼye bʼa Éfeso sok mixa albʼiye. Anto ochye bʼa jun barko sok kumxiye man Cesarea, sok tixa kʼeye kʼe bʼa Antioquía, bʼa kʼajyel wa xjijli ja Pablo.

Ja yuj ja Timoteo bʼejyiʼekʼ jitsan lek kilometroʼik skoltajel ja Pablo xcholjel ja «lekil rasoniki» sok yajel kulan yajkʼachil kongregasyonik. Yajni la kʼiʼi, ¿oj maʼ akʼulabʼaj yaʼtum toj ja Dyos jastal skʼulan ja Timoteo?