JA WINIK mekʼan ekʼ waxa wila bʼa dibujo yeʼn ja Estebani, jun nebʼuman toj bʼa Jesús. ¡Pe kʼela jasa wan ekʼeli! Ja winike it wane xchʼojel ton ja Estebani. ¿Jas yuj jel skorajaʼe sok yuja jachʼ wane skʼulajel yiʼi? La kiltik.

Ja Dyos wani skoltajeljan ja Esteban bʼa oj skʼuluk niwakik senya. Ja winike it mini tʼun lek xyilawe ja jas wa skʼulan ja Estebani, sok kʼeye kʼumal soka yeʼn yuja wa sjeʼayi ja smeranil ja ixuk winiki. Pe ja Dyosi yaʼ yi sbiboʼil ja Estebani, soka yeʼn xcholo ja jastik wa sjeʼawe ja winike it mini stojoliluka. Yuja it ja winikeʼi kʼe yilkʼujoluke mas, ja yuj syamawe sok yiʼaje och bʼa Sanedrín sok chomajkil jujuntik ixuk winik bʼa oj yal-e abʼal bʼa yeʼna.

Ja mero olomal bʼa templo sjobʼo yi ja Estebani: «¿Smeranil ja jas wane yaljeli?». Ja yeʼn sjakʼa sok jun tsamal snajtil loʼil bʼa Biblia. Yajni chʼak yal ja sloʼili, yala ja bʼa tyempo najate winike yilkʼujolane ja yalumanik ja Dyosi sok yala: «Jachʼni waxa kʼulanex ja weʼnlexi. Ja milawex ja Jesús, yaʼtum Dyosi, sok mini xa kʼuʼanex ja smandariki».

¡Jelni kʼe skorajaʼe ja olomaliki yajni yabʼye ja jas yala ja Estebani! Xjatsʼatsʼi ja yeje yuj ja skorajaʼeʼi. Pe yajni ja Esteban sjacha ja sat bʼa satkʼinal, ti yalaʼa: «¡Kʼelawilex! Wa xkila ja Jesús bʼa satkʼinal tekʼan ekʼ bʼa stojol skʼabʼ ja Dyosi». Ja winike it smaka ja xchikineʼi sok kʼe smakʼ-e ja Estebani, ti skichaweʼel bʼa stiʼ ja chonabʼi.

Ti sopo ja spal kʼuʼeʼi sok yawe yi ja kerem Saulo bʼa oj stalnay. ¿Waxa wila bʼay ja Saulo? Anto ja winike och xchʼoje ton ja Estebani. Jastal ni waxa wila bʼa dibujo, ja Esteban koʼ mekʼan sok yaʼ yi orasyon ja Dyosi: «Jyoba, moka wa stup-e soka jas mi lek wane skʼuljeli». Ja yeʼn wani snaʼa jujuntik bʼa yeʼnle loʼlubʼale yuja olomalik skontraʼe ja Jesús. Yajni ja Esteban chʼak yal ja it, ti chama.

Yajni ay maʼ wa skʼulanawi jun jasunuk mi lekuk, ¿wan maʼ xkʼana wa stupe, ma waxa kʼana yi ja Dyos aya koʼ sbʼaj wokol? Mini Esteban soka Jesús skʼulane ja jaw. Ja yeʼnleʼi sjeʼani lek ja smodoʼe sok chomajkil ja matik mi lek iljiye yuji. La jnochtik ja lekil modoʼal jaw.