XETʼAN 1
Leʼawik ja Dyosi bʼa gusto oj ajyuk jawa nupanelexi
«Ja maʼ scʼulanexi, scʼulan ixuc soc cho scʼulan huinic.» (Mateo 19:4)
Ja Jyoba a Dyos yeʼn ya nupanuk ja bʼajtan winiki soka bʼajtan ixuki. Ja Biblia wa xyala ja yeʼn skʼulan ja bʼajtan ixuki sok «ti yiʼjan yi ja winiki». Ja Adán jelni gustoʼaxi, ja yuj yala: «Ja iti jbʼakelxaniʼa sok jbʼakʼtelxaniʼa» (Génesis 2:22, 23). Ja Jyoba wa skʼana aʼajyuke gusto ja nupanum jumasaʼ.
Yajni june maʼ wa xnupani, bʼobʼta oj spensaraʼuk jel tsamal sok jel toj oj ajyuk. Pe anima ja nupanumiki jel skʼana sbʼaje ojni ajyuk yujile wokol (1 Corintios 7:28). Ja bʼa poyeto it oja taʼ rasonik bʼa Biblia sok, taʼa kʼulan ja jas wa xyala ojni koltanuk bʼa gusto aʼajyuk jawa nupaneli soka wa pamilya (Salmo 19:8-11).
1 KʼULAN JA CHOLAL YAʼUNEJAWI JA JYOBA
JA JAS WA XYALA JA BIBLIA: Ja tatamal yeʼn olomal ja bʼa pamilya (Efesios 5:23).
Ta weʼn tatamala, ja Jyoba wa smajlay oja yajtay jawa cheʼumi (1 Pedro 3:7). Ja Jyoba skʼulan ja ixuki jastal smoj ja winiki, soka yeʼn wa skʼana ja tatamali a-skis lek ja xcheʼumi sok a-syajtay (Génesis 2:18). Yuja jel skʼanaʼi jani bʼajtan oj waj skʼujol ja jas wa xcham skʼujol ja xcheʼumi yuja yeʼn (Efesios 5:25-29).
Ta weʼn cheʼumala, ja Jyoba wa smajlay bʼa oja kis lek jawa tatami sok oja koltay ja bʼa cholal akʼubʼal yiʼi (1 Corintios 11:3; Efesios 5:33). Koltay sok spetsanil akʼujol sok gusto lek (Colosenses 3:18). Ta jachʼ waxa kʼulan, jelni chaʼanyabʼalil oj yil-a jawa tatami sok chomajkil ja Jyoba (1 Pedro 3:1-6).
JA JAS OJ BʼOBʼA KʼULUKI:
-
Jobʼoyi jawa nupi jasun mas oj bʼobʼa kʼuluk bʼa oj kʼotan jun lekil tatamal ma jun lekil cheʼumal. Maklay lek ja jas wa xyalawabʼi sok kʼulan ja janekʼ wa xbʼobʼawuji
-
Naʼa stekʼjel. Wa xyiʼaj tyempo ja tatamal snajel ja jas wa skʼulan gusto ja xcheʼumi sok chomajkil ja cheʼumal sbʼaja statami
2 JEʼA WA XCHAMA KʼUJOL MERAN JA JASTAL AY XYABʼ JAWA NUPI
JA JAS WA XYALA JA BIBLIA: Tʼilan oja wayi stʼilanil ja jas wa skʼana jawa nupi (Filipenses 2:3, 4). Yajxta ila jawa cheʼumi, ajuluka kʼujol ja Jyoba wa smajlay ja yaʼtijumiki tsamalxta a-sjeʼ ja smodoʼe (2 Timoteo 2:24). Pensaraʼan lek jastal oja wal ja jasunuki, pes ja Biblia wa xyala: «Ayni ja matik mi spensaraʼan ja jas wa xyala jastal ja syajbʼesnel jun espada, pe ja yakʼ ja matik bibo wa x-ajnani» (Proverbios 12:18). Ja Jyoba oj skoltaya bʼa oj kʼumanan sok syajulal akʼujol sok lekil modo (Gálatas 5:22, 23; Colosenses 4:6).
JA JAS OJ BʼOBʼA KʼULUKI:
-
Kʼanayi ja Dyos a- skoltaya bʼa aʼajyuka lamanil sok juna pensar jaman bʼajtanto yuj oj kʼumanan soka wa nupi sbʼaj jun jasunuk jel tʼilan
-
Pensaraʼan lek bʼajtan ja jas oja wal sok jastal oja wale
3 ILA JASTAL JUN LAJAN AʼTEL
JA JAS WA XYALA JA BIBLIA: Yajni jun winik sok jun ixuk wa xnupaniye «quechan xta june aye» (Mateo 19:5). Pe chawaneniʼa sok ayni ekʼele tuktukil ja jas oj spensaraʼukeʼi. Ja yuj, jel tʼilan ja weʼnlex oja nebʼ-ex bʼa lajan oj ajyuk jawa pensarexi sok snajel jastal ay xyabʼ jawa cheʼumi ma wa tatami (Filipenses 2:2). Ja spensarajel jachuki jelni tʼilan ja yajni xa kʼulanex jun jasunuk. ¿Jastal wa xkʼulaxi? Ja Biblia wa xyala: «Yajni wa xjobʼxi, ja jas oj kʼulaxuki wa x-elkʼot lek» (Proverbios 20:18). Aʼakan ja rasonik bʼa Biblia a-stoj-ex ja yajni xa kʼulanex jun jasunuk jel tʼilan (Proverbios 8:32, 33).
JA JAS OJ BʼOBʼA KʼULUKI:
-
Mi kechanta oj ochan loʼil soka wa nup sbʼa yibʼanal jastik junuk, chomajkil sbʼaja jastal aya xa wabʼi
-
Jobʼoyi bʼajtan jawa nupi bʼajtanto yuj oja kʼapabʼaj skʼulajel jun jasunuk
a Ja Biblia wa sjeʼa ja sbʼiʼil ja Dyosi jani ja Jyoba.
