XETʼAN 3
Jastal stojbʼesel ja kʼumaliki
«Pero ja mas tʼilani, yaj xa huab abajex tola vida [...]. Ja syajal ja jcʼujoltiqui huax xchʼaya snaajel jitzan ja mulali.» (1 Pedro 4:8)
Yajni jun ixuk sok jun winik wa xnupaniye, wani x-ajyiyujile wokol yuja tuk ja jastal wa spensaraneʼi, ja jastal wa xyabʼye ja jasunuki ma sbʼaja jastal kʼiyejani. Ma bʼobʼta ja wokolik ti wa xjak bʼa jwera ma mi wanuke smajlajel.
Lajansok ja mas leki jani moka kis ja jas wan ekʼeli, pe ja Biblia wa xyaʼa rasonik sbʼaja jas oja kʼuluki (Mateo 5:23, 24). Oja taʼ ja slekilal taʼ waxa kʼulan jas wa xyala ja rasonik bʼa Biblia.
1 LOʼLANAN SBʼAJA KʼUMALI
JA JAS WA XYALA JA BIBLIA: «Ay jun styempoʼil [...] bʼa kʼumanel» (Eclesiastés 3:1, 7). Pila tyempo bʼa oj loʼlanan sok jawa nup sbʼaja kʼumali; jamayi jawa kʼujoli sbʼaja jastal aya xa wabʼi soka jas waxa pensaraʼan sbʼaja kʼumal jaw. Mok jas anakʼyi (Efesios 4:25). Anima tajkel aya, akuchukawuj bʼa mok tiroʼanansok. Sjakʼjel jachʼ laman sbʼaj jun kʼumal bʼa mey stʼilanil wani skʼulan bʼa mok niwanbʼuk el (Proverbios 15:4; 26:20).
Sok anima mi akwerdo aya soka wa cheʼumi ma wa tatami, mokni awakan sjejel lekil modoʼal; yajtay sok kisa (Colosenses 4:6). Moka wakan bʼa tsaʼan bʼa stojbʼesel ja kʼumali, sok moka wakan akʼumajelabʼajex (Efesios 4:26).
JA JAS OJ BʼOBʼA KʼULUKI:
-
Aʼawik kulan jun ora bʼa oj bʼobʼ kʼumananik sbʼaja kʼumali
-
Yajni jawa nup wan kʼumal, moka kʼutsyi ja jas wan yaljeli. Pes ojni kʼotuk ja yoraʼil oj jkʼumanan ja weʼn
2 MAKLAY SOK ABʼAN STOJOLIL
JA JAS WA XYALA JA BIBLIA: «Yaj xa huab abajex como jastal ja mero ja hua huermano abajexi porque jun ahuermano, sbej ni mas to yaj oja huabi que yuj ja huen mismo» (Romanos 12:10). Jelni tʼilan oja naʼ smaklajel sok yabʼjel stojolil jas yuj jachʼ wa spensaraʼan jawa nupi. Ila jastal juna moj sok moka kʼulabʼaj niwan (1 Pedro 3:8; Santiago 1:19). Moka jeʼ lajansok wana smaklajel. Jani yajni wa xbʼobʼi, aʼakan ja jas wana skʼulajel sok pila tyempo bʼa smaklajel lek jawa cheʼumi ma wa tatami, sok jobʼoyi ta wa xbʼobʼ loʼilananik tsaʼan. Ta waxa wila jawa nup jastal juna moj aʼtel sok mi jastal juna kontra, mi wegoxta oj kʼeʼuka wolom (Eclesiastés 7:9).
JA JAS OJ BʼOBʼA KʼULUKI:
-
Maklay sok moka lut jawa pensar sbʼaja jas wa xyala wabʼ jawa nupi, anima mi lekukxa wabʼ
-
Ila ja jas mero wa xkʼan yal jawa nupi, ja jastal wa sjeʼa ja smodo soka jastal wan yaljel
3 TIMAYI SKʼULAJEL
JA JAS WA XYALA JA BIBLIA: «Wani x-ajyi slekilal bʼa spetsanil tikʼe tsatsal aʼtel, pe ta kechan kʼa wa x-alxi lomniʼa» (Proverbios 14:23). Mi kechanta snajel kʼotel lajan jastal stojbʼesel jun kʼumal, tʼilan oj cha kʼulaxuk. Bʼobʼta wokolni skʼulajela, pe ojni awil slekilal (Proverbios 10:4). Ta lajan wala aʼtiyex, oj «ataʼ lekil atsakolex yuja tsatsal awatelexi» (Eclesiastés 4:9).
JA JAS OJ BʼOBʼA KʼULUKI:
-
Pensaraʼan ja jas oj bʼobʼa kʼulukex jujune sbʼaj jastal stojbʼesel ja kʼumali
-
Ilawik jachʼ tikʼan janekʼ bʼobʼelawujilex slajel
