Jpetsaniltik wani xmakunikujtik ja takʼini bʼa smanjel ja jas wa xmakuniyuj ja pamilya (Proverbios 30:8). Pes yujni «ja takʼini wa xkoltani» (Eclesiastés 7:12). Ayni ekʼele wokol kʼumanel sbʼaja takʼini ja bʼa pamilya, pe moka wakan ja jaw ayijan wokol ja bʼa wa nupaneli (Efesios 4:32). Sbʼejni mas lek sjipjela kʼujol soka wa nupi sok xchapjel lajan jastal syamjel ja takʼini.

JA JAS WA XYALA JA BIBLIA: «Quʼelahuil ja huenlexi, ta huaxa cʼana oja cʼuluquex jun nihuan naitz, bajtan oja cʼuluquex pensar ta oja taex ja taquʼini ba oj chʼac acʼuluquexi» (Lucas 14:28). Jel tʼilan lajan oj ochanik akwerdo sbʼa jastal yajel makunuk ja takʼini (Amós 3:3). Chapawik jasunkiluk oja man-ex soka janekʼ oj bʼobʼa chʼak-ex (Proverbios 31:16). Kechan yuj snajel ay nolan takʼin, mi wa stojolan ojxta aman-ex jastik junuk. Kechanta yamawik sbʼaja janekʼ aya wiʼojexi sok aʼa kwidadoʼex bʼa mok kʼeʼuk ajelex (Proverbios 21:5; 22:7).

JA JAS OJ BʼOBʼA KʼULUKI:

• Ta ayto kʼa kanawujilex tʼun nolan takʼin, chapawik lajan jastal oja wawex makunuk

• Ta mi xyaʼa ja takʼini, chapawik lajan sbʼa jastal mi jel oja chʼak-ex. Jun sjejel, yajelkan smanjel jastik junuk bʼa mi jel tʼilanuk

JA JAS WA XYALA JA BIBLIA: «La xa jchʼay jcʼujoltic ja mentira. Cuando huantic loil soc ja jmojtiqui, la caltic ja smeranili porque puro quermano jbajtic tac» (Efesios 4:25). Ala yabʼ jawa nup ja smeranil sbʼaja janekʼ waxa kʼulan ganar soka janekʼ waxa chʼaka.

Tolabida ala yabʼ bʼajtan jawa cheʼumi ma wa tatami ja yajni oja yam jitsan takʼini (Proverbios 13:10). Yajni waxa walawex sbʼaja jastik junuk it ojni skoltayex bʼa aʼajyuk slamanil ja bʼa wa nupaneli. Moka kʼel jawa takʼini kechanta weʼna abʼaj, chomajkil sbʼaj jawa pamilya (1 Timoteo 5:8).

JA JAS OJ BʼOBʼA KʼULUKI:

• Ochanik akwerdo sbʼaj janekʼ oj bʼobʼa chʼak-ex jujune bʼa mi tʼilanuk sjobʼjelyi jawa nupi

• Moka majla oj jak jun wokol soka takʼini bʼa tito oj ochanik loʼil