JA Jyoba snaʼani oj kʼotuk ja skʼakʼujil ja sKerem jel skʼanaʼi oj yiʼ wokol sok oj chamuk. Ja jas tsʼijbʼunubʼal bʼa Génesis 3:15 jachʼtik ya chiknajuk. Bʼa oj snaʼ ja ixuk winiki janekʼto syajal oj yabʼ ja Jyobaji yajni xmilji yi ja sKeremi, ja yeʼn yala atsʼijbʼajukan bʼa yojol ja Bibliʼa jun sjejel, jaʼa yajni skʼana yi ja Abrahani a-smil ja skerem jel skʼanaʼi, ja Isaaki.

Ja Abrahani wani sjipa lek skʼujol bʼa Dyos. La ka jul jkʼujoltik, ja Jyobaji skʼapa yi ja Koltanum oj jakuki tini oj el bʼa yintil ja Isaaki. Ja Abrahani wani snaʼa ta cham ja Isaaki ja Dyosi ojni bʼobʼ cha ya sakʼwuk jana, ja yuj ja Abrahani skʼuʼani oj skʼap ja skeremi. Pe, yajni ojxa smil ja Isaaki, ja Jyobaji sjeka jun anjel bʼa oj ya kʼot tekʼan ja Abrahani. Ja Dyosi stoyo ja winik it yuja sok spetsanil skʼujol oj yaʼ ajyi ja jas jel skʼana, ja skeremi. Chomajkil ja Dyosi yal yabʼ yajkʼachil ekʼele ja Abrahani spetsanil ja jastik skʼapunej yiʼi ojni kʼotuka.

Tsaʼan, ja Isaaki ajyi chabʼ skeremtik, Esaú sok Jacob. Ja Esauji jelni tuk waja yeʼna, pe, ja Jacobi chaʼani yabʼalil yila ja jastik junuk bʼa Dyosi, ja yuj ja Dyosi yaʼ yi slekilal. Ja Dyosi stukbʼes yiʼ ja sbʼiʼil yiʼoj ajyi, Jacob, sok ya sbʼiʼiluk Israel. Jaxa lajchawe yuntikili yeʼn paxye ja olomal jumasaʼ ja bʼa lajchawe kʼole bʼa xchonabʼil Israeli. Pe, ¿jastal paxi ja pamilya jaw jun niwan chonabʼ?

Jitsan jastik junuk ekʼi yajni ja Joseʼi, june ja skeremtik ja Jacobi, kʼe iljuk kontra yuj ja sbʼankil jumasaʼ. Ja yeʼnleʼi xchonowe jastal moso ja yijtsʼineʼi. Ja matik xchonowe yiʼi tiʼ yiʼaje man bʼa slujmalil Egipto. Ja Dyosi mini ya kan stuchʼil ja yaʼtum jaw mix xiwi. Anke ekʼ sbʼa tsatsal wokol ja bʼa Egipto, soka tyempo ja Joseʼi tsaji yuj ja Faraoni, ja mandaranum bʼa Egipto, bʼa oj ajuk yi jun niwan xchol. ¡Orani lek aji yi ja xchol jaʼwa! Pes ja bʼa kulan ja stati ekʼ jun waʼin, ja yuj ja Jacobi sjeka ja skeremtiki bʼa oj waj sman-e swaʼele man bʼa Egipto. ¿Machʼa maʼ kajan sbʼaj xchonjel ja waʼelali? ¡Jani ja Joseʼi! Bʼa jun tsomjel jel tsamal, bʼa staʼa sbʼaj sok yajkʼachil ekʼele sok ja smoj-alijel jumasaʼ, ja Joseʼi yaʼani sperdona pes ja sbʼankiliki jelni snaʼawe malaya yuj ja jas skʼulane yiʼi. Tsaʼan, ja Joseʼi yala yabʼ ja sbʼankil jumasaʼ awaj yiʼekon snolanal ja spamilyaʼeʼi sok ajakuke kulan bʼa Egipto. Ja Faraoni yaʼ yi ja spamilya ja Joseʼi ja luʼum mas lek bʼa Egipto, bʼa luʼum jaw kʼe staʼ jastik sbʼaje sok kʼe jitsanbʼuke. Ja Joseʼi snaʼani yeʼn ja Jyobaji ja maʼ koltaniʼi bʼa oj ekʼuk ja jastik junuk it pes jachuk oj kʼotuk ja jastik skʼapuneji.

Ja awel Jacobi tini ajyi sakʼan bʼa Egipto, bʼa yojol ja niwan spamilya, man el ja yikʼi. Ja yajni ojxta chamuki, ja yeʼn yala ja Koltanum kʼapubʼali, ojni waj jun Mandaranum jel yip, sok tini oj el bʼa yuntikil ja skerem sbʼiʼil Judá. Jabʼilik tsaʼan, ja Joseʼi yala oj kʼotuk ja skʼakʼujil ja Dyosi oj yaʼ eluk snolanal ja spamilya ja Jacobi bʼa slujmalil ja Egipto.

(Akʼubʼal eluk bʼa Génesis skapituloʼil 20 man 50 sok bʼa Hebreos 11:17-22.)