EKʼNI jastal yalunej ja Dyosi, ja Israeli spila sbʼaj tʼusan mas tsaʼan yajni ja Salomoni sjipa kan yaʼteltajel ja Jyobaji. Ja Rehoboami, ja skerem och kan jastal slokʼol ja Salomoni, jelni tsats yaʼa ja smandara. Ja yuj, lajune ja bʼa lajchawe kʼole bʼa Israeli spila sbʼaj sok yawe kulan jun yajkʼachil mandar, ja mandaranum bʼa norte. Jaxa chabʼ kʼole mi yawe kan yiʼ spatik ja mandar yaʼa kulan ja David bʼa Jerusaleni, yeʼnle wajye ja mandaranum bʼa suri ja tey bʼa Judaji.

Yuja mandaranumik, bʼa norte soka bʼa suri, mi skʼuʼane ja smandar ja Jyobaji sok mini sjipawe spetsanil skʼujole smok, ja chonabʼik jaw mini ajyiye sakʼan tsamal sok laman tolabidaʼa. Pe, ja mandaranum jelxani jelxiʼi ja bʼa norte, pes yajni kechan kʼe yatʼan mandari tixtani yaʼa kulan yaʼteltajel ja kʼulubʼal dyosi. Anke ja Dyosi sjeka aluman jumasaʼ jastal Elías sok Eliseo, ja yeʼnleʼi yawe sakʼwuk jujuntik ixuk winik, ja israʼelenyoʼiki mini skisaweʼa. Jachuk, ja Dyosi yaʼ kan ja xchonabʼil Asiria aya xchʼay snajel ja mandaranum bʼa norte.

Ja mandaranum bʼa suri, bʼa Judaji, albʼitoni tʼusan mas ja 100 jabʼili, pe, chomajkil ja Dyosi sjekani yile kastigoʼa. Kechantani jujuntik mandaranum smaklaye ja jas yalawe ja aluman sjeka ja Dyosi sok skoltaye ja israʼelenyoʼi bʼa oj kumxuke sok ja Jyobaji. June ja bʼa yeʼnleʼi ja waj ja Josiasi, ja yeʼn xchʼaya el snajel ja yaʼteltajel kʼulubʼal dyosi sok stojbʼes yajkʼachil ekʼele ja stemplo ja Jyobaji. Yajni wane stojbʼeseli, staʼawe bʼa templo jun kopya ja bʼa Mandar yaʼ yi ja Dyos ja Moisesi. Kʼot man bʼa skʼujol ja jas smakla yi, ja yuj skʼujulan mas bʼa oj xchʼay snajel ja yaʼteltajel kʼulubʼal dyosi.

Ajulasbʼajni, pe, ja matik och kan slokʼol ja Josiasi mini snochowe ja slekil smodoʼa. Ja yuj ja Jyobaji ya kan ja kʼakʼanum bʼa Babilonia a-syam-e kan ja slujmalil ja Judaji sok aya chʼay snajel ja Jerusaleni sok ja stemploʼi. Ja israʼelenyoʼik kanye sakʼani ijiye och bʼa xchonabʼil Babilonia jastal presoʼanum. Ja Dyosi yala man x-ekʼ 70 jabʼil tito oj kumxuke bʼa slujmalileʼi. Ja slujmalil ja Judaji kani bʼaʼan lom spetsanil ja tyempo jaw.

Mini jun yintil ja mandaranum Davidi oj kulanuk ja bʼa kujlayubʼi man xjul ja Mandaranum kʼapubʼali, ja Mesiasi. Tʼusan mi spetsaniluk ja matik och mandaranum bʼa yintil ja Davidi sjeʼawe ja ixuk winik mulanumi mini xmakuni bʼa yeʼn oj skʼul mandar. Kechantani ja Mesiasi wa snaʼa jastal oj ya tsamal ja smandari. Ja yuj, ja Jyobaji yala yabʼ jachuk ja tsaʼanxta mandaranum bʼa yintil ja Davidi: «Ja korona [...] mini maʼ oj sbʼajuk man xjak ja maʼ ni mero sbʼaji, sok yeʼnani oj kayiʼa» (Ezequiel 21:26, 27).

(Akʼubʼal eluk bʼa 1 bʼa Reyes, 2 bʼa Reyes, sok 2 Crónicas skapituloʼil 10 man bʼa 36 sok Jeremías 25:8-11.)