¿LEK maʼ oj waj kujtik ja ta wa xkʼuʼantik ja smandar ja Jyobaji? Bʼa oj jnatik tʼilani oj jpaklaytik ja rason wa xyaʼa bʼa Yabʼali. ¿Wan maʼ xmakuni kujtik ja rason wa xyaʼaʼi? ¿Wan maʼ skoltayotik bʼa oj tojbʼuk ja sakʼaniltiki? Bʼa sjuʼunil ja Proverbios, ja mandaranum Salomoni stsomo jitsan lekil rason wa skoltayotik kʼakʼu kʼakʼu ja bʼa sakʼaniltiki. La kiltikwil jujuntik sjejel.

La jip jkʼujoltik bʼa Dyos. Tʼilani oj jip jkʼujoltik bʼa Dyos pes jachuk lekni oj kil jbʼajtik sok ja yeʼn. Ja Salomoni stsʼijbʼan: «Jipa spetsanil jaʼwa kʼujol bʼa Jyoba, moka jipa kʼujol ja bʼa jas waxa naʼa. Bʼa spetsanil jaʼwa bʼeji aʼatʼabʼan wa kʼujol, jaxa yeʼn ojni stoj jaʼwa bʼeja» (Proverbios 3:5, 6). Yajni wa xkatikan a-stoj-otik ja Dyosi sok kʼuʼabʼal wala ajyitik sok wa xjeʼa tik wa xjipa jkʼujoltik bʼa yeʼna. Ta jachʼ kʼa wa xkʼulantik wanotikni yajel gusto axuk ja skʼujol ja jTatik tey bʼa nalanchaʼani sok wa xjeʼa tik ja Dyablo jun mero leʼa abʼal (Proverbios 27:11).

La ka makunuktik ja sbiboʼil ja Dyosi ja bʼa yojol ja jpamilyatiki sok ja kamigotiki. Ja rason wa xyaʼa ja Dyosi jelni xmakuni yuj juntiro ja bʼa jkʼakʼujiltiki ja matik ay xcheʼumi, ja matik ay statami soka untikali. «Alegre la ajyi sok jaʼwa cheʼumi». Jachʼ wa xyal yabʼ ja Dyosi ja winik ayxa xcheʼumi, soka it wa xyal yabʼi mok slolay sok tuk ixuk ja xcheʼumi (Proverbios 5:18-20). Ja ixuk ayxa statami, wa staʼa bʼa sjuʼunil Proverbios skapituloʼil 31 jun tsamal sjejel bʼa jasa oj skʼuluk ja yeʼn bʼa jachuk oj kisjuk sok chaʼan lek yabʼalil oj iljuk yuj ja statami sok yuj ja yuntikili. Jaxa bʼa juʼun it wa x-alji yabʼ ja untikali kʼuʼabʼal x-ajyiye sok ja snan stateʼi (Proverbios 6:20). Chomajkil, ja juʼun it wa xyala tʼilani oj ajyuk kamigotika, sok wa sjeʼa ta wa xpila jbʼajtiki, oj paxkotik tʼutʼil, ma mixa oj cham jkʼujoltik ja tuki (Proverbios 18:1). Pe, soka kamigotiki wa xbʼobʼ el kotikʼot lek ma miyuk, ja yuj tʼilani oj jtsatik lek matik wa xmojtaytika (Proverbios 13:20; 17:17).

Ja bʼa sakʼanil keʼntikta. Ja sjuʼunil Proverbiosi ay yiʼojan rason jel chaʼanik yabʼalil wa skoltayotik bʼa tsamal sok gusto oj ajyuk ja sakʼaniltiki sok bʼa mi oj jpensaraʼuktik jastik junuk bʼa oj sjom-otik, wa xyala mok kokotik ja bʼa sbisyoʼil ja trago, sok bʼa akʼax oj ajyukotik (Proverbios 6:6; 14:30; 20:1). Cha, jaman lek wa xyala ta jaʼ wa xnochotik ja spensar ja ixuk winikeʼi mini lek oj el kotikʼota (Proverbios 14:12). Chomajkil wa xyala la jtalnaytik ja jkʼujoltiki bʼa mok sjom ja jastik junuk bʼa mi lekuki, pes tini tiw wa xbʼojtijani «ja yip ja sakʼaniltiki» (Proverbios 4:23).

Jitsan miyon ixuk winik bʼa sutanal ja luʼumi tojbʼita ja sakʼanileʼi yuj ja rasonik yiʼojan ja Proverbiosi. Ja yeʼnleʼi yilaweta jelni lek wa xwajkujtik ta wa xkʼuʼantik ja jas wa xyala ja Jyobaji.

(Akʼubʼal eluk bʼa sjuʼunil Proverbios.)