XETʼAN 24

Ja Pablo wa sjeka yi juʼun ja tuktukil tsome snochuman ja Kristo

STSANJEL BʼA

Ja juʼun wa sjeka ja Pablo wa stsatsan kʼujolan ja snochuman jumasaʼ ja Kristo

JA TSOME snochuman ja Kristo, ajkʼachto yaʼunej kulan, ojni skʼul-e jun niwan aʼtel bʼa oj kʼotuk ja jas wa skʼana ja Jyobaji. Pe, ja tsome it tixtani kʼe ixtalajuka. ¿Oj maʼ ajyuke toj sok ja Dyosi ja yajni wan ijel spatikeʼi sok yajni wan ekʼel sbʼaje tsatsal wokol bʼa yojol ja tsome wa snochowe ja Kristo? Ja Juʼun jumasaʼ Tsʼijbʼunubʼal bʼa Griego ayiʼojan 21 juʼun skoltay sok stsatsan kʼujolan ja yeʼnleʼi.

Ja Pablo yeʼn stsʼijbʼan 14 ja bʼa juʼunik jaw, wa xkʼe bʼa Romanos man bʼa Hebreos. Spetsanil ja juʼunik jaw tiʼ yiʼoj ja sbʼiʼil ja ma oj kʼot sbʼaji, jun winik ma jun tsome snochuman Kristo. La kiltikwil jujuntik jas junuk staʼa tiʼal ja bʼa juʼunik sjeka ja Pablo.

Rason sbʼaj ja smodoʼeʼi sok ja jastik wa skʼulaneʼi. Ja matik wa slolay sbʼaje jachʼta lom sok ixuk ma winik, ja maʼ wa slolay ja xcheʼumi ma statam sok pilan ixuk winik ma wa sleʼawe tuk mulal bʼa jel tsats sok mi snaʼawe malaya «mi ni oj sbʼate ja lugar jaw ja ba wa skʼulan mandar ja Dyosi» (Gálatas 5:19-21, YT; 1 Corintios 6:9-11). Ja yaʼtijum ja Dyosi tsomani oj ajyuke ama bʼa tuktukil chonabʼ jakele (Romanos 2:11; Efesios 4:1-6). Ja yeʼnleʼi ani yaʼe sok spetsanil skʼujole jastik junuk bʼa lek sok a-skoltaye ja smoj kreyenteʼili ja bʼa swokoleʼi (2 Corintios 9:7). «Kʼakʼu akʼwal kʼumanik ja Dyosi», jachʼ wa xyala ja Pablo, soka it stsatsan kʼujolan ja yeʼnleʼi bʼa oj sjam ja skʼujole sok ja Dyosi (1 Tesalonicenses 5:17, YT; 2 Tesalonicenses 3:1; Filipenses 4:6, 7). Tʼilani oj cha sjeʼe wa sjipa skʼujole bʼa Dyos bʼa jachuk ja Jyobaji oj smaklay ja yorasyoneʼi (Hebreos 11:6).

¿Jas rason yaʼ yi ja Pablo ja pamilya jumasaʼ? Ja tatamali yajxtani oj yil ja xcheʼumi jastal yajxta wa xyila sbʼaj ja yeʼn. Jaxa cheʼumali tʼilani oj skis sok spetsanil skʼujol ja statami. Jaxa untiki kʼuʼabʼal ni oj ajyuke sok ja snan stateʼi. Ja nan tatali tʼilani yajxta oj stoj-e sok oj xchap-e ja yuntikileʼi, jastalni wa xyala ja Yabʼal ja Dyosi (Efesios 5:22–6:4; Colosenses 3:18-21).

Ja jas wa skʼana oj skʼuluk ja Dyosi. Ja Mandar yaʼ yi ja Dyos ja Moisesi ojni stalnay sok oj stoj ja israʼelenyo man xjul ja Mesiasi (Gálatas 3:24). Ja snochuman ja Kristo, mini yajnaluk oj snoch-e ja mandar jaw bʼa oj yaʼteltaye ja Dyosi. Ja bʼa sjuʼun Hebreosi sjeka yi ja tsome snochuman ja Kristo elele jan bʼa Judio jumasaʼ, ja Pablo ya chiknajuk stojolil jas yuj ajiyile ja Mandar jaw sok jastal ja jas wa skʼana ja Dyosi wa xtsʼikwi bʼa Kristo. Ja Pablo yala jitsan jastik junuk wa xyala ja Mandar jaw wa stojolan jastik junuk ojto ekʼuk. Jastal it, ja chante jumasaʼ wa skʼapaweʼi, ja senyaʼan ja yajni ja Jesusi xyaʼa ja sakʼanil bʼa oj kusjuk el juntiro ja jmultiki (Hebreos 10:1-4). Yuj ja xchamelal ja Jesusi, ja Dyosi skʼutsu ja trato bʼa Mandar yaʼ yi ja Moisesi, pes yujni mixa xmakuniʼa (Colosenses 2:13-17; Hebreos 8:13).

Ja jastal tsamal tojbʼel ay bʼa yojol ja tsome snochuman ja Kristo. Ja winike matik wa x-aji yile xchole bʼa yojol ja tsome snochuman ja Kristo, tʼilan lekni lek oj sjeʼ ja smodoʼeʼi sok a-skʼuluke ja jastik junuk tʼilan wa xtaxi bʼa yojol ja Bibliʼa (1 Timoteo 3:1-10, 12, 13; Tito 1:5-9). Chomajkil, jelni tʼilan spetsanil ja yaʼtum ja Dyosi a-stsom sbʼaje tikʼanxta bʼa oj ajuk yile skoltajele jakel bʼa Dyos sok bʼa oj stsatsan kʼujuluk sbʼaje jujune bʼa yeʼnle (1 Corintios 14:26, 31; Hebreos 10:24, 25).

Yajni ja Pablo stsʼijbʼan ja xchabʼil juʼun sjeka yi ja Timoteo, ja it waja tsaʼanxta juʼun stsʼijbʼani, ja jekumani tey bʼa Roma, ja yeʼn tiʼ lutji tiwi yajni wan smajlajel ja jas oj yal ja maʼ ay xcholi. Kechanta jujuntik snochuman ja Kristo bʼa mix xiwye waj yulataye. Ja Pablo snaʼani mixa jelukto skʼana bʼa oj chamuka ja yuj yala: «Jchapunejni leka. Ti kʼot tʼikan ja kaʼteli. Jnolunejni ja skʼuʼajeli» (2 Timoteo 4:7). Bʼobʼta tʼusan mas tsaʼan ja bʼa it tixta miljiʼa. Pe, ja juʼun jumasaʼ stsʼijbʼan ja jekuman Pablo wantoni stojo ja matik meran wa xyaʼteltay ja Dyosi ja bʼa jtyempotiki.

(Akʼubʼal eluk bʼa Romanos, 1 bʼa Corintios, 2 bʼa Corintios, Gálatas, Efesios, Filipenses, Colosenses, 1 sok 2 Tesalonicenses, 1 sok 2 Timoteo, Tito, Filemón sok Hebreos.)

¿MACHʼA MAʼ JA INTIL KʼAPUBʼALI?

Tsaʼan yajni ja Adán sok ja Eva sleʼa smule, ja Dyosi kʼumani jachʼ sok jun senya ja yajni yala yabʼ ja bʼitsʼbʼichan ja iti: «Ja keʼn oj jkʼuluk oj awilabʼaj kontra ja weʼn sok ja ixuki, jaʼwa wintili sok ja yintil ja yeʼn. Ja yeʼn [ja yintil ja ixuki] oj sbʼuy jaʼwa wolomi jaxa weʼn oja kʼux yi ja stop yoki» (Génesis 3:15). Ja bʼa Apocalipsis 12:9, wa xyalkabʼtik ja Dyablo yeʼn ja «poko chani». Pe, ja machʼ oj wajuk ja Intil kʼapubʼal yuj ja Dyosi, ma ja Koltanumi, juni nakʼan loʼil och chiknajuk bʼa Bibliʼa ja ekʼ ja siglo jumasaʼ.

Jun ma 2,000 jabʼil tsaʼan yajni sleʼa smule ja Adán sok ja Eva, ja Jyobaji yala ja Intil kʼapubʼali tiʼ oj el bʼa spamilya ja Abrahani (Génesis 22:17, 18). Sigloʼik tsaʼan, ja jekuman Pablo yala ja bʼajtan xetʼan jel tʼilani ja bʼa intil it yeʼn ja Mesiasi, ja Kristo Jesusi (Gálatas 3:16). Jastal wa xyala ja Génesis 3:15, ja Jesusi kʼuxji yiʼ «ja stop yoki» ja yajni miljiʼi. Pe, ja Dyosi ya sakʼwuk ja Jesusi sok ja yeʼn «waj sakʼan [jastal jun ikʼ ason] yuj ja yip ja Dyosi» (1 Pedro 3:18).

Ja Dyosi chomajkil yala 144,000 ixuk winike apaxuke ja xchabʼil xetʼan ja bʼa intil it (Gálatas 3:29; Apocalipsis 14:1). Ja yeʼnleʼi ojni ajuk sakʼwuke bʼa oj ajyuke sakʼan bʼa satkʼinal jastal ikʼ ason sok jastal mandaranum sok ja Jesusi ja bʼa sGobyerno ja Dyosi (Romanos 8:16, 17).

Jastal jun Mandaranum jel yip ja bʼa satkʼinali, ja Jesusi ojxtani xchʼay snajel ja Dyablo sok ja yintili, ja bʼa it tey ja pukuj jumasaʼ sok ja ixuk winik wa skʼulane jastik junuk bʼa mi lekuki (Juan 8:44; Efesios 6:12). Ja smandar ja Jesusi oj yijan yi slamanil sok jun sakʼanil bʼa gusto lek ja ixuk winike kʼuʼabʼal aye sok ja Dyosi. Ja bʼa tyempo jakumto, ja Jesusi ojni sbʼuyi «ja s-olom» ja bʼitsʼbʼichani, jachuk oj ya xchʼay el snajel bʼa juntiro (Hebreos 2:14).

JA BIBLIʼA: ¿JAS RASON YIʼOJANI?