WA X-ALXI ja chabʼ sat loʼil it bʼa wa xkʼe stul ja Bibliʼa jani ja jel naʼubʼal sbʼaj bʼa spetsanil ja sakʼaniltiki: «Ja kʼe kujlajuki ja Dyosi skʼulan ja satkʼinali sok ja luʼumi» (Génesis 1:1). Soka chabʼ sat loʼil it mi wokoluk yabʼjel stojolil sok chaʼan lek yabʼalil ja jas wa xyala, ja Bibliʼa wa sjeʼa kitik ja machʼ jel xtaxi och tiʼal bʼa yojol ja Yabʼal ja Dyosi, ja Jyobaji ja Dyos jel juntiro yipi. Ja bʼajtan sbersikuloʼil ja Bibliʼa wa xyal kabʼtik ja Dyosi yeʼn skʼulan ja jastik ay bʼa satkʼinali, sok ja luʼumi. Ja bersikuloʼik nabʼan sbʼaji wa xyala ja Dyosi bʼa jitsan lek tyempo, ja yeʼn ya sbʼiʼiluk kʼakʼu jumasaʼ, skʼulan ja Luʼumi sok ja jastik junuk jel tsamal ay bʼa yojoli.

Ja winik sok ja ixuki jani waj ja aʼtel jel chaʼan yabʼalil skʼulunej ja Dyos bʼa Luʼumi. Ja Dyosi skʼulan ja bʼajtan winiki sok tsʼubʼil luʼum sok stojbʼes jastal splanta yeʼna, ja it wa stojolan, ja winiki wani xbʼobʼ sjeʼ ja tsamal smodo ja Jyobaji jastal ja syajalskʼujoli sok ja sbiboʼili. Ja Dyosi ya sbʼiʼiluk Adán ja bʼajtan winiki sok tiʼ yaʼa bʼa kʼachinubʼ bʼa Edén. Ja kʼachinubʼ it yeʼnani skʼulunej ja Dyosi sok ja bʼa yojoli jelni ja teʼaltik bʼa jel x-ajbʼani wa xyaʼa ja sati.

Jun kʼakʼu, ja Dyosi lekxani yila oj yaʼ yi ja winiki jun smoj. Ja yuj, sok jun sbʼakelil ja xaʼax ja Adani ja Dyosi skʼulan jun ixuk sok yijan yiʼ bʼa stiʼ sat ja winiki sok kʼot xcheʼumuk, tsaʼan aji sbʼiʼiluk Eva, ja bʼajtan ixuk it. Yuj ja sgusto, ja Adani yala ja berso it: «Ja iti jbʼakelxaniʼa sok jbʼakʼtelxaniʼa». Ja Dyosi tixa yalaʼa: «Ja yuj ja winiki ojni ya kan ja stat soka snani, sok jaxani oj ajyuk soka xcheʼumi, sok ojni paxuke juneʼitaʼa» (Génesis 2:22-24; 3:20).

Ja Dyosi yaʼ yi ja Adán sok ja Eva chabʼ mandar. Bʼajtan, ojni stsʼun-eyi sbʼaʼal ja Luʼumi sok a-stalnaye, sok takal takal a-sbʼut-e ja Luʼumi soka yuntikileʼi. Xchabʼil mandar, ja yeʼn soka xcheʼumi mini oj bʼobʼ sloʼe ja sat jun teʼ tey bʼa yojol ja kʼachinubʼi, «ja teʼ wa senyaʼan bʼa stsajel ja bʼa leki soka bʼa mi lekuki» (Génesis 2:17). Ta sloʼowe kʼa, ojni chamukeʼa. Soka chabʼ mandar jaw, ja Dyosi yaʼ yi ja Adán soka Eva ja portuna bʼa oj sjeʼe ta meran wa skʼanawe aʼajuke mandar yuj ja Dyosi. Soka kʼuʼabʼal oj ajyukeʼi oj sjeʼe ja syajalskʼujol yiʼoje sok ja Dyosi soka tsʼakatal wa xyawe yiʼi yuj ja jastik yaʼunej ja yeʼn. Ja yeʼnleʼi jelni jitsan ja rason yiʼojeʼi bʼa oj ajyuke ibʼ kʼabʼal yuja Dyosi. Ja yeʼnleʼi mini jun mulal yiʼojeʼa, pes ja Bibliʼa wa xyala: «Tiʼ skʼela ja Dyosi spetsanil ja jastik skʼuluneji sok, ¡ilawil!, jelni lek yila juntiroʼa» (Génesis 1:31).

(Akʼubʼal eluk bʼa Génesis skapituloʼil 1 sok 2.)