JA TSAʼANXTA juʼun bʼa Bibliʼa, ja Apocalipsisi ma Ja swayichi, wa xyaʼa kulan yiʼ skʼujol ja ixuk winiki. Stsʼijbʼunej ja Juani, ja juʼun it ayiʼojan jitsan nakʼsat ojto ekʼuk, ja nakʼ satalik it wa xchʼak tsʼikwuk ja yajni xchʼak ekʼuk ja jas wa skʼana ja Dyosi.

Ja bʼa bʼajtan nakʼsati, wa x-ilxi ja Jesusi, tulubʼalxa bʼa yoj chamwinik, wa stojo sok wa stsatsan kʼujolan jitsan tsome yaʼtum Dyos. Ja bʼa tuk nakʼsati wa xjexi ja skujlayubʼ ja Jyoba bʼa satkʼinali sok wa x-ilxi ikʼ ason jumasaʼ wane stsʼebʼantajel ja yeʼn.

Yajni wanxa mojxel oj tsʼikwuk el spetsanil ja jas wa skʼana ja Dyosi, ja yal Cheji ja Kristo Jesusi, wa x-aji yi jun bʼalubʼal juʼun ayiʼoj juke slutubʼalil, ma seyo. Yajni sjama ja bʼajtan chane slutulabʼili, chiknaji chane winike kajane kawuj, ja yeʼnleʼi mi meranuke jun ita senyaʼe. Ja bʼajtani yeʼn ja Jesusi kajan bʼa jun sakal kawuj sok slapunej jun skorona pes junxa ni Mandaranuma. Jaxa tuki kajane bʼa kawuj tuktukil yelaw, ja xchabʼil winik kajan kawuj wa senyaʼan ja kʼakʼaneli, ja yoxili wa senyaʼan ja waʼini sok ja xchanili wa senyaʼan ja niwak chamel wa stika sbʼaj ekʼ weʼgo, spetsanil ja iti oj sjeʼ sbʼaj yajni mixa jeluk to skʼana bʼa oj chʼakuk ja luʼumkʼinal it. Ja yajni wa xjamxi ja juke slutulabʼili wa x-abʼxi wa xjuji juke trompeta, ja it wa stojolan ja jas oj yi kon ja Dyosi yajni xjak ja jchʼakelaltiki. Ja iti cha wa xyiʼajotik bʼa juke desgrasya, ja iti jun senya ta, ma jastik junuk bʼa wa sjeʼa ja skoraja ja Dyosi.

Ja Juani cha wa xyila wa xpojki jun yawal alats jun yal kerem, ja iti wa senyaʼan ja yajni axi kulan ja sGobyerno ja Dyos bʼa satkʼinali. Tsaʼan wa xkʼe jun kʼakʼanel, sok ja Satanasi sok ja spukuj jumasaʼ wa xjipjiye kon bʼa Luʼum. «Jaʼxa weʼn luʼum jel ajul abʼaj», jachʼ wa xyala jun tsatsal kʼumal. ¿Jas yuj jachʼ yala? Yujni ja Dyablo jel tajkel ay yuj wa snaʼa wanxa chʼakel ja skʼakʼuʼili (Apocalipsis 12:12).

Ja Juani wa xyila ja Jesusi jastal jun yal chej, sok tey sok 144,000 ixuk winik stsaʼunej. Ja yeʼnleʼi «oj skʼuluke mandar lajan sok ja Kristo». Ja sjuʼunil Apocalipsisi wa xya jnatik ja xchʼabʼil xetʼan ja bʼa intil kʼapubʼali wa stojbʼes 144,000 ixuk winik (Apocalipsis 14:1; 20:6, YT).

Ja mandaranum jumasaʼ bʼa Luʼumi wa stsomo sbʼaje bʼa Armagedón, ma «bʼa kʼakʼanel ja bʼa niwan skʼakʼuʼil ja Dyos» jel juntiro yipi. Ja yeʼnleʼi oj syam sbʼaje sok ja maʼ kajan bʼa sakal kawuj, ja Jesusi sok ja kʼakʼanum jumasaʼ bʼa satkʼinali. Bʼa tiw wa x-aji chʼay snajel spetsanil ja mandaranumi. Cho wa xlutji ja Satanasi. Jaxa Jesusi sok ja 144,000 smoji oj yaʼe mandar «mil jabʼil». Yajni xchʼak ja mil jabʼil jaw, oj ajuk chʼay el snajel ja Satanasi (Apocalipsis 16:14; 20:4).

¿Jas oj skʼuluk ja sMandar ja Kristo yuj ja ixuk winik kʼuʼabʼal ayeʼi? Ja Juani stsʼijbʼan: «Ja Dyosi oj skuse ja yaʼalel sateʼi ja yeʼnleʼi. Mixa ti oj ajyuk ja chamelali cho mini ja chamkʼujolili cho mini ja okʼeli cho mini ja syajali. Yuj ja chʼakta ekʼuki spetsanil ja jastik junuk iti yuj ja pokoxa» (Apocalipsis 21:4). Jachniʼa, ¡ja Luʼumi oj cha pax jun kʼachinubʼil!

Ja sjuʼunil Apocalipsisi jachʼ wa stsʼiktes kan ja rason yiʼojan ja Bibliʼa: ¡yuj ja sGobyerno ja Mesiasi, ja sbʼiʼil ja Jyobaji wa sakbʼi sok wa x-axi kan lek kulan kechantani yeʼn ja Dyosi ja maʼ oj ya mandar bʼa tolabida ja ixuk winiki!

(Akʼubʼal eluk bʼa sjuʼunil Apocalipsis.)