JA JUʼUN jel najat yiʼojan ja Bibliʼa wa stsomo bʼa yojoli tsʼebʼoj jumasaʼ bʼa Dyos. Tsomxi bʼa jun mil jabʼil ja tsʼebʼojik it. Ja matik stsʼijbʼaneʼi sjeʼawe bʼa jun modo jel tsamal janekʼto sniwanil ja skʼuʼajel yiʼojeʼi. Chomajkil ja bʼa jas stsʼijbʼaneʼi sjeʼawe ja tuktukil modo wa xtax ja jkʼujoltiki, tey ja alegre ayotiki, ja wa xkatik tsʼakatali, ja wala tsʼebʼanitiki, jaʼwa sutxi jkʼujoltik, ja yajni yaj wa x-abʼxi jun jas junuk sok ja triste ayotiki. Chikani weʼgo ja winike it jelni syajtaye ja Dyosi sok mojani aye lek smoka. La kiltik jujuntik yolomajel ja bʼa tsʼebʼojik it.

Ja Jyobaji, ja maʼ mero oj yaʼotik mandari, ojni tsʼebʼantaxuk sok oj aʼteltaxuk. «Ja weʼn, wa bʼiʼil Jyoba, kechantani weʼn ja jel Niwana bʼa spetsanil ja luʼumkʼinali». Jachʼ wa xkʼumantik ja bʼa Salmo 83:18. Jitsan ja bʼa sjuʼunil ja Salmosi ayiʼojan tsʼebʼoj bʼa wa stoyo ja Jyobaji yuja skʼulan ja satkʼinali, ja kʼanali, ja jastik sakʼan bʼa Luʼumi soka jastal jel tsamal bʼobʼel ja jkwerpotiki (Salmos 8, 19, 139 sok 148). Tuk tsʼebʼoj wa xyawe chaʼanbʼuk ja Dyosi yuja wa skoltay sok wa stalnay ja matik mi x-ajikan yuji (Salmos 18, 97 sok 138). Jaxa tuk tsʼebʼojiki wa stsʼebʼantaye jastal jun Dyos toj wa skoltay ja matik ixta wa x-iljiʼi sok wa xyaʼ yi kastigo ja matik mi lekuk ja jas wa skʼulani (Salmos 11, 68 sok 146).

Ja Jyobaji wa skoltay sok wa xya kulan skʼujol ja matik wa xyajtaji yuji. Bʼobʼta ja Salmo 23 jaʼa jel naʼubʼal sbʼaji, ja bʼa salmo jaw ja Davidi wa xya slaj sbʼaj ja Jyobaji sok jun talnachej jel syajal skʼujol wa stojo, wa skoltay sok wa stalnay ja yal xcheji. Ja Salmo 65:2 wa xya jul jkʼujoltik ja Jyobaji yeʼn ja maʼ wa «Smaklay ja orasyoni». Chomajkil, jitsan ja matik sleʼunej smule bʼa jel tsats ja bʼa sakʼanileʼi wa xlamxi skʼujole yajni wa skʼumane ja jas wa xyala ja Salmos 39 sok 51, ja tiw ja Davidi wa sjeʼa jastal sutxi ta meran ja skʼujoli yuj ja smul jel tsats sleʼuneji soka janekʼto wa sjipa skʼujol ja Dyosi oj skus yiʼ ja smul jaw. Jaxa bʼa Salmo 55:22 wa stsatsan kʼujolanotik bʼa oj jip jkʼujoltik bʼa Jyoba sok bʼa oj katikan a-skoltayotik soka kijkatstiki, ma ja jwokoltiki.

Ja Jyobaji oj ya makunuk ja sGobyerno ja Mesiasi bʼa oj yijan jun yajkʼachil luʼum. Jitsan tsʼeboj bʼa yojol ja sjuʼunil ja Salmosi wa staʼa tiʼal ja Mesiasi, ja Mandaranum kʼapubʼali. Ja Salmo 2 wa xyala ja Mandaranum it oj ya chʼay snajel ja niwak chonabʼ wa sleʼa tiro smoki. Jaxa bʼa Salmo 72 wa sjeʼa ja Mandaranum it oj xchʼay snajel ja stekʼjel waʼini soka ixta wala iljitiki. Ja Dyosi, yuj ja Mesiasi, oj ya chʼay snajel ja kʼakʼaneli sok ja yamkʼabʼal wa xyawe makunuk bʼa milwaneli, jastal wa xyala ja Salmo 46:9. Chomajkil, ja bʼa Salmo 37 wa xkʼumantik ja bʼa yajkʼachil luʼumi mixa oj ajyuk ja matik mi lekuk ja smodoʼi jaxa matik toj ja jas wa skʼulani oj ajyuke sakʼan tsoman sok gusto lek tolabida.

(Akʼubʼal eluk bʼa sjuʼunil Salmos.)