KECHANTA skʼulan sbʼaj snochuman ja Kristo, ja Pablo kʼe xchol ekʼ sok jun niwan stsatsal skʼujol ja sGobyerno ja Dyosi. Pe, ja weʼgo yeʼnxa ni ja Pablo ja maʼ oj ijuk yi ekʼ spatika. Ja jekuman it mi xyajtikaxi waj ekʼ bʼa najtik lugar bʼa jachuk oj spuk ekʼ ja lekil rason sbʼaj ja gobyerno oj ya kʼotuk ja jas wa skʼana oj skʼuluk ja Dyos sok ja ixuk winiki.

Bʼa Listra, ja bʼajtan ekʼele el ekʼ jastal cholumani, ja Pablo stojbʼes jun winik tsats ay ja yoki, maʼ mi xbʼobʼ bʼejyuk man pojki. Ja ixuk winike matik yilawe ja jas ekʼi xchʼeʼeljiye kʼeye sok yalawe ja Pablo sok ja smoji sbʼiʼil Bernabé dyose bʼi. Ja chawane winik it wokol ni juntiro yawe kʼot tekʼan ja ixuk winikeʼi bʼa jachuk mi oj kʼapjuk yile smajtane. Pe, tsaʼan ja ixuk winike it jomubʼal ja spensare yuj ja matik kontra wa xyilawe ja Pablo xchʼojowe ton ja jekumani sok jato yawe kan ja yajni yilawe laso chamta yujileʼi. Pe, ja Pablo mini chama sok tʼusan mas tsaʼan ja yeʼn kumxi ja bʼa chonabʼ jaw bʼa oj waj stsatsan kʼujoluk ja nebʼuman jumasaʼ.

Tyempo mas tsaʼan, jujuntik snochuman ja Kristo elele jan bʼa judio jumasaʼ taregani wa skʼanawe ja tuk snochuman ja Kristo bʼa mi judioʼukeʼi a-skʼuʼuke jujuntik mandar wa xtaxi ja bʼa Mandar yaʼ yi ja Dyos ja Moisesi. Ja Pablo waj bʼa Jerusalén bʼa stiʼ sat ja jekuman jumasaʼ sok ja ansyanoʼiki bʼa oj stojbʼese ja kʼumal it. Tsaʼan ja spaklayeta lek ja jas wa xyala ja Yabʼal ja Dyosi sok skʼanaweta yiʼ ja skoltajel ja yip ja Dyosi, ja winike jaw sjekawe jun juʼun ja bʼa kʼole jumasaʼ snochuman ja Kristo sok bʼa juʼun jaw yalawe mok staʼe jastik junuk kʼapubʼal yiʼ kʼulubʼal dyos, mok sloʼe chikʼ chomajkil mok yabʼye bʼakʼet mi eleluk ja xchikʼeli sok mok slolay sbʼaje jachʼta lom sok ixuk ma winik. Ja mandar jumasaʼ iti tey ja bʼa «jastik junuk mas tʼilani», pe, mi chʼikanuk snochjel ja Mandar yaʼ yi ja Dyos ja Moisesi (Hechos 15:28, 29, YT).

Ja bʼa xchabʼil ekʼele el ekʼ ja Pablo bʼa xcholjel ja lekil rasoni, yulatay ja Berea, ja bʼa jkʼakʼujiltiki ja bʼa wa xtax ja Grecia. Ja judioʼik matik kulane tiwi gustoni lek syamawe ja lekil rasoni, ja yeʼnleʼi wani spaklaye kʼakʼu kʼakʼu ja Yabʼal ja Dyosi bʼa oj yil-e ta meran ja jas wane snebʼjeli. Tʼusan mas tsaʼan, ja Pablo jun ekʼele mas cha spakani ajnel yuj ja skontraʼi. Waj man bʼa Atenas, ja tiw ajyi tekʼan bʼa stiʼ sat jun tsome ixuk winik bʼa chapane lek sok yala jun sloʼil wa sjeʼa kitik jastal tsamalxta ochi sok skisani ja matik wan maklajel yuji.

Tsaʼan ja kumxi ja bʼa yoxil ekʼele el ekʼ xcholjel ja lekil rasoni, ja Pablo waj bʼa Jerusalén. Yajni waj bʼa templo, kol miljuk yuj jun tsome ixuk winik xwoʼoljiye. Pe, ja kʼakʼanum bʼa Roma xchʼika sbʼaje sok yiʼaje el ja Pablo bʼa oj yawe yiʼ jitsan sjobʼjel. Pe, ja Pablo swinkil ni Romaʼa, ja yuj aji kan a-skoltay sbʼaj ba stiʼ sat ja gobyerno sbʼiʼil Félix. Ja judioʼiki mini modo bʼobʼ sjeʼe ta meran ja smul sleʼawe yiʼ ja Pabloʼa. Pe, ama jachukuk, ja Festo, ja slokʼol ja Felixi, wani xkʼan ya bʼa skʼabʼ ja judio jumasaʼ ja Pablo. Bʼa mi oj ekʼ sbʼaj ja jaw, ja Pablo yala: «Jekawon ja bʼa stiʼ sat ja Sesari». Ja Festo tiʼ yalaʼa: «Kaʼaxa sok ja Sesari» (Hechos 25:11, 12).

Tini bʼa Roma oj tojbʼuk ja jas wan ekʼel sbʼaj ja Pablo. Ja yuj chʼikji ja Pablo bʼa jun barko wajum bʼa Italia, pe, ja barko bʼa wajumi tsʼelpuji bʼa yoj jaʼ, ja yuj ja yeʼn tini ya ekʼuk ja styempoʼil cheʼej bʼa jun penka luʼum joyubʼal yuj jaʼ sbʼiʼil Malta. Ja yajni kʼot bʼa Roma, ja Pablo tiʼ ajyi chabʼ jabʼil bʼa jun naʼits tupubʼal. Anke ja Pablo talnubʼal yuj jun kʼakʼanum, ja yeʼn mini xchʼaya ja stsatsal skʼujola sok wanix xcholo yabʼ ja lekil rason sbʼa ja sGobyerno ja Dyosi ja matik wa x-ulataji yuji.

(Akʼubʼal eluk bʼa sjuʼunil Hechos 11:22–28:31.)