¿OJ MAʼ bʼobʼ ajyukotik toj sok ja Dyosi ja yajni la taxtik bʼa jun niwan wokoli, ama laso mini jun slekilal oj jtatik sok ja jaw? Jun winik sbʼiʼil Job chʼikji ja bʼa kʼumal it. La kiltikwil jastal el kʼote.

Yajni ja israʼelenyo teyeto bʼa Egipto, ja Jobi, jun spamilya ja Abrahani, tiʼ kulan soka spamilya bʼa jun lugar ja weʼgo ja bʼa wa xtaxi ja Arabia. Jun ekʼele, spetsanil ja anjeli stsomo sbʼaj bʼa stiʼ sat ja Dyosi, sok tini cha chʼikan bʼa snalane ja Satanasi. Bʼa stiʼ sat ja anjelik jaw, ja Jyobaji yala janekʼto wa sjipa skʼujol ja bʼa lekil yaʼtum Jobi. Ja Jyobaji cha yala kechantani ja Jobi jaʼa winik jel toj ay bʼa Luʼumi. Pe, ja Satanasi yala ja Jobi kechantabʼi wa xyaʼteltay ja Dyosi yuj ja yeʼn wa xyaʼ yi slekilal sok yuj wa stalnay. Pe, lekbʼi ja Jobi xchʼaya spetsanil ja jastik yiʼoji, ja yeʼn ojbʼi kʼe kʼumanuk sbʼaj kistal ja Dyosi.

Jachuk ja Dyosi ya kan ja Satanasi a-sjap yi spetsanil ja jastik sbʼaj ja Jobi, tsaʼan smila yiʼ ja yuntikili sok ya jak sbʼaj jun kistal chamel. Ja Jobi mini snaʼa ta jaʼa Satanasi ja maʼ ya jak sbʼaj ja wokolik jaw, ja yuj wa sjobʼo sbʼaj jas yuj ja Dyosi wa xya kan aʼekʼ sbʼaj ja wokolik it. Ama jachʼ wan ekʼel sbʼaj, ja Jobi mini ya kan yiʼ spatik ja Jyobaji.

Oxe winike waj yulataye ja Jobi, ja yeʼnleʼi wa xyaʼ ekʼ sbʼaje jastal yamigo ja yeʼn. Ja bʼa jitsan sloʼil yalaweʼi, bʼa wa sbʼutʼu jitsan slam ja sjuʼunil Jobi, kol skʼumbʼese yiʼ skʼujol ja Jobi bʼa oj spensaraʼuk ja Dyosi wan yajel yiʼ wokol yuj mulal jachʼ nakʼul skʼulunej. Sok kʼot yal-e ja Dyosi mi bʼi tʼilanuk xyila ja matik wa x-aʼteltaji yuji sok mibʼi sjipa skʼujol bʼa yeʼnle ¡Mini tʼun meranuk ja jas wa xyalaweʼa! Pe, ja Jobi mini skisa ja jas yalaweʼa. Ja Jobi yala mini oj ya kan skʼulajel ja jas wa skʼana ja Dyosi man x-el ja yikʼi.

Pe, ama jachuk ja spensari, ja Jobi jelni tʼilan yila oj sle modo bʼa oj skoltay sbʼaj mi jaʼuk bʼa oj ya chaʼanbʼuk ja sbʼiʼil soka xchol yiʼoj ja Jyobaji bʼa yajel mandar. Ja yuj jun winik mito ay lek skʼujol sbʼiʼil Elihú, ti kulan ekʼ wan smaklajel ja sloʼileʼi, yaʼ yi rason ja Jobi yuja jachʼ wan skʼulajeli. Sok cha syamani tsats lek ja oxwane matik wa xya ekʼ sbʼaj jastal yamigo ja Jobi.

Tsaʼan, ja Jyobaji stojo yiʼ ja spensar ja Jobi. Ja Dyosi staʼa tiʼal jujuntik jas junuk skʼulunej bʼa jachuk oj sjeʼ yi ja Jobi ja winiki ichilitani wa xkani yajni wa x-aji slaj sbʼaj sok ja sniwanil ja Dyosi. Ja Jobi nuxni yaʼa sbʼaj sok smaklay ja rason aji yiʼ yuj ja Dyosi. Jaxa Jyobaji, june «was stalna jyajulaltik sok wani xyabʼ ja syajal ja jwokoltiki», yaʼ yi kumxuk ja slekilal ja skwerpo ja Jobi sok yaʼ yi chabʼ ekʼele mas ja bʼa jastik junuk yiʼoj ajyi, sok cha yaʼ yi lajune yuntikil (Santiago 5:11, YT). Yuj ja tojni ajyi bʼa stiʼ sat ja Dyosi ja yajni ekʼ sbʼaj niwak wokoli, ja Jobi sjeʼa yiʼ ja Satanasi mi meranuk ja jas yaluneji, sok cha sjeʼa ja ixuk winikeʼi wani xbʼobʼ ajyuke toj sok ja Dyosi bʼa yoj niwak wokol.

(Akʼubʼal eluk bʼa sjuʼunil Job.)