JITSAN lek tyempo bʼajtan ja Dyosi skʼulan bʼa satkʼinal ikʼ ason jumasaʼ, ja yeʼnleʼi wa xnaji sbʼaje jastal anjel, tsaʼan tixa skʼulan ja ixuk winikeʼi. Bʼa skʼachinubʼil ja Edeni, jun anjel kʼoka abʼal, tsaʼan naji sbʼaj jastal Satanás sok Dyablo, slolay ja Eva bʼa oj sloʼ ja sat teʼ yalunej ja Dyos mok sloʼe.

Bʼa oj skʼumuk ja Eva, ja Satanasi ya makunuk jun bʼitsʼbʼichan, sok yaʼ yi xchikinuk ja ixuki yuj smul ja Dyosi ja yeʼn sok ja statami mi wanuke skʼulajel jun jas junuk bʼa jel lek. Ja anjel it cha yala yabʼ ja Eva mi bʼi oj chamuke ja ta sloʼowe kʼa ja sat teʼ alubʼal yabʼye mok sloʼeʼi. Soka it ja Satanasi kol yal ja Jyobaji jun leʼa abʼal. Ja lolanum it tsamalxta smono ja Eva, pes yala ta skʼokʼowe kʼa ja smandar ja Dyosi ojni jamxuk el ja satkʼinala sok ojxa bʼobʼ skʼuluke ja jas skʼanaweʼi. Pe, ja jas yala ja Satanasi juni niwan abʼala: ja bʼajtan abʼal alxi bʼa luʼumi. Ja smeranili, ja jas wan sjobʼjel ja Satanasi jaʼa it: ¿Kechanta maʼ yeʼn ja Dyosi ja maʼ oj yaʼotik mandari? ¿Toj maʼ ja jastal wa xyaʼa ja smandari? ¿Lek maʼ oj jkʼuʼuktik yiʼ ja smandari?

Ja Eva koni luʼum yuj ja Satanasa. Ja ixuki kʼe okʼ skʼujol oj sloʼ ja sat teʼi, sok tsaʼan koni skʼabʼa. Tsaʼan skʼapa yi ja statami, jaxa winiki cha sloʼoniʼa. Jachuk paxye mulanum. Laso mi chaʼanuk yabʼalil ja jas skʼulaneʼi, pe, juni skʼokjel mandar ochyeʼa. Yuj ja gana skʼokowe ja smandar ja Dyosi, ja Adán sok ja Eva sjeʼawe mixa skʼanawe oj ajuke mandar yuj ja maʼ Kʼulaji yujileʼi, ja maʼ yaʼunej ja lekil sakʼanileʼi sok spetsanil ja jastik yiʼojeʼi.

Ja Dyosi skʼana kwenta yuj ja jas skʼulane ja kʼokumanik abʼal it. Pe, bʼajtan ja Dyosi skʼapa ojbʼi jak jun Koltanum, ja Intil kʼapubʼali, ja yeʼn oj smil el ja bʼitsʼbʼichani, ja Satanasi. Ja Dyosi yala ja Adán sok ja Eva ojni chamukeʼa, pe, mi tixta chamye weʼgoʼa, yato kanuke sakʼan jun tyempo, jachuk ja Dyosi sjeʼa snaʼa yiʼ syajal ja yuntikil ojto yil-e ja Adán sok ja xcheʼumi. Ja yuntikile ojni ajyuk laman skʼujoleʼa, pes ja maʼ oj sjek ja Dyosi oj ya chʼay snajel ja wokol jaki yajni kʼokxi ja smandar ja Dyos bʼa Edeni. Pe, ¿jastal oj ekʼuk ja jas wa skʼana ja Dyosi soka Koltanum oj sjeki? ¿Machʼa maʼ ja Koltanum jaw? Ja sjakʼjel ja sjobʼjelik it kʼe chiknajuk yajni kʼe tsʼijbʼaxuk ja Bibliʼa.

Tsaʼan, ja Dyosi tixa ya eluk ja bʼa Kʼachinubʼ bʼa Edeni ja Adán sok ja Eva. Yajni teyexa jwera, tʼilani oj smitsʼ ja stikaweʼi bʼa oj staʼ ja swaʼeleʼi. Ja Eva tixa maloʼaxiʼa sok yila ja Caini, ja bʼajtan yuntikileʼi. Ja Adán soka Eva ajyini mas skeremtik sok yakʼixuk, ja bʼa yeʼnleʼi tey ja Abeli sok ja Set, bʼa yintil ja winik it tiʼ pojki ja Noeji.

(Akʼubʼal eluk bʼa Génesis, skapituloʼil 3 man bʼa 5 sok bʼa Apocalipsis 12:9.)