Ja Jyoba skʼulan jun kʼachinubʼ bʼa jun lugar sbʼiʼil Edén. Ja kʼachinubʼ it bʼutʼel nichimik, teʼaltik sok chanteʼik. Tixa skʼulan ja bʼajtan winiki, ja Adán. Skʼulan soka stsʼubʼil luʼum sok tixa sjuʼuyi ja sniʼi. ¿Wan maʼ xa naʼa jasa ekʼi? ¡Ja winiki kʼe ajyuk sakʼanil! Ja Jyoba yayi ja cholal ja Adán bʼa stalnajel ja kʼachinubʼi. Cha yala yabʼ a-sleyi sbʼiʼil spetsanil ja chanteʼiki.

Ja Jyoba yayi ja Adán jun mandar jel tʼilan. Yala yabʼ: «Ojni bʼobʼa loʼ chikan jas sat teʼ, kechan miyuk june, yujni jel chaʼanyabʼalil. Yujkʼa aloʼo ja sat teʼ jaw, oj chaman».

Mas tsaʼan, ja Jyoba yala: «Oj jkʼulyi jun skoltanum ja Adán». Ja yuj ya ochyi lek swayel ja Adán sok ya makunuk june ja xaʼaxi bʼa skʼulajelyi jun xcheʼum. Sbʼiʼilan Eva. Ja Adán soka Eva yeʼn wajye ja  bʼajtan pamilya. ¿Jastal yabʼ ja Adán yajni yila ja xcheʼumi? Jelni gusto ajyi sok yala: «¡Kʼela ja jas skʼulan ja Jyoba sok june ja jxaʼaxi! ¡Ayxani june jastal keʼna!».

Ja Jyoba yala yabʼ ja Adán soka Eva aʼajyuk jitsan yuntikile sok a-sbʼutʼ-e ja luʼumi. Wani skʼana oj aʼtijuke gusto lajan bʼa oj yawe pax ja luʼum jun kʼachinubʼ. Ojni kʼotuk jun tsamal parke, jastal ja kʼachinubʼ bʼa Edén. Pe mi jach ekʼi. ¿Jas yujil? Ti oj kiltik ja bʼa kapitulo jakumi.