La kumxukotik jujuntik jabʼil bʼajtanto. Ja Nehemías waj jun israʼelenyo ti ajyi bʼa Susa, jun chonabʼ bʼa Persia. Waj jun yaʼtijum ja mandaranum Artajerjes. Jun kʼakʼu, ja smoj-alijel ja Nehemías ti el och bʼa Judá bʼa waj yal rasonik bʼa mi lekuk: «Ja israʼelenyo matik kumxiye bʼa Jerusalén mi jel talnubʼale. Ja sbardaʼik sok ja spwertaʼik ja chonabʼ ja it xchʼakawe ja swinkil Babilonia mi tojbʼeluk». Ja Nehemías jel tristeʼaxi. Wa skʼana oj koltanuk, ja yuj yayi orasyon ja Dyos bʼa oj jekjuk yuja mandaranum man Jerusalén.

Tsaʼan, ja mandaranum yila jel triste ay ja Nehemías. Yalyabʼ: «Mi bʼa jach kiluneja. ¿Jasa kʼulan?». Ja Nehemías sjakʼa: «Ja jchonabʼi, ja Jerusalén, jomel ay, ¡jastal mi triste oj ajyukon!». Ja mandaranum sjobʼoyi: «¿Jas oj jkʼuluk bʼa oj jkoltaya?». Ja bʼa jutsʼin jaw, ja Nehemías yayi orasyon chʼabʼan. Sok ti yala: «Awa pabor, jekawon man Jerusalén bʼa stojbʼesel yajkʼachil ekʼele ja bardaʼiki». Ja mandaranum Artajerjes sjekani. Cha yayi ja jas makuniyuj bʼa mi jas oj ekʼ sbʼaj ja bʼa najat sbʼejyeli. Chomajkil, ya och ajwalal sbʼaja Judá sok yayi teʼ bʼa oj skʼuluk ja spwertaʼik ja chonabʼi.

Yajni ja Nehemías kʼot ja bʼa Jerusalén, waj yil jastal ay ja bardaʼiki. Tixa stsomo ja sacerdoteʼik sok ja ajwalalik, sok yal yabʼye: «Ja it jelni yiʼoj. Tʼilan oj kʼe aʼtijukotik». Ja ixuk winik ochye akwerdo sok kʼe stojbʼese ja bardaʼiki.

Jujuntik skontraʼe ja israʼelenyo kʼulwaniye burlar sok yalawe: «Ojni bʼobʼ sjemkoʼ jun wet ja bardaʼik wanex stojbʼeseli». Pe ja aʼtijumik mini waj skʼujole sok snochoweyi ja aʼteli. Takal takal yawe kʼeʼuk mas chaʼan sok mas yij ja bardaʼiki.

Ja kontraʼik bʼa tuktukil lugar xchapawe wajel tiroʼanel junta chʼaykʼujol soka Jerusalén. Ja judíoʼik yabʼye, sok jel xiwye. Pe ja Nehemías yala: «Mok xiwanik. Tey jmoktik ja Jyoba». Sok yaʼa talnanumik bʼa stalnajel ja aʼtijumik. Jachuk, mi bʼobʼ ixtalajuke yuja kontraʼanumiki.

 Bʼa kechanta 52 kʼakʼu, ja bardaʼik soka pwertaʼik tojbʼi. Bʼa skʼintajel, ja Nehemías yiʼajan ja levitaʼik man Jerusalén. Sleʼa chabʼ kʼole tsʼebʼanum. Ja Esdras wajsok jun kʼole, jaxa Nehemías cha wajsok pilan. Ti kʼeye bʼa eskaleraʼik bʼa Pwerta bʼa wa xbʼojti jaʼ. Jujune ja kʼoleʼik tixa wajye bʼejyel bʼa jujune lado sok kʼeye bʼa sat ja barda bʼa sjoybʼajel ja chonabʼi. Wane yajel okʼuk trompeta, címbalo sok arpa, sok wane stsʼebʼantajel ja Jyoba, masan kʼot stsom sbʼaje ja bʼa templo. Ja winike, ja ixuke sok ja yal untik yaweyi majtanalik ja Jyoba sok skʼulane ja kʼini. Najat lek wa x-abʼxi ja snujkʼalil yuja jelni gusto aye juntiro.