Yajni ja Jesús ayxa mojan jun jabʼil sok snalan wan xcholjel, tʼilan ay jas stsaʼa bʼa jel chaʼanyabʼalil. ¿Machtik oj stsaʼ bʼa oj aʼtijuke mas kʼubʼan soka yeʼn? ¿Machtik oj kʼotuke ja matik oj stoj-e ja kongregasyon bʼa bʼajtan siglo? Bʼajtanto oj stsaʼe, ja Jesús skʼanayi ja skoltanel ja Jyoba. Ja yuj waj bʼa jun wits bʼa oj ajyuk stuchʼil sok ekʼyuj snajtil ja akwal yajelyi orasyon. Yajni sakbʼi, ja Jesús stsomo jujuntik ja bʼa snebʼumaniki sok stsaʼa ja 12 sjekabʼanumiki. ¿Wan maʼ xa naʼa jujuntik jas sbʼiʼile? Sbʼiʼil Pedro, Andrés, Santiago, Juan, Felipe, Bartolomé, Tomás, Mateo, Santiago skerem ja Alfeo, Tadeo, Simón sok Judas Iscariote.

Spetsanile jani ajyiye ekʼ soka Jesús. Ja yeʼn xchapa jastal oj xchol-e, sok tixa sjeka bʼa wajele xcholjel stuchʼile. Chomajkil, ajiyile yip yuja Jyoba bʼa yajel eluk ja pukujik sok stojbʼesel ja matik maloʼayi.

Ja Jesús yala kʼotel yamigo ja 12 sjekabʼanumik, sok sjipa skʼujol bʼa yeʼnle. Ja fariseoʼiki wa spensarane ja jekabʼanumik jel skoʼelale  sok mi jas snaʼawe. Pe ja Jesús mi jach yila. Ja yeʼn xchapunejxa lek bʼa oj skʼuluke ja yaʼtele. Ja yeʼnle tini oj ajyuke soka Jesús ja bʼa ekʼeleʼik mas tʼilan ja bʼa sakʼanili. Tini oj ajyukesok bʼajtanto oj chamuk sok ja yajni sakʼwi. Tʼusan mi yibʼanaluke ti sbʼaje bʼa Galilea, jastalni ja Jesús. Sok jujuntik nupanelexa.

Ja jekabʼanumiki mulanume, ja yuj cha skʼojchini yoke. Ajyi ekʼele bʼa kʼumaniye jach mi spensarane sok tuk ekʼele mi lekuk ja jas stsaʼawe skʼulajel. Mi tolabidaʼuk ajyi spasensyaʼe. Cha ajyi ekʼele kʼeye kʼumal bʼa machunuk ja bʼa yeʼnle ja mas tʼilani. Pe kʼotye lekil winike bʼa syajtaye ja Jyoba. Yeʼn kʼotye ja skujlayubʼil ja kongregasyon yajni ja Jesús mixa ti ajyi ja bʼa luʼumi.